Read Swahilli 1 Timotheo 2 Bible Online

1 Timotheo 2 - Swahilli bible

1 Timotheo 2

¹Basi, kabla ya mambo yote, nataka dua, na sala, na maombezi, na shukrani, zifanyike kwa ajili ya watu wote;

²kwa ajili ya wafalme na wote wenye mamlaka, tuishi maisha ya utulivu na amani, katika utauwa wote na ustahivu.

³Hili ni zuri, nalo lakubalika mbele za Mungu Mwokozi wetu;

⁴ambaye hutaka watu wote waokolewe, na kupata kujua yaliyo kweli.

⁵Kwa sababu Mungu ni mmoja, na mpatanishi kati ya Mungu na wanadamu ni mmoja, Mwanadamu Kristo Yesu;

⁶ambaye alijitoa mwenyewe kuwa ukombozi kwa ajili ya wote, utakaoshuhudiwa kwa majira yake.

⁷Nami kwa ajili ya huo naliwekwa niwe mhubiri na mtume, (nasema kweli, sisemi uongo), mwalimu wa Mataifa katika imani na kweli.

⁸Basi, nataka wanaume wasalishe kila mahali, huku wakiinua mikono iliyotakata pasipo hasira wala majadiliano.

⁹Vivyo hivyo wanawake na wajipambe kwa mavazi ya kujisitiri, pamoja na adabu nzuri, na moyo wa kiasi; si kwa kusuka nywele, wala kwa dhahabu na lulu, wala kwa nguo za thamani;

¹⁰bali kwa matendo mema, kama iwapasavyo wanawake wanaoukiri uchaji wa Mungu.

¹¹Mwanamke na ajifunze katika utulivu, akitii kwa kila namna.

¹²Simpi mwanamke ruhusa ya kufundisha, wala kumtawala mwanamume, bali awe katika utulivu.

¹³Kwa maana Adamu ndiye aliyeumbwa kwanza, na Hawa baadaye.

¹⁴Wala Adamu hakudanganywa, ila mwanamke alidanganywa kabisa akaingia katika hali ya kukosa.

¹⁵Walakini ataokolewa kwa uzazi wake, kama wakidumu katika imani na upendo na utakaso, pamoja na moyo wa kiasi.