Read TAITA BIBLE – Biblia Ilagho Jiboie Kwa Wandu Wose KUZOYA 46 Bible Online

KUZOYA 46 - TAITA BIBLE – Biblia Ilagho Jiboie Kwa Wandu Wose bible

KUZOYA 46

¹Nao Jakobo ukatumbanya vose orekoghe navo, ukazoya charo. Hata iji wavika Beer-sheba, ukamfunyira Mlungu wa ndee Isaaka vizongona.

²Nao Mlungu ukaghora na Israeli kwa mawono nakio ukammbanga, “Jakobo! Jakobo!” Nao ukadika, “Neko aha.”

³Nao ukamzera, “Ini ne Mlungu, uo Mlungu wa ndeyo, kusakeobua kughenda isanga ja Misri; angu nichakubonya kukaie mbari mbaa aho.

⁴Nichaghendanya na oho cha Misri, sena nichakuwunja aha; na mikonu ya Josefu niyo cheni ichaatungurisha meso ghako iji kwafwa.”

⁵Nao Jakobo ukazoya charo kufuma Beer-sheba. Wana wake wikamngira uo, na wana wawo watini, na waka wawo andenyi ya igare jereredeloghe ni mzuri wa Misri.

⁶Wokoni wikadwa mfugho rawo, na vilambo werevipatireghe isanga ja Kanaani, wikacha na kungia Misri. Jakobo ukacha na kivalwa chake chose.

⁷Wana wake wa womi na wa waka, na weke wawae. Kivalwa chake chose chikacha Misri.

⁸Agha ni marina gha kivalwa cha Israeli awo werechieghe Misri. Jakobo na wana wake; Mdawana wake wa imbiri Reubeni

⁹na wadawana wa Reubeni: Hanoku, Palu, Hezroni, na Karimi.

¹⁰Simeoni na wadawana wake: Jemueli, Jamini, Ohadi, Jakini, Sohari, na Shauli mwana wa muka wa Kikanaani.

¹¹Lawi na wadawana wake: Gershoni, Kohathi, na Merari.

¹²Juda na wadawana wake: Shela, Perezi, na Zera (wadawana wa Juda wamu Eri na Onani werefueghe Kanaani.) Wadawana wa Perezi werekoghe Hezroni na Kamuli.

¹³Isakari na wadawana wake: Tola, Pua, Jashubu, na Shimroni.

¹⁴Zebluni wa wadawana wake: Seredi, Eloni, na Jahileeli.

¹⁵Awa ni wadawana Lea oremvaieghe Jakobo aja Padan-aramu mwai wake Dina uko mbai. Kivalwa chose chifumie kwa Lea cherekoghe wandu mirongo idadu na wadadu.

¹⁶Gadi na wadawana wake: Sefioni, Hagi, Shuni, Ezboni, Eri, Arodi, na Areli.

¹⁷Asheri na wadawana wake: Imna, Ishiva, Ishivi, Beria, na mruna wa waka Sera. Wadawana wa Beria werekoghe Heberi na Malkieli.

¹⁸Awa ikumi na warandadu ni kivalwa cha Jakobo chifumie kwa Zilpa, mwai mzumba uo Labani oremnekieghe mwai wake Lea.

¹⁹Raheli, mka Jakobo odemvaia Jakobo wadawana wawi: Josefu na Benjamini.

²⁰Josefu orekoghe na wadawana wawi Misri: Manase na Efraimu, wivalo ni Asenati mwai wa Potifera mkohani wa muzi ghwa Oni.

²¹Wadawana wa Benjamini werekoghe Bela, Becheri, Ashibeli, Gera, Naamani, Ehi, Roshi, Mupimu, Hupimu, na Aridi.

²²Awa ikumi na bana ni kivalwa cha Jakobo chifumie kwa Raheli.

²³Dani na mdawana wake Hushimu.

²⁴Naftali na wadawana wake: Jahizeeli, Guni, Jeseri, na Shilemu.

²⁵Awa mfungade ni kivalwa cha Jakobo chifumie kwa Bilha, mwai mzumba uo Labani oremnekieghe mwai wake Raheli.

²⁶Wandu wose wa kivalwa cha imbiri cha Jakobo wereghendieghe Misri wisetalwanye na waka wa wana wake ni mirongo irandadu na warandadu.

²⁷Wadawana wa Josefu wawi werevailoghe Misri. Mtalo ghose ghwa wandu wa nyumba ya Jakobo wereghendieghe aho ni mirongo mfungade.

²⁸Jakobo ukamduma Juda ukirie imbiri kwake, kumlomba Josefu wikwanie na ndee Gosheni. Nawo wikavika isanga ja Gosheni.

²⁹Niko Josefu ukaboisa igare jake ughende kummara ndee Israeli aja Gosheni; nao ukamvikia ukakumanyisha moni kwake, ukamshishidia na kulila luma koni.

³⁰Nao Israeli ukamzera Josefu, “Idana ngafwa si ilagho, angu nameria kughuwona wushu ghwako, na kumanya loli angu koko moyo.”

³¹Nao Josefu ukawizera waruna, na kinyumba chose cha ndee, “Nichamghendia mzuri nimzere kukaia, wanidu na kinyumba chose cha aba werekoghe isanga ja Kanaani wameria kunichea.

³²Wandu waro ni walisha, kwa kukaia matuku ghawo ghose wadafugha mfugho, nawo wareda mfugho rawo na vose wiko navo.

³³Kwa huwu iji mzuri wammbanga na kumkotia, ngera mwabonyagha kaziki, mumtumbulie

³⁴kukaia kazi yenyu ni elisha mfugho kufuma wanake ghonyu hata idana, sa iji koni weke ndeyo werebonyagha. Mkaghora huwo niko mchaadima kujikaia iji isanga ja Gosheni.” Kwa kukaia mundu ose uko mlisha wadazamia Wamisri.