Read Swahilli Mithali 24 Bible Online

Mithali 24 - Swahilli bible

Mithali 24

¹Usiwawaonee wivu watu waovu, Wala usitamani kuwa pamoja nao;

²Kwa maana moyo wao hufikiri dhuluma, Na midomo yao huongea madhara.

³Nyumba hujengwa kwa hekima, Na kwa ufahamu huthibitika,

⁴Na kwa maarifa vyumba vyake hujazwa Vitu vyote vya thamani na vya kupendeza.

⁵Mtu mwenye hekima ana nguvu; Naam, mtu wa maarifa huongeza uwezo;

⁶Maana kwa mashauri ya akili utafanya vita; Na kwa wingi wa washauri huja wokovu.

⁷Kwa mpumbavu hekima haipatikani; Hafumbui kinywa chake langoni.

⁸Mtu afikiriye kutenda maovu, Watu watamwita mtundu;

⁹ Fikira za mpumbavu ni dhambi, Na mwenye mzaha huwachukiza watu.

¹⁰Ukizimia siku ya taabu, Nguvu zako ni chache.

¹¹ Uwaokoe wanaochukuliwa ili wauawe; Nao walio tayari kuchinjwa uwaopoe.

¹² Ukisema, Sisi hatukujua hayo; Je! Yeye aipimaye mioyo siye afahamuye? Naye ailindaye nafsi yako siye ajuaye? Je! Hatamlipa kila mtu sawasawa na kazi yake?

¹³Mwanangu, ule asali, kwa maana ni njema, Na sega la asali lililo tamu ulionjapo.

¹⁴Basi utaijua hekima kuwa tamu kwa nafsi yako; Ikiwa umekwisha kuiona; Ndipo itakapofuata thawabu; Wala tumaini lako halitabatilika.

¹⁵Ewe mtu mbaya, usiyavizie makao yake mwenye haki; Wala usipaharibu mahali pake pa kupumzika;

¹⁶① Kwa maana mwenye haki huanguka mara saba akaondoka tena; Bali wasio haki hukwazwa na mabaya.

¹⁷Usifurahi, adui yako aangukapo; Wala moyo wako usishangilie ajikwaapo;

¹⁸BWANA asije akaliona hilo, likamkasirisha; Akageuzia mbali naye hasira yake.

¹⁹Usikasirike kwa sababu ya watenda mabaya; Wala usiwahusudu wabaya;

²⁰② Kwa maana mtu mbaya hapati thawabu; Taa ya mtu mbaya itazimika.

²¹③ Mwanangu, mche BWANA, na mfalme; Wala usishirikiane na wenye kigeugeu;

²²Maana msiba wao utatokea kwa ghafla; Tena ni nani aujuaye uharibifu wa miaka yao.

²³④ Haya nayo pia ni maneno ya wenye akili. Kupendelea watu katika hukumu si kwema.

²⁴⑤ Amwambiaye mtu mwovu, Wewe una haki; Makabila ya watu watamlaani, taifa watamchukia.

²⁵Bali kwao wakemeao furaha itakuwako; Na baraka ya kufanikiwa itawajilia.

²⁶Aibusu midomo atoaye jawabu la haki.

²⁷Tengeneza kazi yako huko nje, Jifanyizie kazi yako tayari shambani, Ukiisha, jenga nyumba yako.

²⁸⑥ Usimshuhudie jirani yako pasipo sababu, Wala usidanganye kwa midomo yako.

²⁹⑦ Usiseme, Nitamtenda kama alivyonitenda mimi; Nitamlipa mtu huyo sawasawa na tendo lake.

³⁰Nilipita karibu na shamba la mvivu, Na shamba la mizabibu la mtu asiye na akili.

³¹⑧ Kumbe! Lote pia limemea miiba; Uso wake ulifunikwa kwa viwawi; Na ukuta wake wa mawe umebomoka.

³²Ndipo nilipoangalia na kufikiri sana; Niliona, nikapata mafundisho.

³³⑩ Bado kulala kidogo, kusinzia kidogo, Bado kukunja mikono upate usingizi!

³⁴Hivyo, umaskini wako huja kama mnyang'anyi, Na uhitaji wako kama mtu mwenye silaha.