Read Swahilli Wakolosayi 4 Bible Online

Wakolosayi 4 - Swahilli bible

Wakolosayi 4

¹Ninyi wabwana muwatendee watumishi wenu kwa usawa na kwa haki, mukijua kwamba ninyi vilevile muko na Bwana wenu katika mbingu.

²Mudumu katika kuomba. Munapoomba mukeshe na kumutolea Mungu shukrani.

³Mutuombee sisi vilevile kusudi Mungu atufungulie njia ya kuhubiri neno lake tupate kutangaza ujumbe wa siri juu ya Kristo. Ni kwa ajili ya ujumbe ule mimi niko sasa katika kifungo.

⁴Basi muniombee kusudi nipate kuupasha waziwazi sawa ninavyopaswa kufanya.

⁵Mukuwe na mwenendo wa hekima mbele ya watu wanaokuwa wa inje ya kanisa, mukitumia vema kila wakati munaoupata.

⁶Masemi yenu yanapaswa kuwa mazuri siku zote na yenye kufaa, munapaswa kujua kujibia kila mutu vizuri.

⁷Ndugu yetu mupendwa Tikiko mutumishi mwaminifu, na mwenzangu tunayetumika naye kazi ya Bwana atawapasha ninyi habari zangu zote.

⁸Ni kwa shabaha hiyo ninamutuma kwenu apate kuwajulisha habari zetu na kuwafariji.

⁹Ninamutuma pamoja na ndugu mupendwa na mwaminifu, Onesimo, anayekuwa mwanainchi wa kule kwenu. Wao ndio watawaelezea maneno yote yaliyotokea hapa.

¹⁰Mufungwa mwenzangu Aristarko anawasalimia. Naye Marko, binamu wa Barnaba anawasalimia vilevile. (Mumekwisha kupata maagizo juu ya Marko; akifika kwenu mumupokee vizuri).

¹¹Naye Yesu anayeitwa Yusto, anawasalimia ninyi vilevile. Kati ya Wayuda walioamini ni hao watatu tu ndio wanaotumika pamoja nami kwa ajili ya kazi inayoelekea Ufalme wa Mungu, nao wamenifariji sana.

¹²Mwanainchi mwenzenu Epafra anawasalimia vilevile. Yeye ni mutumishi wa Yesu Kristo, hachoki kwa kuwaombea ninyi, kusudi musimame imara mukikomaa kiroho na kuwa tayari kwa kutimiza kabisa mapenzi ya Mungu.

¹³Ninaweza kushuhudia juu yake kwamba anajisumbua sana kwa ajili yenu na kwa ajili ya wandugu wa Laodikia na wa Hierapoli.

¹⁴Luka, muganga wetu mupendwa na Dema wanawasalimia.

¹⁵Muwasalimie wandugu wa Laodikia, pamoja na Nimfa na kanisa linalokusanyika ndani ya nyumba yake.

¹⁶Barua hii itakapokwisha kusomwa kwenu mufanye namna yote ipate kusomwa vilevile katika kanisa la Laodikia. Na ninyi kwa ngambo yenu, musome vilevile barua niliyotuma kwa kanisa lile.

¹⁷Mumwambie Arkipo aangalie vizuri atimize kazi ile aliyopewa na Bwana.

¹⁸Mimi Paulo ninawatumia salamu zangu, nikiziandika kwa mukono wangu mwenyewe. Musisahau kwamba mimi ningali katika kifungo. Ninawatakia neema kutoka kwa Mungu.