Read Swahilli Matendo ya Mitume 2 Bible Online

Matendo ya Mitume 2 - Swahilli bible

Matendo ya Mitume 2

¹Wakati siku ya Pentekoste ilipotimia, wanafunzi walikuwa wamekusanyika wote pamoja wakibaki kwenye nafasi moja.

²Mara moja uvumi uliokuwa kama upepo unaovuma kwa nguvu sana ukashuka kutoka mbinguni. Nao ukajaa ndani ya nyumba yote walimokuwa wakiikaa.

³Kisha wakaona mufano wa ndimi za moto zikitokea, nazo zikasambaa na kushuka juu ya kila mumoja wao.

⁴Wote wakapewa Roho Mutakatifu na kuanza kusema kwa luga mbalimbali kwa kadiri Roho alivyowawezesha kusema.

⁵Katika Yerusalema kulikaa Wayuda wamoja waliotoka katika inchi zote za dunia, nao walikuwa watu wenye kuogopa Mungu.

⁶Wakati waliposikia ile fujo, wakakusanyika kwa uwingi. Wote wakapigwa na mushangao, kwa sababu kila mumoja wao aliwasikia waamini wakisema katika luga yake ya kuzaliwa.

⁷Wakashituka na kushangaa, wakisema: “Hawa wote wanaosema si wazaliwa wa Galilaya?

⁸Basi namna gani kila mumoja wetu anawasikia wakisema luga yake ya kuzaliwa?

⁹Kati yetu kuna watu wenye kutoka katika inchi hizi: Parti, Medi, Elamu, Mesopotamia, Yudea, Kapadokia, Ponto, Jimbo la Azia,

¹⁰Furigia, Pamfilia, Misri na pande za Libya karibu na Kurene. Vilevile kuna wageni waliotoka Roma,

¹¹kati yao kuna Wayuda na watu waliofuata dini ya Kiyuda, na kuna watu wa inchi ya Krete na ya Arabia. Hata hivi tunawasikia hawa wote wakisema habari za matendo makubwa ya Mungu katika luga zetu za kuzaliwa!”

¹²Wote wakashituka na kushangaa, wakaulizana: “Maana ya mambo haya ni nini?”

¹³Lakini wengine waliwachekelea waamini, wakisema: “Watu hawa wamelewa kabisa.”

¹⁴Basi Petro akasimama pamoja na wale mitume wengine kumi na mumoja na kuanza kusema kwa sauti kubwa mbele ya watu: “Ninyi Wayuda, nanyi wote munaokaa Yerusalema, musikilize vizuri, mutege sikio kwa maneno nitakayowaambia.

¹⁵Watu hawa si walevi kama munavyozani, kwa sababu ingali tu saa tatu ya asubui.

¹⁶Lakini jambo hili ni lile lililosemwa na nabii Yoeli.

¹⁷‘Mungu anasema: Katika siku za mwisho, nitashusha Roho wangu juu ya watu wote; wana wenu na wabinti zenu watatabiri, vijana wenu wataona maono nao wazee wenu wataota ndoto.

¹⁸Hakika katika siku zile nitashusha Roho wangu juu ya watumishi wangu, wanaume na wanawake, nao watatabiri.

¹⁹Nami nitafanya maajabu juu katika mbingu na vitambulisho chini katika dunia: kutakuwa damu, moto na moshi mwingi.

²⁰Jua litatiwa giza, mwezi utakuwa kama damu, mbele ya kutimia kwa siku ya Bwana, ile siku kubwa na ya utukufu.

²¹Halafu watu wote watakaoomba kwa jina la Bwana ataokolewa.’

²²“Ninyi wanainchi wenzangu Waisraeli, musikilize maneno haya: Yesu wa Nazareti alikuwa mutu aliyetambulishwa wazi na Mungu mbele yenu kwa njia ya vitambulisho, miujiza, na maajabu aliyofanya katikati yenu kama munavyojua ninyi wenyewe.

²³Mutu huyu alitolewa kwenu kufuatana na mupango uliokusudiwa na kujulikana na Mungu tangu zamani. Nanyi mulimwua, kwa kumutia katika mikono ya wenye zambi wamutundike juu ya musalaba.

²⁴Lakini Mungu alimufufua, akimufungua toka vifungo vya lufu, kwa sababu haikuwezekana afungwe na lufu.

²⁵Kwa maana mufalme Daudi alisema hivi juu yake: ‘Nilikuwa nikimwona Bwana mbele yangu saa zote; yeye ni karibu nami, kusudi nisitikisike.

²⁶Ni kwa hiyo moyo wangu unafurahi, ulimi wangu unashangilia, nami ninakaa na matumaini,

²⁷maana hautaniachilia kubaki katika kuzimu, hautakubali mutumishi wako mutakatifu apate kuoza.

²⁸Umenionyesha njia za uzima, utanijaza furaha nitakapokuwa karibu nawe.’

²⁹“Wandugu, inanipasa kuwaambia kwa uhodari juu ya babu yetu mukubwa Daudi. Yeye alikufa na kuzikwa, nalo kaburi lake lingali hata leo.

³⁰Lakini kwa sababu alikuwa nabii, alijua kwamba Mungu amemwahidi kwa kiapo kwamba atamutawalisha mumoja wa wazao wake kwa kurizi ufalme wake.

³¹Daudi aliona kwa mbali yale yatakayotokea, ni kwa sababu hii alisema maneno haya juu ya ufufuko wa Kristo: ‘Hakuachiliwa kubaki katika kuzimu, wala mwili wake haukuoza.’

³²“Mungu alimufufua huyo Yesu, na sisi wote tuko washuhuda wa jambo hili.

³³Na kisha kunyanyuliwa aikae na mamlaka kwa kuume kwa Mungu Baba yake, yeye akamupa Roho Mutakatifu aliyeahidiwa. Naye akamushusha juu yetu, sawa vile munavyojionea na kusikia wenyewe.

³⁴Maana Daudi mwenyewe hakupanda mbinguni, lakini alisema: ‘Bwana wetu Mungu alimwambia Bwana wangu: Ikaa na mamlaka kwa kuume kwangu,

³⁵mpaka nitakapowaweka waadui zako chini ya miguu yako, wakuwe kama kiti cha kupumzishia miguu.’

³⁶“Kwa hiyo watu wa taifa la Israeli wajue hakika kwamba yule Yesu muliyemutundika juu ya musalaba, Mungu amemufanya kuwa Bwana na Masiya!”

³⁷Nao watu waliposikia maneno hayo, wakachomwa katika mioyo yao na kuwaambia Petro na mitume wengine: “Wandugu zetu, tufanye nini?”

³⁸Petro akawajibu: “Mugeuke toka katika zambi zenu, na kila mumoja wenu abatizwe kwa jina la Yesu Kristo, na Mungu atawasamehe zambi zenu. Hivi mutapokea zawadi ya Roho Mutakatifu.

³⁹Kwa maana ahadi hii ya Mungu ilitolewa kwenu, kwa watoto wenu na kwa wote wanaokaa mbali, ndio wote ambao Bwana Mungu wetu atakaowaita.”

⁴⁰Petro akazidi kusema maneno mengine ya kuwaonya na kuwatia moyo, akisema: “Mujiokoe toka kati ya kizazi hiki kipotovu!”

⁴¹Siku ile watu waliosadiki mafundisho ya Petro, wakabatizwa. Na kadiri ya watu elfu tatu wakaongezeka katika kundi la wanafunzi.

⁴²Nao walikuwa wakijitoa kufuata mafundisho ya mitume, kuishi katika ushirika wa kindugu, kumega mukate na kuomba.

⁴³Kila mumoja wao akaingiwa na woga, nao mitume walifanya maajabu na vitambulisho vingi.

⁴⁴Na wanafunzi wote waliishi katika umoja na katika ushirika wa vitu vyao vyote.

⁴⁵Waliuzisha mali zao na vyote walivyokuwa navyo na kugawanya kati yao kufuatana na mahitaji ya kila mutu.

⁴⁶Kila siku walikuwa wakikusanyika pamoja katika hekalu, nao walikula chakula pamoja katika nyumba zao kwa furaha na katika unyenyekevu.

⁴⁷Nao walisifu Mungu na kufurahiwa na watu wote. Na kila siku Bwana aliongeza katika kundi la waamini watu waliokuwa wakiokolewa.