Read Swahilli Ruta 3 Bible Online

Ruta 3 - Swahilli bible

Ruta 3

¹Siku moja, Naomi mama mukwe wa Ruta akamwambia: “Inanipasa kwangu kukutafutia mume kusudi upate uheri.

²Sasa huyu Boazi, ambaye ulifanya kazi na wajakazi wake, si ni wa ukoo wetu? Basi sikiliza, magaribi hii atakuwa katika kiwanja akipepeta shayiri.

³Kwa hiyo, nawa, ujipake mafuta na kuvaa vizuri, kisha uende kule katika kiwanja pahali anapopepetea. Lakini angalia usijionyeshe kwake mpaka atakapomaliza kula na kunywa.

⁴Vilevile, ujue pahali atakapolala, na akisha kusinzia, umwendee polepole uifunue miguu yake ulale pale. Yeye atakuelezea la kufanya.”

⁵Ruta akajibu: “Nitafanya yote uliyoniambia.”

⁶Kwa hiyo, Ruta akakwenda kule katika kiwanja cha kupepetea, akafanya jinsi mama mukwe wake alivyomwamuru.

⁷Boazi alipomaliza kula na kunywa, akachangamuka. Akakwenda karibu na lundo la shayiri, akalala. Ruta akakwenda polepole akafunua miguu yake na kulala pale.

⁸Katikati ya usiku, Boazi akasisimuka, akageuka, akashituka kumukuta mwanamuke amelala kwenye miguu yake.

⁹Akauliza: “Wewe ni nani?” Ruta akajibu: “Ni mimi Ruta, mujakazi wako. Kwa sababu wewe ni wa jamaa yangu wa karibu, uitande nguo yako juu ya mujakazi wako.”

¹⁰Boazi akasema: “Yawe akubariki, kwa maana kwa yote unayofanya unaonyesha heshima zaidi kuliko uliyoyafanya pale mbele, kwa maana haukuwatafuta vijana wamasikini au tajiri wakuoe.

¹¹Sasa binti yangu usifazaike, nitakufanyia lolote utakaloomba kwa sababu kila mutu katika muji huu anajua wema wako.

¹²Ni kweli kwamba ni mapaswa yangu kukutunza, lakini kuna vilevile mwenye mapaswa ya kukutunza na ambaye ni wa karibu zaidi kuliko mimi.

¹³Kwa hiyo, kaa hapa usiku wote, na kesho asubui tutaona kama atakubali kukutunza au hapana. Ikiwa atakutunza ni vizuri. Kama vile Yawe anavyoishi, akikataa, mimi nitakutunza. Lala hapa mpaka asubui.”

¹⁴Basi Ruta akalala pale kwenye miguu yake mpaka asubui, lakini akaamuka asubui mapema kusudi asionekane, kwa sababu Boazi hakutaka mutu ajue kwamba Ruta alikuwa kwenye kiwanja cha kupepetea.

¹⁵Boazi akamwambia: “Tandika nguo yako chini.” Ruta akafanya hivyo. Boazi akamwanga shayiri yapata kilo kumi na tano, akamubebesha, naye akarudi katika muji.

¹⁶Alipofika katika muji, mama mukwe wake akamwuliza: “Ilikuwa namna gani binti yangu?” Ruta akamwelezea yote ambayo Boazi alimutendea.

¹⁷Halafu akaendelea kusema: “Akaniambia nisirudi kwa nyumba ya mama mukwe wangu mikono mitupu na kwa hiyo akanipa shayiri hii yapata kilo kumi na tano.”

¹⁸Naye Naomi akasema: “Sasa tulia binti yangu Ruta, mpaka uone litakalotokea. Boazi hatatulia leo mpaka ameyatimiza yote.”