Read TAITA BIBLE – Biblia Ilagho Jiboie Kwa Wandu Wose KUZOYA 19 Bible Online

KUZOYA 19 - TAITA BIBLE – Biblia Ilagho Jiboie Kwa Wandu Wose bible

KUZOYA 19

¹Nao weke malaika wawi wikacha Sodoma luma lwa kenyi; na Loti orekoghe kidombo mbengenyi. Hata iji Loti wawiwona ukawuka kuwimara, nao ukawighoghomia hata wushu ghwake ghukadunga andonyi ukaghamba,

²“Weke bwana wapo, ghalukenyi namvoya mungie nyumbenyi kwapo ini mdumiki onyu, mlale aho, muoghoshe maghu ghenyu, nao mmbuke nakesho mghende chia yenyu.” Wikaghamba, “Hata, isi dichalala ahaeni chienyi.”

³Ela ukawishingira kwa kufunga ndighi wighaluke wingie nyumbenyi kwake. Nawo wikaghaluka na kungia nyumbenyi, ukawibonyera karamu ya mikate isewadie chachu, nawo wikaja.

⁴Ela imbiri wiselale, wandu wose putu wa muzi ghwa Sodoma wabaa kwa watini, wikacha na kuimara nyumba;

⁵wikamkotia Loti, “Waja wandu wingirieghe kwako luma lwa kenyi weko hao? Wifunye diwimanye.”

⁶Loti ukafuma shighadi ukarugha mnyango nyuma yake ukawizera,

⁷“Namvoya wanedu msakebonya wuwiwi ghungi,

⁸Olenyi neko na wai wawi jingi wisemmanyire mndwawomi ungi, lekenyi nimfunyire awo wai, muwibonye seji mkunde, ela awa wandu msewibonyere kiwiwi chingi, kwa kukaia ni waghenyi wapo, nani suti niwilindie.”

⁹Ela awo wikaghamba, “Injika noko!” Wikazerana, “Mundu uhu odecha kodu sa mghenyi, nao idana nuo ukunde kutanya malagho. Idana isi dichakubonya kiwiwi kuchumba awo wandu.” Niko wikamsindika na ndighi uo Loti hata wikavika kaavui wighuchikanye mnyango.

¹⁰Ela awo waghenyi wikaghorua mikonu na kumngira Loti nyumbenyi, wikaghurugha mnyango.

¹¹Nawo wikawikaba na kira cha meso wandu wose werekoghe mnyangonyi wabaa na watini; wikaja wasi loli-loli wikighulola mnyango.

¹²Nao waja wandu wikamzera Loti, “Koko na mndungi wako aha? Waghosi wako, wana wako wa womi na wa waka, angu mndungi wako kuko nao andenyi ya muzi ughu? Wifunye;

¹³kwa kukaia dichakutotesha andu aha, angu kililo aighu ya wandu waro chakaia kibaa imbiri ya BWANA, nao wadiduma dikutoteshe.”

¹⁴Niko Loti ukafuma na kuwighendia waghosi wake awa werewilowugha wai wake ukawizera, “Wukenyi mfume aha angu BWANA oko kaavui kughutotesha muzi ughu.” Ela madedo ghake ghikawoneka kukaia gha wukelu kwa waghosi wake.

¹⁵Iji ndoe yavika kuela, waja weke malaika wikamzera Loti, “Wuka kummbwade muka wako, na wai wako wawi, mfume msechetoteshwanya na ughu muzi.”

¹⁶Ela orekoghe ukikuwada-wada. Waja wandu wikammbwada Loti, mkake na wai wake wawi, na kummbika shighadi ya muzi angu BWANA oremfuyeghe wughoma.

¹⁷Iji wameria kumfunya shighadi wikamzera, “Kimbienyi mkire marangi ghenyu, msezighane na nyuma, hata msemange andu kungi vololonyi; kimbirienyi mghondinyi msechetota.”

¹⁸Nao Loti ukaghamba, “Ai, weke bwana wapo, huwo mbai.

¹⁹Hoku ini mdumiki onyu narumirikia mesonyi konyu, nenyo seji mwawadwa ni wughoma ghwapo na ndighi, mwakira irangi japo; ela sidimagha kukimbia nivike mighondinyi nisepatiro ni icho kiwiwi na kufwa.

²⁰Ola muzi hoghuja kimonu ghuko kaavui nidimagha nighukimbirie. Nilekenyi nikimbirie aho, si mtinieri ugho? Nani nichakira irangi japo.”

²¹Nao ukamzera, “Na iji wori nakurumiria, nani sichaaghutotesha ugho muzi mtini kwaghamba.

²²Shashira kukimbirie aho, angu sichaabonya ilagho jingi hata kwavika aho.” Kwa huwo muzi ugho ghorewangiloghe Soari.

²³Iruwa jerekoghe jajoka iji Loti orevikieghe Soari.

²⁴Nao BWANA ukanyesha aighu ya Sodoma na Gomora kibiriti na modo ghubirie kufuma mlungunyi,

²⁵ukaighusha mizi yose, na vololo yose, na wandu wose werekoghe wikikaia andenyi yaro, andwamweri na icho chose cherebukieghe andoenyi chikanoneka.

²⁶Ela mka Loti ukazighana na nyuma, nao ukawuya nguro ya chumbi.

²⁷Abrahamu ukawuka nakesho ukaghenda andu aho werekaieghe kimusi na BWANA,

²⁸ukazighana cha Sodoma na Gomora na isanga jose jerekoghe vololonyi, nao ola ukawona mosi ghukijoka mlungunyi kufuma ndoenyi sa ghwa iwiwi ibaa.

²⁹Iji Mlungu orekoghe ukiitotesha ija mizi erekoghe vololonyi, oremkumbukieghe Abrahamu, nao ukamkira Loti uo orekoghe ukikaia aho, usetotanye na awo weretotesheroghe.

³⁰Nao Loti ukajoka kufuma Soari, ukakaia mighondinyi andwamweri na wai wake wawi, angu oreobueghe kukaia Soari, ukakaia mbangenyi andwamweri na wai wake wawi.

³¹Nao uja mwai m'baa ukamzera uja mtini, “Aba waghosia, na aha ndekuwadie mndwawomi ungi okanya nesi karakara na seji dibonyagha ndoenyi.

³²Nndoko dimnyoshe aba divei uwongie, dipate kulala nao eri dipate kivalwa kwake.”

³³Wikamnyosha ndee divei ukawongia, na chija kio uja mwai m'baa ukangia kwa ndee ukalala nao, na ndee nderemanyireghe ukilala hata ukiwuka anduangi.

³⁴Ituku ja kawi uja mwai m'baa ukamzera uja mtini, “Ola nalale na aba ikwau; ndedimnyoshe divei sena ichi kio, na oho kungie kulale nao, nesi dikupatire kivalwa kwa aba.”

³⁵Wikamnyosha ndee divei sena chija kio, na uja mwai mtini wori ukangia kwa ndee, ukalala nao, na ndee nderemanyireghe ukilala hata ukiwuka anduangi.

³⁶Niko huwu wai wose wa Loti werepatireghe wana na ndee.

³⁷Uja wa imbiri ukapata mwana ukammbanga Moabu, nuo ndee Wamoabu hata linu.

³⁸Nao uja mtini ukava mwana ukammbanga Benami, nuo ndee Waamoni hata linu.