Read TAITA BIBLE – Biblia Ilagho Jiboie Kwa Wandu Wose KUZOYA 15 Bible Online

KUZOYA 15 - TAITA BIBLE – Biblia Ilagho Jiboie Kwa Wandu Wose bible

KUZOYA 15

¹Nyuma ya maza iro, BWANA ukamchea Abramu kwa mawono ukamzera, “Kusakeobua Abramu, ini nuo ngao yako, na ifungu jako jichakaia ibaa na ndighi.”

²Ela Abramu ukaghamba, “Ee BWANA Mlungu, kuninekaki, nani siwadie wana; mundu oja ifwa japo ni uhu Eliezeri Mdamasko?”

³Abramu ukachuria kughora, “Zighana oho ndekuninekie kivalwa, na mzumba uvalo nyumbenyi kwapo nuo uchaaja ifwa japo.”

⁴BWANA ukamchea sena ukighamba, “Uhu mundu suo ungi uchaaja ifwa jako, ela mwana wako tiki nuo uchaaja ifwa jako.”

⁵BWANA ukamfunya shighadi ukamzera, “Zighana cha mlungunyi kuwone ngera kwadima kuritala nyerinyeri.” Nao ukaghamba, “Huwu niko kivalwa chako chichaakaia.”

⁶Abramu ukamrumiria BWANA, na kwa irumirio ijo, ukatalwa kukaia na hachi.

⁷Nao BWANA ukamzera, “Ini ne BWANA uo ukuredie kufuma muzi ghwa Uri ya Wakalidayo eri nikuneke isanga iji jikaie jako.”

⁸Ela Abramu ukaghamba, “Nichamanya wada ee BWANA angu isanga iji jichakaia japo?”

⁹Nao ukamzera, “Niredie tagho ya ng'ombe, subeni, na bauru, rose ra miaka idadu, chiaimweri na mbughi na tagho ya iringo.”

¹⁰Nao Abramu ukamredia iro nyamandu rose ukaribara vibelele viwi viwi kula imu, na kuviwika vilangayane zaria-zaria, ela nyonyi ndereribarieghe anduangi.

¹¹Hata iji nderi rerekoghe rikiseria iro nyama, Abramu ukakaia ukiriwinga.

¹²Nao ikakaia iji iruwa jerekoghe jikineng'ena Abramu ukawadwa ni dilo nyingi, na kira kibaa cheobosha chikamseria.

¹³Niko BWANA ukamzera Abramu, “Kumanye loli kivalwa chako chichakaia waghenyi isanga jiseko jawo, wichakaia wazumba aho, nawo wichakorongwa miaka maghana ana.

¹⁴Ela nichaitanya iyo mbari wichaaidumikia; konyuma wikakafuma wichadwa mali nyingi.

¹⁵Na oho kuchakaia kughosie nicha; kufo, kuriko, na kughenda kwa weke ndeyo kwa sere.

¹⁶Kivalwa chako cha kana chichawuya aha, angu wuwiwi ghwa Waamori ndeghukate ghokabwa anduangi.”

¹⁷Nao iruwa jiendaneng'ena na kira kungia, chikawoneka chombo chifukiagha mosi, na lumu lwa modo, vikaidiria aghadi ya rija nyama.

¹⁸Ituku ijo BWANA ukabonya ilaghano na Abramu ukighamba, “Kivalwa chako nachineka isanga iji, kufuma Moda ghwa Misri hata moda ghuja m'baa ghwa Eufrate,

¹⁹isanga ja Mkeni na Mkenisi, Mkadimoni

²⁰na Mhiti, Mperizi na Mrefai,

²¹Muamori na Mkanaani, Mgirigashi na Mjebusi.”