Read Swahilli Ayubu 5 Bible Online

Ayubu 5 - Swahilli bible

Ayubu 5

¹Haya, ita sasa; je! Yuko atakayekujibu? Nawe utamwelekea yupi katika hao watakatifu?

²Kwani hasira humwua mtu mpumbavu, Nao wivu humwua mjinga.

³Nimewaona wapumbavu wakishusha mizizi; Lakini mara niliyalaani maskani yake.

⁴Watoto wake wako mbali na wokovu, Nao wamesongwa langoni, Wala hapana atakayewaponya.

⁵Mavuno yake wale wenye njaa huyala, Na kuyatwaa hata kuyatoa miibani, Nao wenye kiu huzitwetea mali zao.

⁶Kwani taabu haitoki mchangani, Wala mashaka hayachipuki katika nchi;

⁷Lakini mwanadamu huzaliwa ili apate shida, Kama cheche za moto zirukavyo juu.

⁸⑧ Lakini mimi ningemtafuta Mungu, Ningemwekea Mungu kesi yangu;

⁹Yeye afanyaye mambo makuu, yasiyotambulikana; Mambo ya ajabu yasiyo na hesabu;

¹⁰Yeye atoaye mvua inyeshe juu ya nchi, Na kuyapeleka maji mashambani;

¹¹Awainuaye juu hao walio chini; Na hao waombolezao hukuzwa wawe salama.

¹²Yeye huitangua mipango ya wadanganyifu, Mikono yao isipate kuyatimiza makusudi yao.

¹³⑩ Yeye huwanasa wenye hekima katika hila yao wenyewe; Na mashauri ya washupavu yaharibika kwa haraka.

¹⁴Wao hupatwa na giza wakati wa mchana, Hupapasa mchana vile vile kama usiku.

¹⁵Lakini yeye huokoa na upanga wa kinywa chao, Hata kumwokoa mhitaji na mkono wake aliye hodari.

¹⁶Basi hivi huyo maskini ana matumaini, Na uovu hufumba kinywa chake.

¹⁷⑪ Tazama, yu heri mtu yule Mungu amwadhibuye; Kwa hiyo usidharau kurudiwa na huyo Mwenyezi.

¹⁸⑫ Kwani yeye huumiza, lakini tena huuguza; Yeye hutia jeraha, na mikono yake huponya.

¹⁹⑬ Yeye atakuokoa na mateso sita; Naam, hata katika saba hapana uovu utakaokugusa.

²⁰Wakati wa njaa atakukomboa na mauti; Na vitani atakukomboa na nguvu za upanga.

²¹⑭ Utafichwa na mapigo ya ulimi; Wala usiogope maangamizo yatakapokuja.

²²Wewe utayacheka maangamizo na njaa; Wala hutawaogopa wanyama wakali wa nchi.

²³⑮ Kwani utakuwa na mapatano na mawe ya bara; Nao wanyama wa bara watakuwa na amani kwako.

²⁴Nawe utajua ya kwamba hema yako ni salama; Na zizi lako utalikagua, wala usikose kitu.

²⁵Tena utajua ya kwamba uzao wako utakuwa mwingi, Na uzao wako utakuwa kama nyasi za nchi.

²⁶Utafika kaburini mwenye umri mtimilifu, Kama mganda wa ngano ulivyo wakati wake.

²⁷Tazama, haya tumeyapeleleza, ndivyo yalivyo; Yasikie, uyajue, ili upate mema.