Read Swahilli Mithali 28 Bible Online

Mithali 28 - Swahilli bible

Mithali 28

¹Waovu hukimbia wasipofuatiwa na mtu; Bali wenye haki ni wajasiri kama simba.

²Kwa sababu ya maasi ya nchi wakuu wake huwa wengi; Bali kwa wenye ufahamu na maarifa hali ya nchi hudumishwa

³ Mtu mhitaji awaoneaye maskini, Ni kama mvua ya dhoruba isiyosaza chakula.

⁴ Wao waiachao sheria huwasifu waovu; Bali wao waishikao hushindana nao.

⁵ Watu waovu hawaelewi na haki; Bali wamtafutao BWANA huelewa na zote.

⁶Afadhali maskini aendaye katika unyofu wake, Kuliko mpotovu wa njia angawa ni tajiri.

⁷Yeye aishikaye sheria ni mwana mwenye hekima; Bali aliye rafiki wa walafi humwaibisha babaye.

⁸Yeye azidishaye mali yake kwa riba na faida, Humkusanyia mtu awahurumiaye maskini.

⁹① Yeye aligeuzaye sikio lake asiisikie sheria, Hata sala yake ni chukizo.

¹⁰② Kila mtu awapotezaye wenye haki katika njia mbaya, Ataanguka katika rima lake mwenyewe; Bali wakamilifu watarithi mema.

¹¹Mtu tajiri ana hekima machoni pake mwenyewe; Bali maskini mwenye ufahamu humchunguza sana.

¹²Wenye haki washindapo, uko utukufu mwingi; Bali waovu waondokapo, watu hujificha.

¹³Afichaye dhambi zake hatafanikiwa; Bali yeye aziungamaye na kuziacha atapata rehema.

¹⁴Mwanadamu mwenye kicho yu heri sikuzote; Bali mshupavu wa moyo ataangukia madhara.

¹⁵③ Kama simba angurumaye, na dubu mwenye njaa; Ndivyo alivyo mtu mbaya awatawalaye maskini.

¹⁶Mkuu aliyepungukiwa na akili huwaonea watu sana; Bali achukiaye kutamani ataongeza siku zake.

¹⁷Aliyelemewa na damu ya mtu Atalikimbilia shimo; wala mtu asimzuie.

¹⁸Aendaye kwa unyofu ataokolewa; Bali mkaidi wa njia zake ataanguka mara.

¹⁹Alimaye shamba lake atakuwa na chakula tele; Bali afuataye mambo ya upuzi atapata umaskini wa kumtosha.

²⁰Mtu mwaminifu atakuwa na baraka tele; Lakini afanyaye haraka kuwa tajiri hakosi ataadhibiwa.

²¹④ Kupendelea watu si kwema; Wala mtu kuasi kwa ajili ya kipande cha mkate.

²²Mwenye husuda afanya haraka kuwa tajiri; Wala haufikiri uhitaji utakaomjia.

²³Amkemeaye mwenzake hatimaye atapata kibali; Zaidi ya mtu ajipendekezaye kwa ulimi wake.

²⁴Aibaye mali ya babaye au mamaye, na kusema, Si kosa; Mwana huyo ni rafiki wa mtu mharibifu.

²⁵⑤ Mwenye nafsi ya kutamani huchochea fitina; Bali amtumainiye BWANA ataneemeshwa.

²⁶Mwenye kujitumainia moyo wake ni mjinga; Bali yeye aendaye kwa busara ataokolewa.

²⁷Mwenye kuwagawia maskini hatahitaji kitu; Bali afichaye macho yake atakuwa na laana nyingi.

²⁸Wasio haki wainukapo, wanadamu hujificha; Bali waangamiapo, wenye haki huongezeka.