Read Swahilli Ayubu 22 Bible Online

Ayubu 22 - Swahilli bible

Ayubu 22

¹Ndipo huyo Elifazi Mtemani akajibu, na kusema,

² Je! Yumkini mtu awaye yote kumfaa Mungu? Hakika yeye aliye na hekima hujifaa mwenyewe.

³Je! Mwenyezi hupata furaha katika wewe kuwa mwenye haki? Au je, ni faida kwake, kwamba wafanya njia zako kuwa timilifu?

⁴Je! Ni kwa wewe kumcha yeye anakukemea? Na kuingia hukumuni nawe?

⁵Je! Uovu wako si mkuu? Wala maovu yako hayana mwisho.

⁶Kwa kuwa umetwaa dhamana kwa nduguyo bure, Na kuwavua nguo zao walio uchi.

⁷ Hukumpa maji ya kunywa huyo aliyechoka, Nawe umemnyima chakula huyo mwenye njaa.

⁸Lakini huyo shujaa, nchi ilikuwa yake; Na huyo mwenye kusifiwa, yeye aliikaa.

⁹Umewafukuza wanawake wajane bila chochote, Na mikono ya mayatima imevunjwa.

¹⁰Kwa hiyo umezungukwa na mitego, Na hofu ya ghafla yakutaabisha,

¹¹Au je! Huoni giza, Na maji mengi yanayokufunika?

¹² Je! Mungu hayuko mbinguni juu? Tena tazama umbali wa nyota, jinsi zilivyo juu!

¹³Nawe wasema, Mungu anajua nini? Je! Aweza kuamua kati ya giza kuu?

¹⁴ Mawingu mazito ni kifuniko chake, hata asione; Naye yuatembea juu ya kuba ya mbingu.

¹⁵ Je! Utaifuata njia ya zamani Waliyoikanyaga watu waovu?

¹⁶Ambao walinyakuliwa kabla ya wakati wao, Msingi wao ulimwagika kama kijito cha maji;

¹⁷Waliomwambia Mungu, Tuondokee; Tena, Huyo Mwenyezi aweza kutufanyia nini?

¹⁸ Naye ndiye aliyezijaza nyumba zao vitu vyema; Lakini mashauri ya waovu na yawe mbali nami.

¹⁹ Wenye haki huyaona hayo wakafurahi; Nao wasio na hatia huwacheka;

²⁰Wasema, Hakika hao waliotuinukia wamekatiliwa mbali, Na mabaki yao moto umeyateketeza.

²¹ Mjue sana Mungu, ili uwe na amani; Ndivyo mema yatakavyokujia.

²² Uyapokee, tafadhali, mafunzo yatokayo kinywani mwake, Na maneno yake yaweke moyoni mwako.

²³Ukimrudia Mwenyezi, utajengwa; Ukiuondoa udhalimu mbali na hema yako.

²⁴Nawe hazina zako ziweke mchangani, Na dhahabu ya Ofiri iweke kati ya mawe ya vijito;

²⁵Naye Mwenyezi atakuwa hazina yako, Atakuwa ni fedha ya thamani kwako.

²⁶Kwani ndipo utakapojifurahisha katika Mwenyezi, Na kuinua uso wako kumwelekea Mungu.

²⁷Utamwomba yeye naye atakusikia; Nawe utazitimiliza nadhiri zako.

²⁸ Nawe utakusudia neno, nalo litathibitika kwako; Na mwanga utaziangazia njia zako.

²⁹Hapo watakapokuangusha, utasema, Kuna kuinuka tena; Naye mnyenyekevu Mungu atamwokoa.

³⁰Atamwokoa na huyo asiye na hatia; Naam, utaokolewa kwa sababu ya usafi wa mikono yako.