Read TAITA BIBLE – Biblia Ilagho Jiboie Kwa Wandu Wose KUZOYA 45 Bible Online

KUZOYA 45 - TAITA BIBLE – Biblia Ilagho Jiboie Kwa Wandu Wose bible

KUZOYA 45

¹Niko aho Josefu ukalemwa ni kukumazira imbiri ya wandu wose werekwanyeghe; ukaghora kwa lwaka lubaa, “Injikenyi aha mmbose.” Kwa huwu mndungi nderekwanyeghe na Josefu iji orekumanyishagha uo moni kwa waruna.

²Ukalila kwa lwaka lubaa, hata Wamisri wikasikira, na nyumba ya mzuri wori wikasikira.

³Nao Josefu ukawizera waruna, “Ini ne Josefu. Welee, aba waduagha moyo?” Ela waruna ndeweredimieghe kumtumbulia ilagho jingi kwa wundu ghwa wowa ghorewipatireghe imbiri kwake.

⁴Josefu ukawizera waruna, “Namlomba msoghode kaavui nani.” Nao wikamsoghodera kaavui. Ukawizera, “Ini ne mwanyinyu Josefu uo moremuuzireghe Misri.

⁵Idana msakeja wasi hata kuwawa ngolonyi konyu kwa wundu ghwa uko kuniuza aha, angu Mlungu odenireda ini imbiri konyu, nipate kuvuvua marangi gha wandu.

⁶Angu idana njala yakaia isangenyi miaka iwi; sena yasigharika miaka misanu ya njala, iseko na kulima angu kukuwida kindo chingi.

⁷Mlungu odenireda ini imbiri konyu, nipate kumvuvua kwa chia ihi ya mashiniko, na kuchibonya kivalwa chenyu chikaie moyo ndoenyi.

⁸Kwa huwu si inyo muniredie aha anduangi ela ni Mlungu; ukanibonya ini nikaie sa aba kwa mzuri, bwana wa nyumba yake yose, na m'baa wa isanga jose ja Misri.

⁹“Bonyenyi shwa-shwa mjoke kwa aba mumzera, mwana wake Josefu waghora huwu, ‘Mlungu wanibonyere nikaie bwana aighu ya Misri, kusakemuka kucha kwapo;

¹⁰na oho kuchakaia isanga ja Gosheni, kaavui nani; oho, wana wako, weke wawayo, mfugho na vose kuko navo.

¹¹Ini moni nichakaia nikikuzighana, angu yasighwa sena miaka misanu ya njala, isechekaia oho na muzi ghwako, na vose kuko navo, kubwaghwa ni njala!’

¹²“Idana inyo mmbose na mwanidu Benjamini wori, mwaniwona angu ni ini moni Josefu nidedanyagha na inyo.

¹³Suti mumghorie aba malagho gha wubaa ghwapo niko nagho aha Misri, na ghose mughiwonie inyo mmbeni. Shashirenyi mumrede aba aha.”

¹⁴Nao wikashishidiana na mruna Benjamini, wikazoya kulila.

¹⁵Nao Josefu ukawisusugha waruna wose ukilila; konyuma wikazoya kudedanya nao.

¹⁶Nao ikakaia iji malagho gheresikiroghe nyumbenyi kwa mzuri, wei waruna Josefu wameria kucha, mzuri andwamweri na wadumiki wake wikaboilwa na ndighi.

¹⁷Na mzuri ukamzera Josefu, “Kuwizere wanyinyu wibonye huwu: Widukishire weke punda magunia ghawo wighende isanga ja Kanaani,

¹⁸wimrede ndee na nyumba yake yose aha kwapo, na ini nichamneka andu kokaia kwa isanga iji ja Misri, wipate kuja mecha gha isanga.

¹⁹Sena kuwilaghire wido magare kufuma aha Misri kwa wundu ghwa wana wawo watini, na waka wawo, nao wimrede ndeyo.

²⁰Wisakeja wasi kwa wundu ghwa mali rawo, angu andu kuboie kuchumba kwa isanga ja Misri ni kwawo.”

²¹Nao wana wa Israeli wikabonya wokoni, na Josefu ukawineka magare sa iji koni mzuri orelaghirieghe, ukawineka na vindo va charonyi wori.

²²Ukawineka kula umu nguwo rebadilisha ela Benjamini ukamneka shekeli maghana adadu ra feza na nguwo isanu rebadilisha.

²³Ukamghenjera ndee weke punda ikumi wadukishirwa vilambo viboie va Misri, na weke punda wa waka waduka viro, mikate na vindo va chienyi kwa wundu ghwa ndee.

²⁴Ukalaghana na waruna wighende, nao ukilaghana nawo ukawizera, “Msakerashana chienyi.”

²⁵Nao wikafuma isanga ja Misri, wikaghenda na kungia isanga ja Kanaani kwa ndee.

²⁶Nawo wikamghoria ndee wikighamba, “Josefu oko moyo! Nao nuo m'baa wa isanga jose ja Misri!” Jakobo ukazimia kwa kukaia nderewirumirieghe anduangi.

²⁷Ela nyuma ya kumghoria malagho ghose gha Josefu, nao ukiwona agho magare ghafuma kwake ghemduka, ukaelesha meso.

²⁸Nao Israeli ukaghamba, “Yakata; mwanwapo Josefu oko moyo! Suti nighende nimmbone imbiri nisefue.”