Read Swahilli Yobu 37 Bible Online

Yobu 37 - Swahilli bible

Yobu 37

¹Moyo wangu hunitetema kwayo pia, Nao hutoka mahali pake.

²Zisikizeni hizo kelele za sauti yake, Na uvumi utokao kinywani mwake.

³Yeye huituma iende chini ya mbingu zote, Na radi yake hata miisho ya nchi.

⁴Baadaye sauti hunguruma; Yeye hunguruma kwa sauti ya ukuu wake; Hazizuii hapo sauti yake isikiwapo.

⁵Mungu hunguruma kwa kustaajabisha kwa sauti yake; Hufanya mambo makuu, ambayo hatuwezi kuelewa nayo.

⁶Kwani huiambia theluji, Anguka juu ya nchi; Na vivyo manyonyota ya mvua, Na hayo maji ya mvua yake kubwa.

⁷Huufunga mkono wa kila binadamu; Ili watu wote aliowaumba wajue.

⁸Hapo wanyama huingia mafichoni, Na kukaa katika mapango yao.

⁹Dhoruba hutoka katika vyumba vyake; Na baridi ghalani mwake.

¹⁰Barafu huletwa kwa pumzi za Mungu; Na upana wa maji huganda.

¹¹Naam, huyatweka mawingu mazito mzigo wa maji; Hulitandika wingu la umeme wake;

¹²Nalo hugeuzwa huku na huku kwa uongozi wake, Ili yafanye yote atakayoyaagiza Juu ya uso wa dunia hii ikaayo watu;

¹³Kama ni kwa kuonya, au kama ni kwa nchi yake, Au kama ni kwa rehema, ndiye aletaye.

¹⁴Sikiliza neno hili, Ee Ayubu; Simama kimya, uzifikiri kazi za Mungu za ajabu.

¹⁵Je! Wajua wewe jinsi Mungu anavyoziagiza, Na kuumulikisha umeme wa wingu lake?

¹⁶Je! Wajua jinsi mawingu yalivyowekwa sawasawa, Hizo kazi za ajabu za huyo mkamilifu wa maarifa?

¹⁷Jinsi nguo zako zilivyo na moto, Hapo nchi ituliapo kwa sababu ya upepo wa kusini?

¹⁸Je! Waweza kuzitandaza mbingu pamoja naye, Ambazo zina nguvu kama kioo cha kuyeyushwa?

¹⁹Utufundishe ni maneno gani tutakayomwambia; Kwa maana hamwezi kuyatengeza kwa sababu ya giza.

²⁰Je! Aambiwe kwamba nataka kunena? Au mtu angetamani kumezwa?

²¹Na sasa watu hawawezi kuutazama mwanga ung'aao mbinguni; Lakini upepo ukipita huzitakasa.

²²Kaskazini hutokea umemetufu wa dhahabu; Mungu huvikwa ukuu utishao.

²³yeye Mwenyezi hamwezi kumwona; Yeye ni mkuu mwenye uweza; Tena mwenye hukumu, na mwingi wa haki, hataonea.

²⁴Kwa hiyo watu humwogopa; Yeye hawaangalii walio na hekima mioyoni.