Read TAITA BIBLE – Biblia Ilagho Jiboie Kwa Wandu Wose KUZOYA 14 Bible Online

KUZOYA 14 - TAITA BIBLE – Biblia Ilagho Jiboie Kwa Wandu Wose bible

KUZOYA 14

¹Matuku agho, wazuri bana: Amrafeli mzuri wa Shinari, Arioko mzuri wa Elasa, Kedorlaoma mzuri wa Elamu, na Tidali mzuri wa Goiimu,

²wikabonya wuda na Bera mzuri wa Sodoma, Biraha mzuri wa Gomora, Shinabu mzuri wa Adma, Shemeberi mzuri wa Zeboiimu, na mzuri wa Bela (nigho Soari).

³Awa wazuri wasanu wikawadana na kukwanya majeshi andenyi ya vololo ya Sidimu (niyo bahari ya chumbi).

⁴Werekoghe wamdumikia mzuri wa Kedorlaoma kwa miaka ikumi na iwi, ela mwaka ghwa ikumi na idadu wikamlegha.

⁵Mwaka ghwa ikumi na inya, Kedorlaoma na wazuri wose werekwanyeghe nao, wikawikaba Warefai aja Ashterothi Kanaimu, na Wazuzi aja Hamu, na Waemi aja Shawe wurindi ghwa Kiriathaimu,

⁶na Wahori aja mighondinyi kwawo Seiri, hata Elparani iko mwano na kireti.

⁷Konyuma wikaghaluka na kuwuya wikavika En-mishipati nigho Kadeshi, wikajikaba isanga jose ja Waamaleki na Waamori werekoghe wikikaia Hazazoni-tamari, wikawisima.

⁸Awo wazuri wasanu, wa Sodoma, Gomora, Adma, Zeboiimu, na Bela (nigho Soari), wikafuma

⁹wilo na awo wazuri bana; Kedorlaoma mzuri wa Elamu, Tidali mzuri wa Goiimu, Amrafeli mzuri wa Shinari, na Arioko mzuri wa Elasa.

¹⁰Ela ija vololo ya Sidimu erekoghe ichulo ni vina va lami. Hata iji majeshi gha Sodoma na Gomora gherekoghe ghikikimbia, wamu wikachunukia andenyi ya ivo vina, na awo weresigharikieghe wikakimbia cha mghondinyi.

¹¹Wamaiza wikawusa vilambo vose va Sodoma na Gomora, na vindo vawo vose wikaghenda chia rawo.

¹²Wikamdwa Loti, uja mwana wa mruna Abramu uhu orekoghe ukikaia Sodoma, wikaduka vilambo vake vose wikaghenda.

¹³Niko aho mndumu orefufunukieghe ukacha ukamghoria Abramu Muebrania, uo orekoghe ukikaia kaavui na midi ya kuela ya Mamre Muamori mruna Eshkoli na Aneri, nawo niwo werewadaneghe na Abramu.

¹⁴Nao iji Abramu wasikira angu mwana wa mruna wadwalwa wunyika, ukawilongoza wandu wa irika wivalo nyumbenyi kwake, wandu maghana adadu ikumi na wunyanya wifundishiro wuda, ukawinugha wamaiza hata Dani.

¹⁵Aho ukawaghanya wandu wake nakio, ukawingiria, ukawikaba na kuwisima, ukawiwinga hata Hoba kaskazinyi ya Dameshki.

¹⁶Ukawunja vilambo vose, na Loti mwana na mruna andwamweri na vilambo vake vose, waka na wandu.

¹⁷Nao iji Abramu orekoghe ukiwuya, nyuma ya kumsima Kedorlaoma andwamweri na wazuri waja orekwanyeghe nawo, mzuri wa Sodoma ukafuma kummara aja vololo ya Shawe (niyo Vololo ya Mzuri).

¹⁸Na Melkizedeki mzuri wa Salemu ukamredia mkate na divei, nao orekoghe ni Mkohani wa Mlungu-Uko-Aighu-Nandighi.

¹⁹Nao ukamrasimia Abramu ukaghamba, “Mlungu Uo-Uko-Aighu-Nandighi, uo oreumbieghe mlungunyi na ndoenyi, ndemrasimie Abramu.

²⁰Mlungu ndekaso Uo-Uko-Aighu-Nandighi, uo orekunekieghe wusimi kwa wamaiza wako.” Nao Abramu ukamneka ifungu ja ikumi ja ivo vose orekoghe navo.

²¹Nao mzuri wa Sodoma ukamzera Abramu, “Wusa vilambo vose putu ela kuniwunjire wandu wapo weni.”

²²Ela Abramu ukamzera mzuri wa Sodoma, “Naghema kwa BWANA MLUNGU Uo-Uko-Aighu-Nandighi, muumbi mlungunyi na ndoenyi,

²³angu sichaawusa hata uzi, angu kamba ya chadu, angu chingi chose chiko chako; kusecheghora wei, ‘Namfughisha Abramu.’

²⁴Sichaawusa kindo chingi, na mawaghio gha awo wandu wereghendanyeghe nani, awo Aneri, Eshkoli, na Mamre; awo ndewiwuse mawaghio ghawo.”