Read TAITA BIBLE – Biblia Ilagho Jiboie Kwa Wandu Wose KUZOYA 12 Bible Online

KUZOYA 12 - TAITA BIBLE – Biblia Ilagho Jiboie Kwa Wandu Wose bible

KUZOYA 12

¹Nao BWANA ukamzera Abramu, “Fuma isanga jako, kusighe kivalwa chako, na muzi ghwa ndeyo, kujighendie isanga nichaakuwonyera.

²Nichakubonya kukaie mbari mbaa, sena nichakurasimia na kujibonya irina jako jikaie ibaa; kupate kuwuya marasimio.

³Nichawirasimia awo wichaakurasimia oho, nani nichawiwasira njowe awo wichaakuwasira njowe; na kwa oho mbari rose ra ndoenyi richarasimilwa.”

⁴Abramu orekoghe mundu wa miaka mirongo mfungade na misanu iji orefumagha Harani karakara na malaghiro gha Mlungu. Na Loti wori ukaghendanya nao.

⁵Abramu ukamdwa mkake Sarai, na Loti mwana wa mruna, mali rose na wadumiki orewipatireghe isanga ja Harani, ukazoya charo cheghenda isanga ja Kanaani. Wiendavika Kanaani,

⁶Abramu ukaida aghadi ya isanga, ukavika andu kuwangwagha Shekemu, kwa mudi ghwa kuela ghwa More. Matuku agho, Wakanaani werekoghe aeni isangenyi.

⁷BWANA ukamchea Abramu ukamzera, “Kivalwa chako nichachineka iji isanga.” Abramu ukamuaghia BWANA madhabahu uo oremfutukieghe.

⁸Kufuma aho ukaghenda hata mghondinyi ghuko mashariki ya Betheli, ukaidunga hema yake aho. Betheli erekoghe cha magharibi, na Ai erekoghe cha mashariki; ukamuaghia BWANA madhabahu aho, ukajiwangia irina ja BWANA.

⁹Abramu ukachuria kughenda cha Negebu.[4]

¹⁰Korekoghe na njala isangenyi, na Abramu ukasea Misri, ukaie aho kwa ngelo; angu njala erekoghe mbaa.

¹¹Nao iji walighisa kungia Misri, Abramu ukamzera mkake Sarai, “Kumanye oho ko muka kughokie na ndighi,

¹²na Wamisri wikakuwona wichaghesha kukaia oho ko mkwapo, nawo wichanibwagha na kukusigha oho kukaie moyo.

¹³Idana kuwizere angu ne mwanyinyu, eri maza ripate kunighendia nicha, na irangi japo jikie kwa wundu ghwako.”

¹⁴Hata iji wangia Misri, awo Wamisri wikammbona uo muka kukaia waghokie na ndighi.

¹⁵Na wabaa wa isanga wikamghoria mzuri seji uo muka ughokie, na uo muka ukadwalwa na kughenjwa nyumbenyi kwa mzuri.

¹⁶Mzuri ukam'bonyera nicha Abramu kwa wundu ghwa uo muka, na Abramu ukapata ng'ondi, ng'ombe, punda, wazumba wa womi na wa waka, na ngamila.

¹⁷Ela BWANA ukamkaba mzuri na nyumba yake yose kwa makongo ghizamie kwa wundu ghwa Sarai mkake Abramu.

¹⁸Nao mzuri ukammbanga Abramu ukamzera, “Kwanibonya wada huwu? Kwaki kuserenighoriagha kukaia uo ni muka wako?

¹⁹Kwaki koreghoragha wei ni mwanyinyu; kukanishekeria ngammbusa ukaie muka wapo? Idana muka wako hoyo, mmbwade mfume noko.”

²⁰Niko mzuri ukawilaghira wandu wake wimfunye Abramu ughende noko na vilambo vake vose.