Read Swahilli Mithali 1 Bible Online

Mithali 1 - Swahilli bible

Mithali 1

¹ Mithali za Sulemani, mwana wa Daudi, mfalme wa Israeli.

²Kujua hekima na adabu; kutambua maneno ya ufahamu;

³ kufundishwa matendo ya busara, katika haki na hukumu na adili.

⁴Kuwapa wajinga werevu, na kijana maarifa na tahadhari;

⁵mwenye hekima asikie na kuongezewa elimu, na mwenye ufahamu ayafikie mashauri yenye njia.

⁶Kufahamu mithali na kitendawili, na maneno ya wenye hekima na mafumbo yao.

⁷ Kumcha BWANA ni chanzo cha maarifa, Bali wapumbavu hudharau hekima na adabu.

⁸Mwanangu, yasikilize mafundisho ya baba yako, Wala usiiache sheria ya mama yako,

⁹Kwa maana hayo yatakuwa kilemba cha neema kichwani pako, Na mikufu shingoni mwako.

¹⁰ Mwanangu, wenye dhambi wakikushawishi, Wewe usikubali.

¹¹ Wakisema, Haya! Njoo pamoja nasi, Na tuvizie ili kumwaga damu; Tumwotee asiye na hatia, bila sababu;

¹² Tuwameze hai kama kuzimu, Na wazima, kama wao washukao shimoni.

¹³Tutapata mali yote ya thamani, Tutazijaza nyumba zetu mateka.

¹⁴Wewe utashirikiana nasi; Tutakuwa na vitu vyote kwa shirika.

¹⁵ Mwanangu, usiende njiani pamoja nao; Uzuie mguu wako usiende katika mapito yao.

¹⁶ Maana miguu yao huenda mbio maovuni, Nao hufanya haraka ili kumwaga damu.

¹⁷Kwa kuwa mtego hutegwa bure, Mbele ya macho ya ndege yeyote.

¹⁸Na hao hujiotea damu yao wenyewe, Hujinyemelea nafsi zao wenyewe.

¹⁹ Ndivyo zilivyo njia za kila mwenye tamaa ya mali; Huuondoa uhai wao walio nayo.

²⁰ Hekima hulia kwa sauti katika njia kuu, Hupaza sauti yake katika viwanja;

²¹Hulia penye mikutano mikubwa ya watu, Mahali pa kuyaingilia malango, Ndani ya mji hutamka maneno yake.

²²Enyi wajinga, hata lini mtapenda ujinga? Na wenye dharau kupenda dharau yao, Na wapumbavu kuchukia maarifa?

²³ Geukeni kwa ajili ya maonyo yangu; Tazama, nitawamwagia roho yangu, Na kuwajulisheni maneno yangu.

²⁴ Kwa kuwa nimeita, nanyi mkakataa; Nimeunyosha mkono wangu, wala hakuna aliyeangalia;

²⁵ Bali mmeupuuza ushauri wangu, Wala hamkutaka maonyo yangu;

²⁶Mimi nami nitacheka siku ya msiba wenu, Nitadhihaki hofu yenu ifikapo;

²⁷Hofu yenu ifikapo kama tufani, Na msiba wenu ufikapo kama kisulisuli, Dhiki na taabu zitakapowafikia.

²⁸ Ndipo watakaponiita, lakini sitaitika; Watanitafuta kwa bidii, wasinione.

²⁹ Kwa kuwa walichukia maarifa, Wala hawakuchagua kumcha BWANA.

³⁰Hawakukubali mashauri yangu, Wakayadharau maonyo yangu yote.

³¹ Kwa hiyo watakula matunda ya njia yao, Watashiba mashauri yao wenyewe.

³²Maana kurudi nyuma kwao wajinga kutawaua, Na kufanikiwa kwao wapumbavu kutawaangamiza.

³³Bali kila anisikilizaye atakaa salama, Naye atatulia bila kuogopa mabaya.