Read TAITA BIBLE – Biblia Ilagho Jiboie Kwa Wandu Wose KUZOYA 3 Bible Online

KUZOYA 3 - TAITA BIBLE – Biblia Ilagho Jiboie Kwa Wandu Wose bible

KUZOYA 3

¹Idana choka erekoghe na mikalo kuchumba nyamandu rose ra isakenyi oreribonyereghe BWANA Mlungu. Nayo ikamzera muka, “Kedi Mlungu waghambie wei msakeja matunda gha midi yose iko mbuwenyi?”

²Muka ukaizera choka, “Dadima kuja matunda gha midi yose iko mbuwenyi;

³ela matunda gha mudi ghuko ghadi na ghadi ya mbuwa, Mlungu wadizerie, ‘Msakeja matunda gharo hata msakeghiadada mchefwa.’”

⁴Ela choka ikamzera muka, “Ndemchaafwa kungi,

⁵ela ni angu Mlungu uichi mkaja matunda gharo, meso ghenyu ghichafunukuka, nenyo muchakaia sa Mlungu wemanya mecha na mawiwi.”

⁶Niko muka iji wawona angu mudi ugho ghwaboie kwa vindo, ghwaghokie mesonyi, na sena ghwakundikie kwa kumredia mundu kumanya, ukawaya matunda gharo ukaja, ukamneka na mumi wake wori, nao ukaja.

⁷Nao meso ghawo ghikafunukuka, wikatambua angu weeka duu, wikakudungia malemba gha mtini, na kukuboisira weni shuke.

⁸Nao luma lwa kenyi wikasikira Mlungu ukisela andenyi mbuwenyi, uo mundu na mkake wikakuvisa andenyi midinyi, wisakewonwa ni Mlungu.

⁹BWANA Mlungu ukammbanga uo mundu ukighamba, “Koko hao?”

¹⁰Nao ukatumbulia, “Naasikira kukicha andenyi mbuwenyi, niko naobua ngakuvisa, angu neeka duu.”

¹¹Nao BWANA Mlungu ukamzera, “Nani wakughoria wei kooka duu? Welee, kwaaja ghuja mudi nerekukanieghe kusakeghuja?”

¹²Uja mundu ukaghamba, “Uhu muka koreninekieghe ukaieghe andwamweri nani, nuo wanineka matunda gha ugho mudi, nani ngaja.”

¹³BWANA Mlungu ukamzera muka, “Kwaki kwabonya huwu?” Muka ukatumbulia, “Ni choka yanikalia nani ngaja.”

¹⁴BWANA Mlungu ukaizera choka, “Kwa kukaia kwabonya ilagho iji, kwawasirwa njowe oho kuchumba mfugho rose, na nyamandu ra isakenyi rose. Kwa kifu chako kuchaghenda, na teri kuchaija matuku ghose gha irangi jako.

¹⁵Nichawika wumaiza aghadi yako na uo muka, na aghadi ya kivalwa chako na kivalwa chake. Uo uchachibara chongo chako, na oho kuchamluma ghimbe yake.”

¹⁶Nao ukamzera muka, “Nichaghuchuria wasi ghwako ngelo ya kuva wana, na oho kuchava wana kwa kuwawa elaima sena, bea yako ichakaia kwa mumi wako, nao uchakubonyera nguma.”

¹⁷Nao ukamzera Adamu, “Kwa kukaia kwasikira malagho gha mkako, kukaja matunda gha ghuja mudi nerekukanieghe kusakeja, ndoe yawasirwa njowe kwa wundu ghwako, kwa wasi kuchaja mavalo ghake, matuku ghose gha irangi jako.

¹⁸Ndoe ichabusa masaka na minjwa, na oho kuchaja mavalo gha mbuwa.

¹⁹Kwa marughudia gha wushu ghwako kuchaja vindo, hata kwawuya ndoenyi andu korefunyiroghe. Angu ko teri oho, na terinyi kuchawuya.”

²⁰Nao Adamu ukamneka muka wake irina ukammbanga Hawa, kwa kukaia uo nuo mae wa wadamu wose.

²¹BWANA Mlungu ukawiboisira Adamu na mkake marwao gha mrongo, ukawirusha.

²²Nao BWANA Mlungu ukaghamba, “Ola uhu mundu wakaia sa umu odu kwa kumanya mecha na mawiwi. Lindienyi usecheghorua mkonu ghwake na kuwaya matunda gha mudi ghwa irangi wori na kuja, uchedua moyo kwa kala na kala.”

²³Kwa huwo Mlungu ukamfunya mbuwenyi ya Edeni, uilime ndoe kwa iyo orebonyereghe.

²⁴Nao ukammbinga uo mundu, ukawika makerubi chia ra mashariki ra iyo mbuwa ya Edeni, na lufu luakagha modo lukakaia lukimara ii chia na ii chia kuilindia chia evikia ugho mudi ghwa irangi.