Read TAITA BIBLE – Biblia Ilagho Jiboie Kwa Wandu Wose KUZOYA 21 Bible Online

KUZOYA 21 - TAITA BIBLE – Biblia Ilagho Jiboie Kwa Wandu Wose bible

KUZOYA 21

¹BWANA ukamchea Sara sa iji koni oreghorieghe, na kum'bonyera Sara sa iji koni orelaghirieghe.

²Nao Sara ukapata kifu, ukamvaia Abrahamu mwana wa womi ngelo ya wughosi ghwake, kwa kimu chija cheni cherelaghiriloghe ni Mlungu.

³Abrahamu ukammbanga mwana wake Isaaka uo Sara oremvaieghe;

⁴ukamshamisha ituku ja wunyanya, sa iji koni Mlungu oremlaghirieghe.

⁵Abrahamu orekoghe mundu wa miaka ighana jimweri iji Isaaka orevaloghe.

⁶Nao Sara ukaghamba, “Mlungu wanibonyera iseko, kula mundu uchaasikira uchaseka andwamweri nani.”

⁷Nao ukachuria kughora, “Ni ani oredimagha kumzera Abrahamu wei Sara uchaongosha wana? Na sena hoku namvaia mwana wa womi ngelo ya wughosi ghwake.”

⁸Mwana ukazoghua hata ituku jesighishwa mariwa, Abrahamu ukabonya karamu mbaa.

⁹Nao Sara ukammbona mwana wa Hagari uja Mmisri oremvaieghe Abrahamu ukisarigha na mwana wake Isaaka.

¹⁰Ukamzera Abrahamu, “Mmbinge noko uhu muka mzumba na mwana wake, kwa kukaia mwana wa muka mzumba ndechaawagha ifwa jingi andwamweri na mwana wapo Isaaka anduangi.”

¹¹Ela ilagho ijo jikamzamia na ndighi Abrahamu, kwa wundu ghwa mwana wake Ishmaeli.

¹²Nao Mlungu ukamzera Abrahamu, “Kusakezamilwa kwa wundu ghwa mwana na uo muka wako mzumba. Ijo jose Sara uchaakuzera kujibonye, bonya wokoni; angu kivalwa chako chichawangwa kwa Isaaka.

¹³Na uja mwana wa muka mzumba nicham'bonya ukaie mbari, angu nao moni wori ni mwana wako.”

¹⁴Abrahamu ukawuka nakesho kio, ukawusa mkate na kiriba cha machi ukamneka Hagari ukichiwikiria maweghenyi kwake, andwamweri na mwana wake, ukammbinga wighende. Hagari ukaghenda, ukazoya kumara-mara andenyi ya kireti cha Beer-sheba.

¹⁵Hata iji machi ghameria kusia, ukamsigha mwana a kisachinyi.

¹⁶Nao moni ukaghenda na kusea kidombo kakula sa wukula ghwa kukumba iwanu, angu oreghambieghe, “Sikunde kuwona mwana ukifwa.” Nao iji orekoghe kidombo kulengana nao, uo mwana ukazoya kulila.

¹⁷Mlungu ukachisikira kililo cha mwana, na malaika wa Mlungu ukammbanga Hagari kufuma mlungunyi ukighamba, “Niki chikujishagha wasi Hagari? Kusakeobua angu Mlungu wameria kusikira kililo cha mwana andu uko.

¹⁸Wuka kummbusire mwana kummbwadie mikonunyi kwako, angu nicham'bonya uo ukaie mbari mbaa.”

¹⁹Nao Mlungu ukaghitambua meso ghake, ukawona kiriwa cha machi ukaghenda ukachichura kiriba chake, ukamnyosha mwana.

²⁰Mlungu ukakaia andwamweri na uo mwana, ukazoghua ukikaia kireti; nao ukawuya ing'oni jekumba ndana.

²¹Ukakaia kireti cha Parani, na mae ukamlowora muka kufuma isanga ja Misri.

²²Ngelo iyo, Abimeleki na Fikoli, m'baa wa majeshi ghake, wikamzera Abrahamu, “Mlungu oko andwamweri na oho kwa maza rose kuribonyagha;

²³kwa wundu ughu, nakulomba kunighemie imbiri ya Mlungu kukaia ndekuchaanibonyera wukalo ghungi ini, wana wapo, na kivalwa chapo chose; ela sa iji ini nerekoghe mloli kwako, na oho kunibonyere wokoni, hata na iji isanga kwawuyajikaia wori.”

²⁴Nao Abrahamu ukaghamba, “Nichaghema.”

²⁵Hata iji Abrahamu oremlalamikieghe Abimeleki kwa wundu ghwa kiriwa cha machi oresokeloghe ni wadumiki wake,

²⁶Abimeleki ukaghamba, “Ini simanyire mundu ubonyere ilagho ijo, hata na oho wori ndekunighorie anduangi, ijo ilagho naajisikira linu koni.”

²⁷Nao Abrahamu ukamneka Abimeleki ng'ondi na ng'ombe, nawo waja wawi wikabonya mapatano.

²⁸Abrahamu ukasaghua wana wa ng'ondi mfungade, ukawiwika kula na wambao.

²⁹Abimeleki ukamkotia Abrahamu, “Awa wana wa ng'ondi mfungade kwawitanya na wambao kutambua kwaro niki?”

³⁰Nao ukamtumbulia, “Awa wana wa ng'ondi mfungade kuawiwusa ghukaie wushuhuda angu ni ini moni nerechikotereghe ichi kiriwa.”

³¹Niko andu aho kukawangwa Beer-sheba, angu aho niko wose wawi werebonyereghe mapatano kwa ighemi.

³²Nao wikabonya mapatano aja Beer-sheba, na Abimeleki andwamweri na Fikoli, m'baa wa majeshi ghake, wikawuka na kuwuya cha isanga ja Wafilisti.

³³Abrahamu ukawa mkwachu aho Beer-sheba, ukamtasa BWANA Mlungu wa kala na kala.

³⁴Abrahamu ukakaia luma isanga ja Wafilisti.