Read Swahilli Ayubu 32 Bible Online

Ayubu 32 - Swahilli bible

Ayubu 32

¹Basi hao watu watatu wakaacha kumjibu Ayubu, kwa sababu alikuwa mwenye haki machoni pake mwenyewe.

² Ndipo zikawaka hasira za huyo Elihu mwana wa Barakeli, Mbuzi, katika jamaa ya Ramu, juu ya Ayubu, kwa sababu alikuwa amejipa haki mwenyewe zaidi ya Mungu.

³Tena hasira zake ziliwaka juu ya hao rafiki zake watatu kwa sababu hawakupata jawabu, lakini wamemhukumia Ayubu makosa.

⁴Basi huyo Elihu alikuwa anangoja ili anene na Ayubu, kwa sababu hao wengine walikuwa wazee kuliko yeye.

⁵Hata Elihu alipoona kuwa hapana jawabu katika vinywa vya watu hao watatu, hasira zake ziliwaka.

⁶Basi Elihu mwana wa Barakeli, Mbuzi, akajibu, na kusema, Mimi ni kijana, na ninyi ni wazee sana; Kwa hiyo nilijizuia, nisithubutu kuwaonesha nionavyo.

⁷ Nilisema, Yafaa siku ziseme, Na wingi wa miaka ufundishe hekima.

⁸ Lakini hakika imo roho ndani ya mwanadamu, Na pumzi ya Mwenyezi ndiyo impayo ufahamu.

⁹ Sio wakuu walio wenye hekima, Wala sio wazee watambuao haki.

¹⁰Basi nilisema, Nisikilizeni mimi; Mimi nami nitawaonesha nionavyo.

¹¹Tazama, niliyangojea maneno yenu, Nilizisikiliza nisikie hoja zenu, Hapo mlipokitafuta mtakalonena.

¹² Naam, niliwasikiza ninyi, Na tazama, hapana mmoja aliyemshinda Ayubu, Wala kumjibu maneno yake, kati yenu.

¹³ Jitunzeni msiseme, Sisi tumepata hekima; Mungu huenda akamshinda, si mtu;

¹⁴Kwa kuwa yeye hajayaelekeza maneno yake kwangu; Wala sitamjibu mimi kwa maneno yenu.

¹⁵Wameshangaa, hawajibu tena; Hawana neno la kusema.

¹⁶Na mimi, je! Ningoje, kwa sababu hawaneni, Kwa sababu wasimama kimya, wala wasijibu tena;

¹⁷Mimi nami nitajibu sehemu yangu, Mimi nami nitaonesha nionavyo.

¹⁸Kwa kuwa nimejaa maneno; Roho iliyo ndani yangu hunihimiza.

¹⁹Tazama, tumbo langu ni kama divai iliyozibwa; Kama viriba vipya liko karibu kupasuka.

²⁰Nitanena, ili nipate kutulia; Nitafunua midomo yangu na kujibu.

²¹Tafadhali, nisiupendelee uso wa mtu; Wala sitajipendekeza kwa mtu yeyote.

²² Kwa kuwa mimi sijui kujipendekeza; Au Muumba wangu angeniondoa kwa upesi.