Read Swahilli Zaburi 75 Bible Online

Zaburi 75 - Swahilli bible

Zaburi 75

¹Ee Mungu, twakushukuru. Twakushukuru kwa kuwa Jina lako li karibu; Watu huyasimulia matendo yako ya ajabu.

²Nitakapoufikia wakati ulioamriwa, Mimi nitahukumu hukumu za haki.

³Ingawa dunia na wote wakaao humo wataharuki, Mimi mwenyewe nimezisimamisha nguzo zake.

⁴Naliwaambia waliojivuna, Msijivune; Na wasio haki, Msiiinue pembe.

⁵Msiiinue pembe yenu juu, Wala msinene kwa shingo ya kiburi.

⁶Maana siko mashariki wala magharibi, Wala nyikani itokako heshima.

⁷Bali Mungu ndiye ahukumuye; Humdhili huyu na kumwinua huyu.

⁸Maana mkononi mwa Bwana mna kikombe, Na mvinyo yake inatoka povu; Kumejaa machanganyiko; Naye huyamimina. Na sira zake wasio haki wa dunia Watazifyonza na kuzinywa.

⁹Bali mimi nitatangaza matendo yako milele, Nitamwimbia Mungu wa Yakobo.

¹⁰Pembe zote za wasio haki nitazikata, Na pembe za mwenye haki zitainuka.