Read TAITA BIBLE – Biblia Ilagho Jiboie Kwa Wandu Wose KUZOYA 39 Bible Online

KUZOYA 39 - TAITA BIBLE – Biblia Ilagho Jiboie Kwa Wandu Wose bible

KUZOYA 39

¹Waishmaeli wikamdwa Josefu hata Misri, wikamuuza kwa Potifa, umu wa wabaa wa mzuri; nao orekoghe m'baa wa walindiri wa nyumba ya mzuri.

²BWANA ukakaia andwamweri na Josefu, ukawona nicha kwa ghose oreghibonyereghe; nao ukakaia nyumbenyi kwa uja bwana wake Mmisri.

³Nao Potifa ukawona angu BWANA orekoghe andwamweri na Josefu kwa seji BWANA orekoghe ukirasimia ghose gherebonyeroghe ni mikonu yake.

⁴Josefu ukarumirikia mesonyi kwake, nao ukam'bonya ukaie mdumiki wake, sena ukammbika ukaie m'baa aighu ya vilambo na nyumba yake yose.

⁵Hata nyuma ya Josefu kuwikwa ukaie m'baa wa vilambo na nyumba yose ya Potifa, BWANA ukairasimia ija nyumba ya Mmisri kwa wundu ghwa Josefu, irasimio ja BWANA jikakaia aighu ya vose orekoghe navo, nyumbenyi na mbuwenyi wori.

⁶Kwa huwu Potifa ukamsighia Josefu wuzighaniri ghose, hata nderesumbukieghe ilagho jingi izima ela vindo vake veni. Josefu moni orekoghe uumbikie nicha sena ughokie.

⁷Nao nyuma kapindi, muka wa bwana wake ukazoya kumzighana kwa bea, ukamzera, “Ndedilalanye.”

⁸Ela ukalegha na kumzera uo muka wa bwana wake, “Zighana bwana wapo ndesumbukiagha vilambo va nyumbenyi kwake angu niko aha, nao waniwikie mzighaniri wa vilambo vake vose;

⁹hata uo moni ndenichumbie kwa wubaa andenyi ya nyumba ihi, sena ndenighirie kilambo chingi, ela oho kumoni kuekeri kwa kukaia koko muka wake. Idana idimika wada kwapo ini nighubonye wuwiwi ghung'ane huwu, na kum'bonyera Mlungu kaung'a?”

¹⁰Na hata ngera orekoghe ukidedanya nao ituku ituku, Josefu ndererumirieghe wei wilalanye, hata kukaianya nao anduangi.

¹¹Ela ituku jimu, iji Josefu orengirieghe nyumbenyi kubonya wudumiki ghwake, na mdumiki ungi mzima nderekoghe nyumbenyi,

¹²uja muka ukammbwada nguwo ukamzera, “Ndedilalanye.” Ela Josefu ukailekeria nguwo yake, ukakimbia cha shighadi.

¹³Uja muka uendawona angu wasighilwa nguwo, na Josefu wakimbia cha shighadi,

¹⁴ukawiwanga wadumiki wa nyumbenyi kwake ukawizera, “Zighanenyi wadiredie uhu Muebrania uchedidukana! Wangia aha ukikunda ulale nani, ngakema na lwaka lubaa,

¹⁵nao uendasikira nakema, ukakimbia cha shighadi ukanisighia nguwo yake.”

¹⁶Nao ukaiwika ija nguwo hata mumi wake ukacha;

¹⁷ukamghoria ghaja malagho gheni ukighamba, “Uhu mdumiki Muebrania kumredie aghadi kodu wanichea ukikunda kunidukana,

¹⁸ela iji nakema kwa lwaka lubaa, ukakimbia cha shighadi na kunisighia nguwo yake.”

¹⁹Nao iji bwana wake wasikira ghaja malagho, ukajokwa ni machu loli-loli.

²⁰Ukammbwada Josefu na kumngira kifungonyi andu wafungwa wa mzuri werekoghe wikifungwa, ukakaia aho.

²¹Ela BWANA orekoghe andwamweri na Josefu, ukamrasimia na kum'bonya urumirikie mesonyi kwa m'baa wa kifungonyi.

²²M'baa wa kifungonyi ukam'bonya Josefu ukaie mzighaniri wa wafungwa wambao wose, na kazi rose rerebonyekagha aho, rerebonyeroghe kwa nguma yake.

²³Uja m'baa wa kifungonyi ndereisumbukieghe kazi ingi iyo yose erekoghe mikonunyi kwa Josefu, angu BWANA moni orekoghe andwamweri na Josefu, na icho chose orechibonyereghe, BWANA ukachirasimia.