Read TAITA BIBLE – Biblia Ilagho Jiboie Kwa Wandu Wose KUZOYA 18 Bible Online

KUZOYA 18 - TAITA BIBLE – Biblia Ilagho Jiboie Kwa Wandu Wose bible

KUZOYA 18

¹Nao BWANA ukamfutukia Abrahamu aja midinyi ya kuela ya Mamre, uko kidombo mnyangonyi ghwa hema yake, ngelo ya mruke ghwa dime ghadi.

²Abrahamu ukawusira meso ghake ukazighana, ukawona wandu wadadu wiko kimusi imbiri kwake. Hata iji wawiwona ukafuma hemenyi kwake na iseghe ukawimara, ukawighoghomia hata andoenyi ukaghamba,

³“Bwana wapo, ikakaia nawuyarumirikia mesonyi kwako, kusakeniida mdumiki wako.

⁴Kadunyi mredelo machi mwoghoshe maghu ghenyu, mhore katini aisi ya mudi,

⁵nani nim'boisire vindo vitini muje mhoreshe, angu hoku mwamchea mdumiki onyu; niko nyuma ya kuja muide.” Wikaghamba, “Bonya sa iji koni kwaghamba.”

⁶Abrahamu ukaghenda shwa-shwa cha hemenyi kwa Sara ukamzera, “Bonya shwa vipimo vidadu va mufu ghuboie, kuboise mikate.”

⁷Abrahamu ukaghenda shwa-shwa cha chaghenyi, ukaiwada ngache iboie ukamneka mdumiki nao ukaiboisa shwa wori.

⁸Ukawusa siagi na mariwa na ija nyama ereboisiroghe, ukaviwika imbiri kwawo; nao moni ukakaia kimusi mudinyi wikija.

⁹Nao wikamkotia, “Mkako Sara oko hao?” Ukawitumbulia, “Oko hemenyi.”

¹⁰BWANA ukamzera, “Kwa loli kimu sa ichi nichakuwuria na mkako Sara uchakuvaia mwana wa womi.”

¹¹Na Sara orekoghe na nyuma yake mnyangonyi ghwa hema ukisikiria.

¹²Aho Sara ukaseka ngolonyi kwake ukaghamba, “Loli niko mkeku huwu, na mumi wapo wakaia mghosi m'baa, nadima kuboilwa?”

¹³Nao BWANA ukamzera Abrahamu, “Kwaki Sara waseka ukighamba, ‘Loli nadima kuva mwana ini niko mkeku huwu?’

¹⁴Welee, jeko ilagho jingi jikurie jisedimikagha kwa BWANA? Nichakuwuria kwa ngelo iwikilo kimu sa ichi, na Sara uchakuvaia mwana wa womi.”

¹⁵Ela Sara ukakana ukaghamba, “Sisekie kungi.” Angu oreobueghe. BWANA ukamzera, “Hai, kwaseka to.”

¹⁶Nao waja wandu wikazoya charo kulangaya cha Sodoma, na Abrahamu ukafumanya nawo ukiwifumira.

¹⁷BWANA ukaghamba, “Nimvisiraki Abrahamu ilagho nichaajibonya,

¹⁸ikakaia Abrahamu uchakaia mbari mbaa, iwadie ndighi na mbari rose ra ndoenyi rirasimilo kwa wundu ghwake?

¹⁹Hata, nameria kumsaghua uo, upate kuwifundisha wana wake, na wose wa nyumbenyi kwake, kubonya agho ghiko gha loli na gha hachi; nani nipate kumkatishira Abrahamu ilaghano japo.”

²⁰Niko BWANA ukaghamba, “Kwa kukaia kililo cha Sodoma na Gomora chakaia kibaa, na kaung'a yawo yakaia mbaa na ndighi,

²¹nichasea niwone ngera agho wawuyaghibonya ni karakara na ichi kililo chawuyanivikia, na ikakaia si huwo kungi, sena nichamanya.”

²²Niko aho waja wandu wikaghaluka na kughenda cha Sodoma; ela Abrahamu ukasigharikanya na BWANA.

²³Nao Abrahamu ukasoghoda kaavui na BWANA ukaghamba “Welee, kuchawitotesha wahachi andwamweri na wawiwi anguwada?

²⁴Ngera wakaia wandu mirongo misanu andenyi ya muzi wiko na hachi, kuchakutotesha andu aho, hata kulemo ni kukusigha kwa wundu ghwa awo wahachi mirongo misanu anguwada?

²⁵Ai! BWANA wapo kusebonye ilagho iji jebwagha wahachi chiaimweri na wawiwi, hata mhachi usakefwananishwa na mmbiwi; ilagho ijo jisebonyeke kwako. Welee, ndeifwane Mtanyi wa wurumwengu ghose kubonya agho ghiko gha hachi anguwada?”

²⁶Nao BWANA ukaghamba, “Ngawikua wandu mirongo misanu Sodoma wiko wahachi, nichaghuleka muzi ghose kwa wundu ghwawo.”

²⁷Abrahamu ukaghamba, “Nifuye wughoma nidedanye na oho BWANA ini nisefwane kindo chingi, ela ne teri na maivu gheni.

²⁸Welee, wikapungua wasanu kwa awo mirongo misanu wahachi, kuchaghutotesha ugho muzi ghose kwa wundu ghwa awo wasanu wapungua?” Nao ukaghamba, “Iji nawikua mirongo ina na wasanu sichaaghutotesha anduangi.”

²⁹Nao ukakotia sena, “Kukawikua mirongo ina ikaia wada?” Nao ukaghamba, “Kwa wundu ghwa awo mirongo ina sichaatotesha kungi.”

³⁰Abrahamu ukaghamba, “Nakuvoya kusezamilo BWANA, leka nidede. Welee, kukawikua mirongo idadu ikaia wada?” Nao ukatumbulia, “Kwa wundu ghwa mirongo idadu sichaaghutotesha anduangi.”

³¹Abrahamu ukaghamba, “Nifuye wughoma nidedanye na oho BWANA. Welee, kukawikua mirongo iwi ikaia wada?” Nao ukatumbulia, “Kwa wundu ghwa mirongo iwi sichaaghutotesha anduangi.”

³²Abrahamu ukaghamba, “Kusejoko ni machu BWANA, nichadeda iji indo jimweri tu. Kukawikua ikumi uko ni wada?” Nao ukaghamba, “Kwa wundu ghwa ikumi sichaatotesha anduangi.”

³³Nao BWANA ukaghenda chia yake nyuma ya kudedanya na Abrahamu, na wokoni Abrahamu ukawuya cha kwake.