Read TAITA BIBLE – Biblia Ilagho Jiboie Kwa Wandu Wose KUZOYA 5 Bible Online

KUZOYA 5 - TAITA BIBLE – Biblia Ilagho Jiboie Kwa Wandu Wose bible

KUZOYA 5

¹Ichi nicho kivalwa cha Adamu. (Iji Mlungu oremuumbieghe mdamu, orem'bonyereghe kwa fwana yake cheni.

²Orewiumbieghe mndwawomi na muka, ukawirasimia na kuwiwanga irina jawo “Mdamu.”)

³Iji Adamu orekoghe mundu wa miaka ighana na mirongo idadu orevaeghe mwana ufwanane nao moni, ukammbanga irina jake Sethi.

⁴Nyuma ya kumva Sethi, Adamu ukakaia miaka maghana wunyanya, ukava wana wamu wa womi na wa waka.

⁵Matuku ghose agho Adamu orekaieghe ndoenyi ni miaka maghana ikenda na mirongo idadu, nao ukafwa.

⁶Iji Sethi orekoghe mundu wa miaka ighana na isanu, oremvaeghe Enoshi.

⁷Nyuma ya kumva Enoshi, Sethi ukakaia miaka maghana wunyanya na mfungade; ukava wana wamu wa womi na wa waka.

⁸Matuku ghose gha Sethi gherekoghe miaka maghana ikenda na ikumi na iwi, nao ukafwa.

⁹Iji Enoshi orekoghe mundu wa miaka mirongo ikenda, oremvaeghe Kenani.

¹⁰Nyuma ya kumva Kenani, Enoshi ukakaia miaka maghana wunyanya na ikumi na isanu; ukava wana wamu wa womi na wa waka.

¹¹Matuku ghose gha Enoshi gherekoghe miaka maghana ikenda na isanu, nao ukafwa.

¹²Iji Kenani orekoghe mundu wa miaka mirongo mfungade, oremvaeghe Mahalaleli.

¹³Nyuma ya kumva Mahalaleli, Kenani ukakaia miaka magana wunyanya na mirongo ina; ukava wana wamu wa womi na wa waka.

¹⁴Matuku ghose gha Kenani gherekoghe miaka maghana ikenda na ikumi, nao ukafwa.

¹⁵Iji Mahalaleli orekoghe mundu wa miaka mirongo irandadu na isanu, oremvaeghe Jaredi.

¹⁶Nyuma ya kumva Jaredi, Mahalaleli ukakaia miaka maghana wunyanya na mirongo idadu; ukava wana wamu wa womi na wa waka.

¹⁷Matuku ghose gha Mahalaleli gherekoghe miaka maghana wunyanya na mirongo ikenda na isanu, nao ukafwa.

¹⁸Iji Jaredi orekoghe mundu wa miaka ighana na mirongo irandadu na iwi, oremvaeghe Enoko.

¹⁹Nyuma ya kumva Enoko, Jaredi ukakaia miaka maghana wunyanya; ukava wana wamu wa womi na wa waka.

²⁰Matuku ghose gha Jaredi gherekoghe miaka maghana ikenda na mirongo irandadu na iwi, nao ukafwa.

²¹Iji Enoko orekoghe mundu wa miaka mirongo irandadu na isanu, oremvaeghe Methusela.

²²Nyuma ya Methusela kuvalwa, Enoko ukawadana na Mlungu kwa miaka maghana adadu, nao ukava wana wamu wa womi na wa waka.

²³Matuku ghose Enoko ukaie ndoenyi ni miaka maghana adadu na mirongo irandadu na isanu.

²⁴Enoko ukawadana na Mlungu nao ukasoweka, kwa kukaia Mlungu oremdwaeghe noko.

²⁵Iji Methusela orekoghe mundu wa miaka ighana na mirongo wunyanya na mfungade, oremvaeghe Lameki.

²⁶Nyuma ya kumva Lameki, Methusela ukakaia miaka maghana mfungade mirongo wunyanya na iwi; ukava wana wamu wa womi na wa waka.

²⁷Matuku ghose gha Methusela gherekoghe miaka maghana ikenda mirongo irandadu na ikenda, nao ukafwa.

²⁸Iji Lameki orekoghe mundu wa miaka ighana na mirongo wunyanya na iwi, orevaeghe mwana wa womi,

²⁹ukammbanga Nuhu ukaghamba, “Kwa ndoe icheni BWANA uiwasire njowe, mwana uhu uchadiredia wuhoreshi kufuma kwa wasi na kazi ra mikonu yedu.”

³⁰Nyuma ya kumva Nuhu, Lameki ukakaia miaka maghana masanu mirongo ikenda na isanu, ukava wana wamu wa womi na wa waka.

³¹Matuku ghose gha Lameki gherekoghe miaka maghana mfungade mirongo mfungade na mfungade, nao ukafwa.

³²Nao nyuma ya Nuhu kuvika miaka maghana masanu, ukawiva Shemu, Hamu na Jafethi.