Read TAITA BIBLE – Biblia Ilagho Jiboie Kwa Wandu Wose KUZOYA 7 Bible Online

KUZOYA 7 - TAITA BIBLE – Biblia Ilagho Jiboie Kwa Wandu Wose bible

KUZOYA 7

¹Nao BWANA ukamzera Nuhu, “Ngia safinenyi, na kinyumba chako chose; angu nakuwona oho kukaia na hachi aghadi ya kivalwa ichi.

²Nyamandu rose rielie kurido mfungade mfungade ra womi na ra waka;

³na nyonyi ra mbeonyi wokoni kungire mfungade mfungade ra womi na ra waka, vichuku varo vipate kukaia moyo ndoenyi.

⁴Angu nyuma ya matuku mfungade nichanyesha vua ndoenyi kose kwa matuku mirongo ina kio na dime, na kula kindo chiko moyo nerechibonyereghe nichachiinja ndoenyi.”

⁵Nao Nuhu ukabonya wokoni sa iji orelaghiriloghe ni BWANA.

⁶Nuhu orekoghe na miaka maghana arandadu iji gharika erechieghe ndoenyi.

⁷Nuhu andwamweri na wana wake, na muka wake, na waka wa wana wake, wikangia safinenyi, kukukira na ija gharika.

⁸Nyamandu rose rielie na riseelie, nyonyi, na shimandu rose riavuagha andoenyi,

⁹viwi viwi va womi na va waka verengiriloghe safinenyi andwamweri na Nuhu, sa iji koni Nuhu orelaghiriloghe ni Mlungu.

¹⁰Na nyuma ya matuku mfungade, iyo gharika ikacha ndoenyi.

¹¹Niko ugho mwaka ghwa maghana arandadu ghwa Nuhu, mori ghwa kawi, na ituku ja ikumi na mfungade ja ugho mori, ndoria rose ra machi gha ndoenyi rikarughuka kwa wungi, na madirisha gha mlungunyi ghikarughuka.

¹²Vua ikanya aighu ndoenyi matuku mirongo ina kio na dime.

¹³Ijo ituku jeni Nuhu orengirieghe safinenyi, uo, na wana wake, Shemu, Hamu, na Jafethi, muka wake, na waka wadadu wa wana wake werengirieghe safinenyi.

¹⁴Nyamandu rose ra kula kichuku, na mfugho ra kula kichuku, na shimandu rose riavuagha andoenyi ra kula kichuku, rerengirieghe andwamweri nawo;

¹⁵rose ra kula kichuku rerengirieghe safinenyi andwamweri na Nuhu, viwi viwi va icho chose cherekoghe na miruke ya irangi.

¹⁶Rose rerengiriloghe ra womi na ra waka sa iji koni Mlungu oremlaghirieghe; nao BWANA ukamrughia andenyi.

¹⁷Nao gharika ikakaia ndoenyi matuku mirongo ina, hata machi ghikachua ghikaiwusira ija safina nokoighu.

¹⁸Machi ghikachurikia nandighi aighu ndoenyi, na ija safina ikawusirwa nokoighu ikakaia ikidukwa-dukwa ni machi.

¹⁹Machi ghikachurikia nandighi aighu ndoenyi hata mighondi mibaa yose ikamilika.

²⁰Machi agho ghikachurikia na ndighi, ghikafinikira na kuida mighondi meta mfungade nokoighu.

²¹Kula kilambo chiko moyo cherekoghe ndoenyi chikafwa; nyonyi, mfugho, nyamandu, na shimandu rose na kula mdamu,

²²na icho chose chisodagha cherekoghe aighu ya ndoe iomie chikafwa;

²³ikaiagha ni mdamu, angu nyamandu, angu shimandu, angu nyonyi; rose rikafwa na kuinjwa ndoenyi. Nuhu tu nuo oresigharikieghe andwamweri na awo werekwanyeghe nao safinenyi.

²⁴Agho machi ghikakaia aighu ndoenyi matuku ighana na mirongo misanu.