Read Swahilli Mathayo 22 Bible Online

Mathayo 22 - Swahilli bible

Mathayo 22

¹Yesu akajibu, akawaambia tena kwa mithali, akisema,

²Ufalme wa mbinguni umefanana na mfalme mmoja aliyemfanyia mwanawe arusi.

³Akawatuma watumwa wake wawaite walioalikwa kuja arusini; nao wakakataa kuja.

⁴Akatuma tena watu kwa wengine, akisema, Waambieni wale walioalikwa, Tazameni, nimeandaa karamu yangu; ng'ombe zangu na vinono vimekwisha kuchinjwa, na vyote vimekuwa tayari, njoni arusini.

⁵Lakini hawakujali, wakaenda zao, mmoja shambani kwake, mmoja kwenye biashara yake;

⁶nao waliosalia wakawakamata watumwa wake, wakawatenda jeuri, na kuwaua.

⁷Basi yule mfalme akaghadhibika; akapeleka majeshi yake, akawaangamiza wauaji wale, akauteketeza mji wao.

⁸Kisha akawaambia watumwa wake, Arusi i tayari, lakini wale walioalikwa hawakustahili.

⁹Basi enendeni hata njia panda za barabara, na wote mwaonao waiteni arusini.

¹⁰Watumwa wale wakatoka wakaenda njia kuu, wakakusanya wote waliowaona, waovu kwa wema; arusi ikajaa wageni.

¹¹Lakini alipoingia yule mfalme ili kuwatazama wageni wake, akaona mle mtu mmoja asiyevaa vazi la arusi.

¹²Akamwambia, Rafiki, uliingiaje humu nawe huna vazi la arusi? Naye akatekewa.

¹³Mfalme akawaambia watumishi, Mfungeni mikono na miguu, mchukueni mkamtupe katika giza la nje; ndiko kutakuwako kilio na kusaga meno.

¹⁴Kwa maana waitwao ni wengi, bali wateule ni wachache.

¹⁵Ndipo Mafarisayo wakaenda zao, wakafanya shauri, jinsi ya kumtega kwa maneno.

¹⁶Wakatuma kwake wanafunzi wao pamoja na Maherodi, wakasema, Mwalimu, twajua ya kuwa wewe u mtu wa kweli, na njia ya Mungu waifundisha katika kweli, wala hujali cheo cha mtu awaye yote, kwa maana hutazami sura za watu.

¹⁷Basi utuambie, Waonaje? Ni halali kumpa Kaisari kodi, ama sivyo?

¹⁸Lakini Yesu akaufahamu uovu wao, akasema, Mbona mnanijaribu, enyi wanafiki?

¹⁹Nionyesheni fedha ya kodi. Nao wakamletea dinari.

²⁰Akawaambia, Ni ya nani sanamu hii, na anwani hii?

²¹Wakamwambia, Ni ya Kaisari. Akawaambia, Basi, mlipeni Kaisari yaliyo ya Kaisari, na Mungu yaliyo ya Mungu. Walipokwisha kujua wakasema, Mitano, na samaki wawili.

²²Waliposikia, walistaajabu, wakamwacha, wakaenda zao.

²³Siku ile Masadukayo, watu wasemao ya kwamba hakuna kiyama, wakamwendea, wakamwuliza,

²⁴wakisema, Mwalimu, Musa alisema, Mtu akifa, akiwa hana watoto, ndugu yake na amwoe yule mkewe, ili ampatie nduguye mzao.

²⁵Basi, kwetu kulikuwa na ndugu saba; wa kwanza akaoa, akafariki, na kwa kuwa hana mzao, akamwachia nduguye mke wake.

²⁶Vivyo hivyo wa pili naye, na wa tatu, hata wote saba.

²⁷Mwisho wa wote yule mwanamke akafa naye.

²⁸Basi, katika kiyama, atakuwa mke wa yupi katika wale saba? Maana wote walikuwa naye.

²⁹Yesu akajibu, akawaambia, Mwapotea, kwa kuwa hamyajui maandiko wala uweza wa Mungu.

³⁰Kwa maana katika kiyama hawaoi wala hawaolewi, bali huwa kama malaika mbinguni.

³¹Tena kwa habari ya kiyama ya watu, hamjalisoma neno lililonenwa na Mungu, akisema,

³²Mimi ni Mungu wa Ibrahimu, na Mungu wa Isaka, na Mungu wa Yakobo? Mungu si Mungu wa wafu, bali wa walio hai.

³³Na makutano waliposikia, walishangaa kwa mafunzo yake.

³⁴Na Mafarisayo waliposikia ya kwamba amewafumba kinywa wale Masadukayo, walifanya shauri pamoja.

³⁵Mmoja wao, mwana-sheria, akamwuliza, akimjaribu;

³⁶Mwalimu, katika torati ni amri ipi iliyo kuu?

³⁷Akamwambia, Mpende Bwana Mungu wako kwa moyo wako wote, na kwa roho yako yote, na kwa akili zako zote.

³⁸Hii ndiyo amri iliyo kuu, tena ni ya kwanza.

³⁹Na ya pili yafanana nayo, nayo ni hii, Mpende jirani yako kama nafsi yako.

⁴⁰Katika amri hizi mbili hutegemea torati yote na manabii.

⁴¹Na Mafarisayo walipokusanyika, Yesu aliwauliza, akisema, Mwaonaje katika habari za Kristo?

⁴²Ni mwana wa nani? Wakamwambia, Ni wa Daudi.

⁴³Akawauliza, Imekuwaje basi Daudi katika Roho kumwita Bwana, akisema,

⁴⁴Bwana alimwambia Bwana wangu, Uketi mkono wangu wa kuume, Hata niwawekapo adui zako Kuwa chini ya miguu yako?

⁴⁵Basi, Daudi akimwita Bwana, amekuwaje ni mwanawe?

⁴⁶Wala hakuweza mtu kumjibu neno; wala hakuthubutu mtu ye yote tangu siku ile kumwuliza neno tena.