Read TAITA BIBLE – Biblia Ilagho Jiboie Kwa Wandu Wose KUZOYA 48 Bible Online

KUZOYA 48 - TAITA BIBLE – Biblia Ilagho Jiboie Kwa Wandu Wose bible

KUZOYA 48

¹Nyuma ya maza iro, Josefu ukaghorelwa angu ndee ni mkongo. Nao ukawiwada waja wana wake wawi, Manase na Efraimu, ukacha nawo kwa ndee.

²Hata iji Jakobo waghorelwa angu mwana wake Josefu wacha kummbona, ukakufungisha ndighi ukawuka na kusea kidombo wulinyi kwake.

³Jakobo ukamzera Josefu, “Mlungu Uwadie-Ndighi-Rose orenifutukieghe aja Luzu isanga ja Kanaani, ukanirasimia ukinizera,

⁴‘Nichakubonya oho kuve kwa wungi na kuchurikia, na kivalwa chako chichawuya mbari nyingi, na isanga iji jichawuya ifwa ja kala na kala ja kivalwa chako.’

⁵Idana awa wana wako wawi korewivailoghe andenyi ya isanga iji ja Misri, imbiri ini nisechee kwako, ni wana wapo; Efraimu na Manase ni wana wapo karakara na Reubeni na Simeoni.

⁶Ela awo wose wichaavalwa na nyuma yawo, wichakaia ni wako. Ifwa jawo isangenyi jichawichea kwa kuidiria kwa awo waruna.

⁷Angu iji nerekoghe nikicha kufuma Padani, nerepatiroghe ni wasi kwa kufuilwa ni mayo Raheli chienyi isanga ja Kanaani, navika kaavui na Efrata, nani ngamrika aho mbai na mbai ya chia eghenda Efrata, (nigho Bethlehemu.)”

⁸Hata iji Israeli wawiwona wana wa Josefu ukaghamba, “Ni weke ani awa?”

⁹Josefu ukamzera ndee, “Ni wana wapo awa Mlungu uninekie aha Misri.” Nao ukamzera, “Nakulomba kuwirede kwapo nipate kuwirasimia.”

¹⁰Meso gha Israeli gherekoghe ghisewonagha nicha kwa wundu ghwa wughosi ghwake. Nao Josefu ukawisoghora kaavui kwake, nao ukawisusugha na kuwishishidia.

¹¹Israeli ukamzera Josefu, “Seregheshereghe wei nechaaghuwona wushu ghwako sena, nao ola Mlungu wanirumiria niwone hata na wana wako wori.”

¹²Nao Josefu ukaghoghoma imbiri ya ndee na kudunga wushu gwake andonyi.

¹³Nao ukawisoghora wana wake na kuwiwika nicha imbiri ya ndee, ukimmbwadia Efraimu chia ya mkonu ghwake ghwa kiwomi, kulangaya mkonu ghwa kiwaka ghwa ndee, na Manase ukammbwadia chia ya mkonu ghwake ghwa kiwaka, kulangaya mkonu ghwa kiwomi ghwa ndee; nao ukawisoghora wana kaavui na wawae.

¹⁴Nao Israeli ukaghughorua mkonu ghwake ghwa kiwomi ukaghuwikiria aighu ya chongo cha Efraimu uhu orekoghe mtini, na mkonu ghwake ghwa kiwaka ukaghuwikiria aighu ya chongo cha Manase uhu orekoghe m'baa, huwo ukiirusanya mikonu yake.

¹⁵Nao ukamrasimia Josefu ukighamba; “Mlungu uo weke aba Abrahamu na Isaaka weremdumikieghe, uo Mlungu orenighenjereghe irangi japo jose kuvikia ituku iji,

¹⁶na malaika uo orenikirieghe nisepato ni mawiwi; uwirasimie wana awa. Irina japo na marina gha weke aba Abrahamu na Isaaka, ndeghiduo andenyi kwawo. Nawo ndewizoghuo wive na kuchurikia ndoenyi kose.”

¹⁷Nao iji Josefu orewonieghe angu ndee wawikiria mkonu ghwake ghwa kiwomi aighu ya chongo cha Efraimu, ukazamilwa; ukaghuwada mkonu ghwa ndee ughuwikirie aighu ya chongo cha Manase.

¹⁸Josefu ukamzera ndee, “Siko kungu huwu aba, uhu nuo mwana wa imbiri, wikiria mkonu ghwako ghwa kiwomi aighu ya chongo chake.”

¹⁹Ela ndee ukalegha ukaghamba, “Ini namanya, namanya putu mwanwapo. Hata uo moni uchakaia m'baa kumchumba, na kivalwa chake chichakaia kibaa na kuwuya mbari nyingi.”

²⁰Ituku jija Jakobo ukawirasimia ukighamba: “Waisraeli wichatumia marina ghenyu wikifunya marasimio kwa kughamba, ‘Mlungu ndekubonye kukaie sa Efraimu na Manase.’” Kwa chia ihi, ukammbika Efraimu imbiri ya Manase.

²¹Nao Israeli ukamzera Josefu, “Ola ini neko kaavui na kufwa, ela Mlungu uchakaia andwamweri na inyo, sena uchammbunja kwa isanga ja weke ndeyo.

²²Chiaimweri na huwo ni oho nakuneka Shekemu, hata si wanyinyu anduangi, ijo isanga jinorie nerejiwusireghe kwa Waamori kwa lufu lwapo na ndana yapo.”