Read TAITA BIBLE – Biblia Ilagho Jiboie Kwa Wandu Wose KUZOYA 49 Bible Online

KUZOYA 49 - TAITA BIBLE – Biblia Ilagho Jiboie Kwa Wandu Wose bible

KUZOYA 49

¹Nao Jakobo ukawiwanga wana wake wose ukawizera, “Kwanyikenyi chiaimweri, nipate kummanyisha iro maza richaampata matuku ghichagha:

²“Kwanyikenyi msikire inyo wana wa Jakobo, msikirienyi ndeyo Israeli.

³“Reubeni, oho ko mwanwapo wa imbiri, kudima kwapo na itunda ja imbiri ja wudawana ghwapo. Kwakukasire sena koko na ndighi kuchumba.

⁴Kwaramie mwano sa machi mengi, ela ndekuchaakaia imbiri, angu koreghujokieghe wuli ghwa ndeyo; kukaghulusha ugho wuli ghwa ndeyo.

⁵“Simeoni na Lawi, ni mundu na mruna, watumia chufu rawo kubonya lung'eto.

⁶Kusakengia njamenyi kwawo ee roho yapo, hata kusakengia ikwanyikonyi jawo ee roho yapo. Angu werewibwaghieghe wandu kwa machu ghawo, na kwa wutukutu ghwawo wereridemieghe njau, na kuridumbua mighenu.

⁷Machu ghawo ndeghiwasiro njowe angu gherekoghe mabaa, na lubio lwawo wori angu luko na wutukutu. Nichawiwaghanya andenyi ya Jakobo, na kuwisaghisa andenyi ya Israeli.

⁸“Juda, wanyinyu wichakukuma, na kwa mkonu ghwako kuchawinyora wamaiza wako. Wanyinyu wa womi wichakughoghomia.

⁹Juda mwanwapo, kooka sa mwana wa shimba, wawuya kufuma kubwaghenyi madiwo ghake. Kukalala na kukughorua andonyi sa shimba, karakara na shimba ya waka, nani udimagha kukuwusira?

¹⁰Juda ndechaatana na mzata ghwa nguma, na uo ubonyagha nguma ndechaasoweka kwake anduangi. Hata uche mundu waro moni, uo uchaasikirwa ni wandu wose.

¹¹Wadafunga punda wake mzabibunyi, na mwana wa punda kwa mzabibu ghuboie, Nao moni wadaoghosha nguwo rake kwa divei, na marwao ghake kwa divei itinikie sa bagha.

¹²Meso ghake ghatinishiro ni divei, na maghegho ghake ghaeleshero ni mariwa.

¹³“Zebluni uchakaia mbai na mbai ya bahari, pwani yake ichakaia bandari ya meli; na mwano ghwake ghuchavika Sidoni.

¹⁴“Isakari ni sa punda uwadie ndighi, ukurarishagha moni aghadi ya mizigo yake.

¹⁵Orewonieghe angu andu kwake kohoresha kwaboie, na isanga najo jaghokie. Kwa huwu ukaghoghomesha maonge ghake uduke, nao wabonyeshwa kazi sa mzumba.

¹⁶“Dani uchawitanya wandu wake, sa umu wa mbari ra Israeli.

¹⁷Dani uchakaia sa choka chienyi, karakara na mwaropo mbai na mbai ya chia. Uo ulumagha masafio gha farasi, hata udime kumpotua uo oreijokieghe.

¹⁸“Ini nichakuweseria kukia kwako ee BWANA.

¹⁹“Gadi uchakwanyikilwa ni viting'a, ela uchawighalukia na kuwiwinga.

²⁰“Asheri uchakaia na vindo kwa wungi, nao uchafunya vindo vimfwanagha mzuri.

²¹“Naftali ooka sa mwakuli wa waka ufungilo, uvagha wana wighokie.

²²“Josefu ni sa longe luvagha, longe luvagha kaavui na ndoria, mbashu rake ralanda aighu kighemunyi.

²³Wamaiza wake werelueghe nao kwa kubia, wikamkumba na mawanu na kumjisha wasi na ndighi.

²⁴Ela ndana yake uo erekoghe imange, na mikonu yake erebonyeroghe kukaia na ndighi, kwa kudima kwa Uo-Uwadie-Ndighi wa Jakobo, kwa irina ja Mlisha, nao ni Mbanga ya Israeli;

²⁵nuo Mlungu wa weke ndeyo uchaakutesia, uo Mlungu Uwadie-Ndighi-Rose uchakurasimia, kwa marasimio ghichaafuma aighu mlungunyi. Sena marasimio gha machi ghimilie, ghifumagha ndoenyi nakosi; na marasimio gha kuva na kulela wori.

²⁶Marasimio gha ndeyo, ghawadie ndighi kuchumba gha mighondi ya kala na kala, na agho mecha gha mighondi ya kala na kala; ndegikarie aighu ya chongo cha Josefu, na aighu ya chamu cha uo oretanyiroghe na waruna.

²⁷“Benjamini ni kikwau chirashuagha, chijagha madiwo ghake nakesho, na kuwagha madiwo ghake nakenyi.”

²⁸Iri niro mbari ikumi na iwi ra Israeli, na malagho agho nigho ndee orewizerieghe iji orekoghe ukiwirasimia kula umu kwa irasimio jake jimfwanagha.

²⁹Nao Jakobo ukawilaghira wana wake, “Ini neko kaavui na kuranganywa andwamweri na wakedu wiidie; munirike andu weke aba wererikiloghe, kwa ija mbanga iko mbuwenyi kwa Efroni Mhiti.

³⁰Ija mbanga iko Makpela, mashariki ya Mamre, isanga ja Kanaani; ija Abrahamu oreighueghe andwamweri na mbuwa yaro kwa Efroni Mhiti, na kuibonya ikaie andu korikia wandu.

³¹Aho niko Abrahamu na mkake Sara wererikiloghe, aho wikamrika Isaaka na mkake Rebeka, na aho neremrikieghe Lea.

³²Mbuwa iyo andwamweri na mbanga yaro ereghuloghe kufuma kwa Wahiti.”

³³Nao nyuma ya Jakobo kuwilaghira wana wake, ukawunja maghu ghake wulinyi ukameria moyo, ukaranganywa andwamweri na wakwawo wiidie.