Read TAITA BIBLE – Biblia Ilagho Jiboie Kwa Wandu Wose KUZOYA 27 Bible Online

KUZOYA 27 - TAITA BIBLE – Biblia Ilagho Jiboie Kwa Wandu Wose bible

KUZOYA 27

¹Nao iji Isaaka waghosia na meso ghake kusera kira usedimagha kuwona, ukammbanga Esau mwana wake m'baa ukamzera, “Mwanwapo!” Nao ukadika, “Neko aha.”

²Ukamzera, “Ola ini naghosia, na ituku ja kifwa chapo sijimanyagha.

³Idana wada maswagha ghako, zaka yako na ndana yako, kughende kunidiwie nyamandu iboie.

⁴Nao kuniboisire vindo visingie seji nivikundagha, kuniredie nije nikurasimie imbiri nisefue.”

⁵Rebeka orekoghe ukisikiria ija ngelo Isaaka orededanyagha na mwana wake Esau. Nao iji Esau wafuma kughenda kudiwenyi, ughirede agho madiwo,

⁶Rebeka ukamzera mwana wake Jakobo, “Nasikira ndeyo ukidedanya na mwanyinyu Esau huwu:

⁷‘Kunidiwie nyamandu, kuniboisire vindo visingie, nipate kuja nani nikurasimie imbiri ya BWANA, nisefue.’

⁸Idana mwanwapo sikira seji nikulaghiragha, nao kubonye woruwo.

⁹Ghenda chaghenyi, kuniredie wana wa mburi wawi, nipate kum'boisira ndeyo vindo visingie sa iji koni uvikundagha,

¹⁰na oho kuchamghenjera uje, upate kukurasimia imbiri usefue.”

¹¹Ela Jakobo ukamzera mae, “Kumanye mwanidu Esau ni mundu uko na mafuri, na ini nadendere.

¹²Kewada aba uchaniadada na kunimanya angu naawuyamkalia, nani nichapatwa ni njowe wulalo ghwa irasimio.”

¹³Mae ukamzera, “Iyo njowe ndeikaie aighu yapo mwanwapo; oho sikira malagho ghapo tu, kughende kuniredie awo wana wa mburi wawi.”

¹⁴Jakobo ukaghenda ukawiwada wana wa mburi wawi, ukamredia mae, na mae ukaboisa vindo visingie sa iji koni ndee uvikundagha.

¹⁵Niko Rebeka ukawusa nguwo riboie ra Esau mwana wake m'baa, iro orekoghe naro nyumbenyi, ukamrusha Jakobo mwana wake mtini.

¹⁶Wokoni ukamrusha mirongo ya awo wana wa mburi, ukaikanda mikonunyi kwake na andu kudendere singonyi kwake.

¹⁷Niko aho ukamneka mwana wake Jakobo ivo vindo visingie chiaimweri na mkate oreghuboisireghe.

¹⁸Nao Jakobo ukaghenda kwa ndee ukamzera, “Aba!” Nao ukadika, “Neko aha; oho nani mwanwapo?”

¹⁹Jakobo ukamzera ndee, “Ini ne Esau mwana wako wa imbiri. Nabonya sa iji koni kunizerieghe, idana wuka kuje madiwo ghapo eri kunirasimie.”

²⁰Ela Isaaka ukamzera mwana wake, “Yakaia wada kwaipata nyamandu shwa-shwa huwu mwanwapo.” Nao ukatumbulia, “Ni kwa kukaia BWANA Mlungu wako wanidimisha kupata.”

²¹Nao Isaaka ukamzera Jakobo, “Soghoda aha nikuadade mwanwapo, nimanye ngera loli koko mwanwapo Esau angu ngera ni tee.”

²²Jakobo ukasoghoda kaavui na ndee, nao ukamuadada ukaghamba, “Lwaka ni lwaka lwa Jakobo, ela mikonu ni mikonu ya Esau.”

²³Nao nderedimieghe kumtambua anduangi, kwa kukaia mikonu yake erekoghe na mafuri sa ya mruna Esau. Nao ukakunda kumrasimia;

²⁴ela ukamkotia sena, “Loli ko mwanwapo Esau?” Nao ukatumbulia, “Ni ini moni.”

²⁵Isaaka ukaghamba, “Niredie nipate kuja madiwo ghako mwanwapo, nikurasimie.” Ukamredia vindo ukaja, ukamredia na divei ukanywa.

²⁶Niko ndee Isaaka ukamzera, “Soghoda kaavui kunisusughe mwanwapo.”

²⁷Ukasoghoda ukamsusugha; na ndee ukanukilwa ni irumba ja nguwo rake, ukamrasimia ukighamba: “Ola irumba ja mwanwapo, ni karakara na irumba ja mbuwa iyo BWANA oreirasimieghe!

²⁸Mlungu ndekuneke gha mami gha mlungunyi, na gha manori gha ndoenyi, na wungi ghwa viro na divei.

²⁹Wandu ndewikudumikie, na mbari nderikughoghomie. Kukaie bwana aighu ya wanyinyu, na wana wa mayo ndewikughoghomie. Uo ose uchakuwasira njowe ndewado ni njowe; na uo ose uchaakurasimia oho, nderasimilo.”

³⁰Hata iji Isaaka wameria kumrasimia Jakobo, na Jakobo ukifuma kwa ndee woruwu, Esau mruna Jakobo ukangia kufuma kudiwenyi kwake.

³¹Nao moni ukaboisa vindo visingie, ukamghenjera ndee ukighamba, “Aba, wuka kuje madiwo gha ini mwana wako kunirasimie.”

³²Nao ndee Isaaka ukamkotia, “Nani oho?” Ukatumbulia, “Ni ini mwana wako, mwana wako wa imbiri Esau.”

³³Nao Isaaka ukasughusika nandighi ukaghamba, “Welee, nani uo waghenda ukadiwa nao ukaniredia madiwo, na ini ngaja putu imbiri oho kusechee, ngamrasimia? Ee, nao loli ucharasimilwa.”

³⁴Esau uendasikira malagho gha ndee, ukalila kwa luwawo lubaa na ndighi, ukamzera ndee, “Nirasimie ini na ini wori ee aba!”

³⁵Ela ndee ukamzera, “Mwanyinyu wacha aha kwa mikalo, nao wawusa irasimio jako.”

³⁶Esau ukaghamba, “Ado loli ukawangwa Jakobo si hachi! Iji ni indo ja kawi Jakobo ukinikalia; ja imbiri oonisoka hachi ya kuvalwa kwapo kwa imbiri, nao ola hoku sena wanisoka irasimio japo.” Nao ukamkotia ndee, “Ndekunisighie irasimio jingi aba?”

³⁷Isaaka ukamtumbulia Esau, “Ola nam'bonya ukaie bwana wako, na waruna wose nawibonya wikaie wadumiki wake, nani namneka viro na divei. Idana nikubonyereki mwanwapo?”

³⁸Nao Esau ukamzera ndee, “Wele aba, kooka na irasimio jimweri tua? Nirasimie na ini wori ee aba.” Niko Esau ukalila kwa lwaka lubaa nandighi.

³⁹Nao ndee Isaaka ukaghamba: “Ola oho kuchakaia kula na manori gha ndoenyi, wokoni kuchakaia kula na mami gha mlungunyi.

⁴⁰Kuchakaia moyo kwa lufu lwako, na oho kuchamdumikia mwanyinyu. Ela iji kwafufunuka, kuchaichikanya iyo ghongolo yake ifume singonyi kwako.”

⁴¹Nao Esau ukazamilwa ni Jakobo kwa wundu ghwa jija irasimio orejipatireghe kwa ndee, ukaghora ngolonyi kwake, “Matuku ghemlilia aba ghalighisa; kawona ghasia, nicham'bwagha mwanidu Jakobo.”

⁴²Ela Rebeka ukaghorelwa malagho gha Esau mwana wake wa imbiri, nao ukaduma ukammbanga Jakobo mwana wake mtini ukamzera, “Ola mwanyinyu Esau wawuyahoresha ngolo yake kwa kubonya mpango ghokubwagha.

⁴³Idana sikira malagho ghapo mwanwapo. Wuka kukimbirie kwa mwanidu Labani uko Harani.

⁴⁴Kukaie aho kutini hata machu gha mwanyinyu ghasia,

⁴⁵na lubio lwake luinjike, na kughiliwa agho ghose kum'bonyere. Niko aho nichakudumiria kuwuye. Nisowekelwa wada ni wana kwa ituku jimweri?”

⁴⁶Niko Rebeka ukamzera Isaaka, “Nawuyasirimika kwa wundu ghwa awa waka wa Kihiti wa Esau. Da Jakobo nao moni ukawuya ukalowua umu wa wai wa Kihiti lee, ikaiagha wada?”