Read TAITA BIBLE – Biblia Ilagho Jiboie Kwa Wandu Wose KUZOYA 11 Bible Online

KUZOYA 11 - TAITA BIBLE – Biblia Ilagho Jiboie Kwa Wandu Wose bible

KUZOYA 11

¹Ngelo iyo, wurumwengu ghose ghorekoghe na kiteto chimweri na lwaka lumweri.

²Hata iji wandu werekoghe wikidamba kufuma chia ra mashariki, wikavika kirindi cha isanga jimu jiwangwagha Shinari, nawo wikakaia aho.

³Wikazerana weni na weni, “Nndokonyi dikabe matofali, dighioche nicha.” Nawo werekoghe na matofali wulalo ghwa magho, na lami wulalo ghwa chokaa.

⁴Nao wikaghamba, “Idana ndedikuaghie muzi na mnara, na wuighu ghwaro ghujoke hata ghuvike mlungunyi, nesi dikubonyere diweni irina, eri disakesaghiswa ii chia na ii chia aighu ndoenyi.”

⁵Niko BWANA ukasea upate kuwona ugho muzi na ugho mnara wadamu wereghuaghieghe.

⁶Nao BWANA ukaghamba, “Olenyi wandu awa ni wandu wamweri, widedagha kiteto chimweri na lwaka lumweri; na uku ni kuzoya tu kwa agha wichaabonya, hata ndewichaalemwa ni kilambo chingi wichaakunda anduangi.

⁷Idana ndedisee diwitasanyire kiteto chawo, eri wisesikirane madedo weni na weni.”

⁸Niko BWANA ukawisaghisa ndoenyi kose kufuma aja, nawo wikasigha kuagha ugho muzi.

⁹Niko huwo muzi ugho ghukawangwa Babeli, angu aho niko BWANA oretasanyireghe kiteto cha wadamu wose, na kufuma aja, ukawifunya wisasarike ndoenyi kose.

¹⁰Ichi nicho kivalwa cha Shemu. Miaka iwi iendasia nyuma ya gharika, iji Shemu orekoghe na miaka ighana, oremvaeghe Arpakishadi.

¹¹Nyuma ya kumva Arpakishadi, Shemu ukakaia miaka maghana masanu, ukava wana wamu wa womi na wa waka.

¹²Iji Arpakishadi orekoghe mundu wa miaka mirongo idadu na misanu, oremvaeghe Shela.

¹³Nyuma ya kumva Shela, Arpakishadi ukakaia miaka maghana ana na idadu, ukava wana wamu wa womi na wa waka.

¹⁴Iji Shela orekoghe mundu wa miaka mirongo idadu, oremvaeghe Eberi.

¹⁵Nyuma ya kumva Eberi, Shela ukakaia miaka maghana ana na idadu, ukava wana wamu wa womi na wa waka.

¹⁶Iji Eberi orekoghe mundu wa miaka mirongo idadu na inya, oremvaeghe Pelegi.

¹⁷Nyuma ya kumva Pelegi, Eberi ukakaia miaka maghana ana na mirongo idadu, ukava wana wamu wa womi na wa waka.

¹⁸Iji Pelegi orekoghe mundu wa miaka mirongo idadu, oremvaeghe Reu.

¹⁹Nyuma ya kumva Reu, Pelegi ukakaia miaka maghana awi na ikenda, ukava wana wamu wa womi na wa waka.

²⁰Iji Reu orekoghe mundu wa miaka mirongo idadu na iwi, oremvaeghe Serugi.

²¹Nyuma ya kumva Serugi, Reu ukakaia miaka maghana awi na mfungade, ukava wana wamu wa womi na wa waka.

²²Iji Serugi orekoghe mundu wa miaka mirongo idadu, oremvaeghe Nahori.

²³Nyuma ya kumva Nahori, Serugi ukakaia miaka maghana awi ukava wana wamu wa womi na wa waka.

²⁴Iji Nahori orekoghe mundu wa miaka mirongo iwi na ikenda, oremvaeghe Tera.

²⁵Nyuma ya kumva Tera, Nahori ukakaia miaka ighana na ikumi na ikenda, ukava wana wamu wa womi na wa waka.

²⁶Iji Tera orekoghe mundu wa miaka mirongo mfungade, orewivaeghe Abramu, Nahori na Harani.

²⁷Ichi nicho kivalwa cha Tera ndee wake Abramu, Nahori na Harani; Harani oremvaeghe Loti.

²⁸Nao Harani ukafwa andu orevailoghe kwa ghuja muzi ghwa Uri ghwa Wakaldayo ndee uko moyo.

²⁹Abramu na Nahori wikalowua. Muka wa Abramu orewangwaghwa Sarai, na muka wa Nahori orewangwaghwa Milka mwai wa Harani uo orekoghe ndee Isaaka.

³⁰Sarai orekoghe kolowi hata nderedimieghe kuva wana anduangi.

³¹Nao Tera ukawuka na mwana wake Abramu na wawae Loti mwana wa Harani na mka-mwanwake Sarai, muka wa Abramu, nawo wikaghendanya cha Kanaani kufuma muzi ghwa Uri ya Wakalidayo, ela iji werevikieghe Harani wikakaia aho.

³²Tera ukafuya isanga ja Harani, mundu wa miaka maghana awi na isanu.