Read Swahilli Ayubu 41 Bible Online

Ayubu 41 - Swahilli bible

Ayubu 41

¹ Je! Waweza wewe kumvua mamba kwa ndoana? Au, kuufunga ulimi wake kwa kamba?

² Je! Waweza kutia kamba puani mwake? Au kutoboa taya yake kwa kulabu?

³Je! Atakusihi sana? Au, atakuambia maneno ya upole?

⁴Je! Atafanya agano pamoja nawe, Umtwae kuwa mtumishi wako milele?

⁵Je! Utamchezea kama ndege? Au, kumfunga kwa ajili ya wasichana wako?

⁶Je! Vikosi vya wavuvi watamfanyia biashara? Watamgawanya kati ya wafanyao biashara?

⁷Je! Waweza kuijaza ngozi yake kwa vyuma vyenye ncha, Au kichwa chake kwa vyusa?

⁸Mwekee mkono wako; Vikumbuke vile vita, wala usifanye tena.

⁹Tazama, kumtamani ni bure; Je! Hatambwaga chini huyo atakayemtazama?

¹⁰ Hapana aliye mkali hata akathubutu kumwamsha; Bali ni nani awezaye kusimama mbele yangu mimi?

¹¹ Ni nani aliyetangulia kunipa hata nimlipe? Kila kilicho chini ya mbingu nzima ni changu.

¹²Sitanyamaa kusema habari za via vyake, Wala nguvu zake kuu, wala umbo lake zuri.

¹³Ni nani awezaye kumbambua magamba yake? Ni nani atakayepenya dirii yake maradufu?

¹⁴Ni nani awezaye kuifungua milango ya uso wake? Meno yake yatisha kandokando yake.

¹⁵Magamba yake yenye nguvu ndiyo fahari yake, Yamefungamana pamoja kama yaliyofungwa kwa mhuri.

¹⁶Jinsi yalivyoshikamana Hata upepo hauwezi kupita kati.

¹⁷Yamefungamana pamoja; Yameshikamana, hata hayawezi kutengwa.

¹⁸Kwa kuchemua kwake mwanga humemetuka, Na macho yake yanafanana na koze za alfajiri.

¹⁹Mienge iwakayo hutoka kinywani mwake, Na cheche za moto huruka nje.

²⁰Moshi hutoka katika mianzi ya pua yake, Kama nyungu ikitokota, na manyasi yawakayo.

²¹Pumzi zake huwasha makaa, Na miali ya moto hutoka kinywani mwake.

²²Katika shingo yake hukaa nguvu, Na utisho hucheza mbele yake.

²³Minofu ya nyama yake hushikamana; Yanakazana juu yake; hayawezi kuondolewa.

²⁴Moyo wake una uimara kama jiwe; Naam, uimara kama jiwe la chini la kusagia.

²⁵Anapojiinua, mashujaa huogopa; Kwa sababu ya woga wao huvunjwa moyo.

²⁶Mtu akimpiga kwa upanga, haumwingii; Wala fumo, wala mshale, wala mkuki wenye ncha.

²⁷Yeye huona chuma kuwa kama nyasi, Na shaba kama mti uliooza.

²⁸Mshale hauwezi kumkimbiza; Na mawe ya teo kwake hugeuka kuwa kama makapi.

²⁹Marungu huhesabiwa kama mabua; Naye hucheka mshindo wa mkuki ukitupwa.

³⁰Pande zake za chini ni kama vigae vikali; Hutandika malazi kama kuweka chombo cha kupuria nafaka juu ya matope.

³¹Yeye hufanya kilindi kichemke kama chungu; Hufanya bahari kuwa kama chungu cha mafuta.

³²Hufanya mapito yake kung'aa nyuma yake Hata mtu angedhani kilindi kina mvi.

³³Juu ya nchi hapana aliyefanana naye, kiumbe asiye na woga.

³⁴Yeye hutazama kila kitu kilicho juu; Ni mfalme juu ya wote wenye kiburi.