Read TAITA BIBLE – Biblia Ilagho Jiboie Kwa Wandu Wose KUZOYA 37 Bible Online

KUZOYA 37 - TAITA BIBLE – Biblia Ilagho Jiboie Kwa Wandu Wose bible

KUZOYA 37

¹Jakobo ukakaia andenyi ya isanga jerekailoghe ni weke ndee, isanga ja Kanaani.

²Na agha ni malagho gha kinyumba cha Jakobo: Josefu uendavika miaka ikumi na mfungade, orekoghe ukilisha mfugho andwamweri na waruna, wana wa Bilha na Zilpa, waka wa ndee; Josefu ukakaia ukimghoria ndee ugho wuwiwi ghwawo.

³Israeli oremkundieghe Josefu kuchumba waruna wose, angu orekoghe mwana wa wughosi ghwake, nao ukam'bonyera nguwo ndacha, iko na mikonu milacha.

⁴Ela iji waruna werewonieghe angu ndee wamkunda kuwichumba awo, wikachuria kuzamilwa ni Josefu, hata ndeweredimieghe kudedanya nao kwa sere anduangi.

⁵Ituku jimu, Josefu, ukaloda ndodo, hata iji orewighorieghe waruna, wikachuria kuzamilwa ni uo moni kuchumba.

⁶Ukawizera, “Sikirienyi malagho gha iyo ndodo nereilodieghe.

⁷Ola derekoghe diwose mbuwenyi dikifunga mario gha ngano, nao ngashinika! Ngawona irio japo jikikaia kimusi, na mario ghenyu ghikajimara mbai-mbai jija irio japo na kujighoghomia.”

⁸Niko waruna wimkazera, “Wele ni loli oho kuchakaia m'baa na kubonya nguma aighu yedu?” Nawo wikachuria kuzamilwa ni uo moni kwa wundu ghwa ndodo na madedo ghake.

⁹Nao Josefu ukaloda ndodo imu sena, ukawighoria waruna ukighamba, “Ola nalodere ndodo imu sena, wei iruwa, mori, na nyerinyeri ikumi na imweri, verenighoghomieghe.”

¹⁰Ela iji oremghorieghe ndee na waruna malagho gha ndodo iyo, ndee ukam'bukia ukighamba, “Ni ndodo-ki ihi kwailoda? Ikaia loli ini na mayo na wanyinyu dichakuchea oho na kukughoghomia hata andonyi?” Nao waruna wikakaia na iriso ibaa aighu yake,

¹¹ela ndee ukakaia ukighiririkanya agho malagho.

¹²Ituku jimu waruna Josefu wikafuma na kughenda kulisha chagha cha ndee kaavui na Shekemu.

¹³Nao Israeli ukamzera Josefu, “Kwamanya wanyinyu waawuyalisha Shekemu; choo nikudume kwawo.” Nao ukatumbulia, “Neko tayari.”

¹⁴Ukamzera, “Ghenda kuwizighane wanyinyu kuwone ngera weko banana, na mfugho ngera reko nicha; kuniredie malagho.” Nao ukamduma kufuma vololo ya Hebroni, ukaghenda hata Shekemu.

¹⁵Mndumu ukamkua aho ukimara-mara mlambenyi, ukamkotia, “Niki kwawuyalola?”

¹⁶Nao ukamtumbulia, “Naawuyalola wanidu, nakulomba kunighorie andu wawuyalisha.”

¹⁷Uo mundu ukamzera, “Waenda;” angu nasikira wikighamba, “Dighende Dothani.” Nao Josefu ukafuma aho na kuwinugha waruna, ukawikua Dothani.

¹⁸Hata iji weremmbonieghe ukicha uko kakula koni, imbiri usevikie kaavui nawo, wikabonya njama weni na weni wim'bwaghe.

¹⁹Wikaghamba, “Ola uja mlodi ndodo wacha.

²⁰Nndokonyi dim'bwaghe, nao dimkumbe kinenyi chimu; nesi dichaghamba, wabwaghwa ni nyamandu ya isakenyi, diwone ngera iro ndodo rake richakaia wada.”

²¹Ela iji Reubeni wasikira agho, ukamkira Josefu kwa kughamba, “Disakem'bwagha.”

²²Nao ukachuria kughora, “Msakedia bagha ingi; mkumbenyi andenyi ya ichi kina aha kireti, ela msem'bonye ilagho jingi.” Reubeni ukaghora agho ukikaia na nia emfunya na kummbunja kwa ndee.

²³Josefu wendavika kwa waruna, wikammbwada na kumrua ija nguwo ndacha iko na mikonu milacha oreirwaeghe,

²⁴wikamdwa na kumkumba andenyi ya kina, nacho cherekoghe chisewadie machi ghangi anduangi.

²⁵Hata iji wereserieghe kidombo kuja vindo, wikawona longo lwa Waishmaeli wikisea kufuma Gileadi na ngamila rawo, raduka marumba na manemane wikighenda cha Misri.

²⁶Nao Juda ukawizera waruna, “Dichapata fwaidaki isi dikam'bwagha mwanidu na kuivisa bagha yake?

²⁷Nndokonyi dimuuze kwa awa Waishmaeli, disem'bonye ilagho jingi angu uo ni mwanidu, bagha yedu cheni.” Waruna wikarumiria.

²⁸Nao iji Wamidiani wamu wa biashara waida aho, waruna wikaghenda na kumjosa Josefu kufuma kinenyi, wikamuuza kwa Waishmaeli kwa shekeli mirongo iwi ra feza, na Waishmaeli wikamdwa noko cha Misri.

²⁹Nao iji Reubeni orewurieghe kinenyi na kumsowa Josefu, ukarashua nguwo rake kwa wasi,

³⁰ukawuya kwa waruna ukighamba, “Mwana ndeuko kinenyi! Nibonya wada?”

³¹Wikabwagha mburi, wikaingira ija nguwo ya Josefu baghenyi,

³²wikaidwa ija nguwo ndacha ya mikonu milacha ya Josefu, wikaireda kwa ndee wikighamba, “Ola nguwo hei daishoa, kuizighane kuimanye ngera ni nguwo ya mwana wako angu ngera siyo ingi.”

³³Jakobo ukaimanya ukaghamba, “Ihi ni nguwo ya mwanwapo, wameria kubwaghwa ni nyamandu ya isakenyi; kwa loli Josefu wameria kurashulwa vipande vipande.”

³⁴Nao Jakobo ukarashua nguwo rake kwa wasi, ukarwa nguwo ya igunia kiwonunyi kwake, na kumlilia mwana wake kwa matuku mengi.

³⁵Na wana wake wa womi na wa waka wikacha kumhoresha, ela ukalegha kuhoreshwa ukighamba, “Nichamseria mwanwapo warumunyi ngimlilia.” Niko ndee oremlilieghe huwo.

³⁶Iyo ngelo cheni Wamidiani wikamuuza Josefu Misri kwa Potifa, umu wa wabaa wa kazi wa mzuri, nao ni m'baa wa walindiri.