Read TAITA BIBLE – Biblia Ilagho Jiboie Kwa Wandu Wose KUZOYA 38 Bible Online

KUZOYA 38 - TAITA BIBLE – Biblia Ilagho Jiboie Kwa Wandu Wose bible

KUZOYA 38

¹Kimu icho Juda orewisighieghe waruna, ukasea na kukaia kwa Muadulami umu orewangwaghwa Hira.

²Nao Juda ukammbona mwai wa Mkanaani umu uwangwagha Shua, ukamlowua na kukaia nao.

³Uo mwai ukapata kifu, ukava mwana wa womi, ukammbanga Eri.

⁴Ukapata kifu sena, ukava mwana umu wa womi ukammbanga Onani.

⁵Ukapata mwana wa womi sena, ukammbanga Shela. Juda orekoghe andu kuwangwagha Kezibu mwana uo ukivalwa.

⁶Juda ukamlowora Eri mwana wake wa imbiri muka, na irina jake orewangwaghwa Tamari.

⁷Ela Eri mwana wa imbiri wa Juda, orekoghe na mabonyo ghizamie imbiri ya BWANA, kwa huwu BWANA ukam'bwagha.

⁸Juda ukamzera Onani, “Kaianya na mka mwanyinyu Eri, kumpatire mwanyinyu kivalwa.”

⁹Ela Onani angu oremanyireghe kivalwa ndechichaawangwa kwa irina jake, ngelo orekanyeghe na mka mruna, ukaridiria mbeu rake andonyi, eri usechemneka mruna kivalwa.

¹⁰Ilagho ijo orejibonyereghe jikamzamia BWANA, nao moni BWANA ukam'bwagha.

¹¹Niko Juda ukamzera Tamari mka mwanwake, “Wuya kukaie kwa ndeyo sa muka mkiwa, kuwesere mwanwapo Shela uzoghuo.” Oreghorieghe huwo angu oreobueghe kewada nao moni uchafwa sa waruna. Nao Tamari ukaghenda ukakaia kwa ndee.

¹²Nao nyuma ya matuku ghamu, muka wa Juda, uja mfwa Shua, ukafwa. Hata nyuma ya ifwa kusia, na Juda kuhoreshwa ngolo, ukasea cha Timna kudumbua ng'ondi rake mafuri; nao orekwanyeghe na mghenyi wake Hira Muadulami.

¹³Tamari ukaghorelwa wei mghosi wake usea cha Timna kudumbua ng'ondi rake mafuri,

¹⁴ukaiinja ija nguwo ya kimuka mkiwa, ukarwa wuzima na kukufinikira kitambaa, ukasea kidombo mbengenyi engia Enaimu muzi ghuko chienyi eghenda cha Timna. Orewonieghe worinyi Shela wazoghua, ela nderemnekeloghe umlowuo.

¹⁵Hata iji Juda wammbona, ukaghesha ni malaya, angu oreghufinikireghe wushu ghwake.

¹⁶Ukamghendia mbai na mbai ya chia ukamzera, “Nirumirie ningie kwako;” angu nderemmanyireghe wei ni mka mwanwake anduangi. Nao ukaghamba, “Kuninekaki ima kungie kwapo?”

¹⁷Ukamtumbulia, “Nikuredia ndaghina kufuma chaghenyi.” Nao ukamzera, “Kunineka wufunga ghoweseria hata kuidume?”

¹⁸Ukamzera, “Ni wufungaki kukunde nikuneke?” Nao ukaghamba, “Ni pete ya muhuri ghwako, na kamba yaro, chiaimweri na ugho mzata ghuko mkonunyi kwako.” Niko aho ukamneka, nao ukangia kwake, nao ukapata kifu.

¹⁹Niko aho Tamari ukawuya mzinyi ukighighalua marwao ghake, ukarwa ija nguwo ya kimuka mkiwa.

²⁰Nao iji Juda wamduma mghenyi wake Hira Muadulami, kuighenja ija ndaghina, upate kuvireda vija vilambo veresighiloghe sa wufunga, Hira ukalemwa ni kummbona uo muka.

²¹Ukawikotia womi wamu wa Enaimu, “Oko hao uja malaya orekoghe aha chienyi?” Nawo wikamtumbulia, “Malaya ungi nderekoghe aha anduangi.”

²²Nao Hira ukawuya kwa Juda ukamzera, “Siwonie uo muka, hata womi wa isangenyi waanizera angu ndekuwadie malaya ungi aho anduangi.”

²³Juda ukaghamba, “Ndekaie na ivo vilambo sa vake disechesekwa. Nechi kwawona namghenjera ihi ndaghina, ela kwaamsowa.”

²⁴Nao nyuma ya meri idadu Juda ukaghorelwa, “Ola mka mwanwako Tamari wabonyere wumalaya, nao oko na kifu.” Juda ukaghamba, “Mfunyenyi ukoro.”

²⁵Nao iji Tamari orekoghe ukifunywa, ukaduma momu kwa mghosi wake Juda ukighamba, “Mundu wa vilambo ivi nuo unikumbie kifu. Nakulomba kuvitambuo vilambo ivi ngera ni vani: pete ya muhuri na kamba yaro, na mzata?”

²⁶Nao Juda ukavimanya vija vilambo ukaghamba, “Muka uhu oko na hachi kunichumba ini, ni angu niseremnekieghe mwanwapo Shela umlowuo sa iji neremlaghirieghe.” Nao nderemmanyireghe sena anduangi.

²⁷Nao iji ngelo ya kukufungua kwake erevikieghe, korekoghe na masa kifunyi kwake.

²⁸Nao ukikumba lufu, mwana umu ukafunya mkonu ghwake, na uja mvarishi ukamfunga uzi wa ngundu kikotonyi kwake ukighamba, “Uhu wazoya ukafuma.”

²⁹Ela iji orewunjireghe mkonu ghwake noko ndenyi, mruna ukafuma. Nao uja mvarishi ukaghamba, “Wele oho kuaida kwa ndighi?” Nao wikammbanga irina jake Perezi.

³⁰Konyuma mruna ukafuma uko na uja uzi wa ngundu kikotonyi kwake, wikammbanga irina jake Zera.