Read Swahilli Marko 11 Bible Online

Marko 11 - Swahilli bible

Marko 11

¹ Walipokaribia Yerusalemu karibu na Bethfage na Bethania, kukabili mlima wa Mizeituni, aliwatuma wawili katika wanafunzi wake,

²akawaambia, Nendeni mpaka kile kijiji kinachowakabili; na katika kuingia ndani yake, mara mtaona mwanapunda amefungwa, asiyepandwa na mtu bado; mfungueni, kamleteni.

³ Na mtu akiwaambia, Mbona mnafanya hivi? Semeni, Bwana anamhitaji na mara atamrudisha tena hapa.

⁴Wakaenda zao, wakamwona mwanapunda amefungwa penye mlango, nje katika njia kuu, wakamfungua.

⁵Baadhi ya watu waliosimama huko wakawaambia, Mnafanya nini kumfungua mwanapunda?

⁶Wakawaambia kama Yesu alivyowaagiza, nao wakawaruhusu.

⁷Wakamletea Yesu yule mwanapunda, wakatandika mavazi yao juu yake; akaketi juu yake.

⁸Watu wengi wakatandaza mavazi yao njiani, na wengine matawi waliyoyakata mashambani.

⁹ Nao watu waliotangulia na wale waliofuata wakapaza sauti, Hosana; ndiye mbarikiwa ajaye kwa jina la Bwana;

¹⁰umebarikiwa na ufalme ujao, wa baba yetu Daudi. Hosana juu mbinguni.

¹¹ Naye akaingia Yerusalemu hata ndani ya hekalu; na alipokwisha kutazama yote pande zote, kwa kuwa ni wakati wa jioni, akatoka, akaenda Bethania pamoja na wale Kumi na Wawili.

¹²Siku iliyofuata walipokuwa wakitoka Bethania, aliona njaa.

¹³ Akaona kwa mbali mtini wenye majani, akaenda ili labda aone kitu juu yake; na alipoufikia hakuona kitu ila majani; maana si wakati wa tini.

¹⁴ Akajibu, akauambia, Tangu leo hata milele mtu asile matunda kwako. Wanafunzi wake wakasikia.

¹⁵ Wakafika Yerusalemu, naye akaingia ndani ya hekalu, akaanza kuwafukuza wale waliokuwa wakiuza na kununua ndani ya hekalu, akazipindua meza za wabadili fedha, na viti vyao wauzao njiwa;

¹⁶wala hakumruhusu mtu yeyote kupitia katika hekalu akiwa amebeba kitu.

¹⁷ Akafundisha, akasema, Je! Haikuandikwa, Nyumba yangu itaitwa nyumba ya sala kwa mataifa yote? Bali ninyi mmeifanya kuwa pango la wanyang'anyi.

¹⁸Wakuu wa makuhani na waandishi wakapata habari wakatafuta jinsi ya kumwangamiza; maana walimwogopa, kwa sababu mkutano wote walishangazwa na mafundisho yake.

¹⁹Na kulipokuwa jioni alitoka mjini.[6]

²⁰ Na asubuhi walipokuwa wakipita, waliuona ule mtini umenyauka toka shinani.

²¹Petro akakumbuka habari yake, akamwambia, Rabi, tazama, mtini ulioulaani umenyauka.

²² Yesu akajibu, akamwambia, Mwaminini Mungu.

²³ Amin, nawaambia, yeyote atakayeuambia mlima huu, Ng'oka ukatupwe baharini, wala asione shaka moyoni mwake, ila aamini kwamba hayo asemayo yametukia, yatakuwa yake.

²⁴ Kwa sababu hiyo nawaambia, Yoyote myaombayo mkisali, aminini ya kwamba mnayapokea, nayo yatakuwa yenu.

²⁵ Nanyi, kila msimamapo na kusali, sameheni, mkiwa na neno juu ya mtu; ili na Baba yenu aliye mbinguni awasamehe na ninyi makosa yenu. [

²⁶Lakini kama ninyi hamsamehe, wala Baba yenu aliye mbinguni hatawasamehe ninyi makosa yenu.]

²⁷ Wakafika Yerusalemu tena; hata alipokuwa akitembea hekaluni, walimwendea wakuu wa makuhani, na waandishi, na wazee,

²⁸wakamwambia, Ni kwa mamlaka gani unatenda mambo haya? Naye ni nani aliyekupa mamlaka hii uyatende haya?

²⁹Yesu akawaambia, Nitawauliza neno moja, nanyi mnijibu, kisha nitawaambia ni kwa mamlaka gani nayatenda haya.

³⁰Ubatizo wa Yohana ulitoka mbinguni, au kwa wanadamu? Nijibuni.

³¹Wakasemezana wao kwa wao, wakisema, Kama tukisema, Ulitoka mbinguni, atasema, Mbona, basi, hamkumwamini?

³²Ila tukisema, Ulitoka kwa wanadamu — waliogopa watu; maana watu wote walimwona Yohana kuwa nabii halisi.

³³Wakamjibu Yesu, wakasema, Hatujui. Yesu akawaambia, Wala mimi siwaambii ninyi ni kwa mamlaka gani nayatenda haya.