Read TAITA BIBLE – Biblia Ilagho Jiboie Kwa Wandu Wose KUZOYA 29 Bible Online

KUZOYA 29 - TAITA BIBLE – Biblia Ilagho Jiboie Kwa Wandu Wose bible

KUZOYA 29

¹Niko Jakobo ukaghenda imbiri na charo chake, ukavika isanga ja wandu wa mashariki.

²Nao ukizighana ukawona kiriwa chimu mlambenyi, na maranu adadu gha ng'ondi ghiko mbai-mbai yaro. Aho niko mfugho rose rinywagha machi, nacho cherefinikiroghe na igho ibaa momunyi kwaro.

³Iji ng'ondi rose racha, niko walisha wijibingilishagha ijo igho jifume momunyi kwa icho kiriwa, na kurinyosha ng'ondi machi. Hata ng'ondi rose rikameria kunywa niko wijiwunjagha ijo igho sena.

⁴Nao Jakobo ukawikotia awo walisha, “Wele wanidu, mwafuma hao?” Nawo wikamtumbulia, “Daafuma Harani.”

⁵Ukawikotia, “Mwamwichi Labani mwana wa Nahori?” Wikaghamba, “Damwichi.”

⁶Ukawikotia sena, “Oko mana?” Wikatumbulia, “Oko mana; hata na mwai wake Raheli hoja wawuyacha na ng'ondi rake.”

⁷Nao ukawizera, “Ndoe yaduagha dime, si ngelo ingi ya kudimisha mfugho, rinyoshenyi machi murilishe sena.”

⁸Nawo wikatumbulia, “Ndedidimagha; daawuyawesera ng'ondi rose rikwane chiaimweri, na igho jiinjo kufuma momunyi kwa kiriwa, ima dirinyoshe ng'ondi machi.”

⁹Nao iji orekoghe ukidedanya nawo, Raheli ukavika na ng'ondi ra ndee, angu nuo orekoghe ukirilisha.

¹⁰Nao iji Jakobo wammbona Raheli mwai wa Labani, na ng'ondi ra awuye wake Labani, ukawuka, ukaghenda na kujiinja jija igho kufuma momunyi ghwa chija kiriwa, ukarinyosha machi ng'ondi ra awuye wake Labani.

¹¹Jakobo ukamsusugha Raheli, ukalila kwa kuboilwa.

¹²Ukamghoria Raheli angu uo ni kichuku cha ndee, nao ni mwana wa Rebeka. Raheli ukakimbia kwendamghoria ndee.

¹³Hata iji Labani wasikira wuvoro ghwa Jakobo mwana wa mruna, ukafuma na iseghe kummara; ukamshishidia na kumsughusa, ukamreda nyumbenyi kwake. Nao Jakobo ukamghoria Labani malagho ghose.

¹⁴Labani ukamzera, “Loli ko bagha yapo cheni.” Nao ukakaia kwake mori ghumweri.

¹⁵Nao Labani ukamzera Jakobo, “Welee, ni hachi kunidumikie duu wei angu ko kichuku chapo? Nighorie kuchakunda ifunguki kwa kunidumikia?”

¹⁶Labani orekoghe na wai wawi. Uo m'baa orewangwaghwa Lea, na uo mtini orewangwagha Raheli.

¹⁷Lea orekoghe na meso manyonge, ela Raheli orekoghe ufwano na ndighi.

¹⁸Nao Jakobo ukamkunda Raheli ukaghamba, “Nichakudumikia miaka mfungade kwa wundu ghwa mwai wako mtini Raheli.”

¹⁹Labani ukaghamba, “Ni baa kukuneka oho kuchumba kumneka mndungi mzima. Kaia kwapo kunidumikie.”

²⁰Jakobo ukamdumikia Labani miaka mfungade kwa wundu ghwa Raheli, ela kwake iyo miaka ikawoneka sa matuku matinieri, angu oremkundieghe Raheli na ndighi.

²¹Niko Jakobo ukamzera Labani, “Ngelo derepataneghe yakata, nineke muka wapo nimmbuse.”

²²Labani ukabonya karamu na kuwiwanga wandu wose wa aja.

²³Ela ngelo ya nakio, wulalo ghwa Raheli, ukamghenja Lea kwa Jakobo; nao Jakobo ukammbusa.

²⁴Labani ukamfunya mwai wake wa kazi Zilpa, ukamneka mwai wake Lea, umdumikieghe.

²⁵Ela nakesho, Jakobo ukawona kila ni Lea, ukamzera Labani, “Kwanibonyere wada huwu? Welee, nechi ini nedekudumikia kwa wundu ghwa Raheli? Kwaki sena kwanikalia huwu?”

²⁶Nao Labani ukaghamba, “Ndeghibonyekagha huwo mzedu wei mwai mtini umuidie mmbao m'baa.

²⁷Meria njumwa ndazi ya mzango gholowua na uo, ima dikuneke Raheli, kwa kunidumikia miaka imu mfungade.”

²⁸Jakobo ukabonya wokoni, ukameria njumwa nao, niko Labani ukamneka mwai wake Raheli ukaie mkake;

²⁹sena ukamfunya mwai wake wa kazi Bilha ukamneka mwai wake Raheli umdumikieghe.

³⁰Nao Jakobo ukammbusa Raheli wori, ela ukamkunda Raheli kuchumba Lea; ukamdumikia Labani miaka mizima mfungade.

³¹Nao iji BWANA wawona angu Lea ndekundo ukam'bonya upate wana, ela Raheli orekoghe kolowi.

³²Lea ukapata kifu, ukava mwana wa womi, ukammbanga irina jake Reubeni; angu oreghambieghe, “Loli BWANA waghuzighana wasi ghwapo, idana mumi wapo uchanikunda.”

³³Ukapata kifu sena, ukava mwana wa womi, nao ukaghamba, “Kwa kukaia BWANA wawona angu sikundo, niko wanineka uhu mwana wa womi sena.” Nao ukammbanga irina jake Simeoni.

³⁴Ukapata kifu chimu sena, ukava mwana wa womi ukaghamba, “Idana mumi wapo uchawadana na ini, angu namvaia wana wa womi wadadu.” Kwa huwu irina jake orewangiloghe Lawi.

³⁵Ukapata kifu sena, ukava mwana wa womi, nao ukaghamba, “Ngelo ihi nichamkasa BWANA.” Kwa huwu ukammbanga irina jake Juda; nao ukaleka kuva.