Read TAITA BIBLE – Biblia Ilagho Jiboie Kwa Wandu Wose KUZOYA 9 Bible Online

KUZOYA 9 - TAITA BIBLE – Biblia Ilagho Jiboie Kwa Wandu Wose bible

KUZOYA 9

¹Nao Mlungu ukamrasimia Nuhu na wana wake ukawizera, “Venyi mchurikie, muichure ndoe.

²Nyamandu rose, nyonyi rose, icho chose chiavuagha na samaki riko baharinyi richamuobua inyo; nani nariwika rose aisi ya nguma renyu.

³Icho chose chighendagha chiko moyo chichakaia vindo venyu, na sa iji koni neremnekieghe malemba ghikaie vindo venyu, namneka ivo vose wori.

⁴Ilagho jelindia ni iji: Msakeja nyama chia imweri na bagha, angu bagha ni irangi.

⁵Ngera mndungi wadia bagha enyu, loli nichaikotia angu bagha ni irangi ja mundu.

⁶Mdamu oreumbiloghe kufwanana na Mlungu, kwa huwo uo ose uchaidia bagha ya mdamu, bagha yake ichadilwa ni mdamu wokoni.

⁷Na inyo muve mchurikie, muichure ndoe kwa wungi.”

⁸Mlungu ukamzera Nuhu na wana wake,

⁹“Idana niabonya ilaghano japo nenyo, andwamweri na kivalwa chenyu chichaanugha nyuma,

¹⁰na icho chose chiko moyo chikwanye andwamweri nenyo: nyonyi, mfugho na nyamandu ra ndoenyi rose rerefumieghe safinenyi.

¹¹Nabonya ilaghano japo na inyo, angu jingi wori, mimbi yose iko moyo ndeichaatoteshwa kwa machi anduangi, hata na jingi sena ndekuchaakaia na gharika enona wurumwengu anduangi.”

¹²Mlungu ukaghamba, “Ihi niyo alama ya ilaghano nijibonyagha aghadi ya ini na inyo, andwamweri na icho chose chiko moyo, na vivalwa vose vichaanugha nyuma.

¹³Nawika lusenge lwa vua andenyi ya mawingu nalo luchakaia alama ya ilaghano japo nijibonyagha na wurumwengu.

¹⁴Iji nareda mawingu aighu ndoenyi, na ulo lusenge luwoneke andenyi ya mawingu,

¹⁵nichakumbuka ilaghano japo jiko aghadi yapo na inyo, na mimbi yose iko moyo, na machi ndeghichaakaia gharika ebwagha mumbi ghungi jingi sena anduangi.

¹⁶Iji lusenge lwadunga andenyi ya mawingu, nichaluzighana kukumbuka ijo ilaghano ja kala na kala jerewikiloghe aghadi ya Mlungu na icho chose chiko moyo chiumbilo, na mimbi yose iko ndoenyi.”

¹⁷Nao Mlungu ukamzera Nuhu, “Ihi niyo alama ya ilaghano najimangisha aghadi yapo na kula mumbi ghuko ndoenyi.”

¹⁸Wana wa Nuhu awa werefumieghe safinenyi ni Shemu, Hamu, na Jafethi. Hamu orekoghe ndee Kanaani.

¹⁹Awa wana wadadu wa Nuhu niwo weni wichurie wandu wurumwengu ghose.

²⁰Nuhu nuo orekoghe mundu wa imbiri kuilima ndoe na kuwa mizabibu.

²¹Ukanywa divei ukawongia, ukalala andenyi ya hema yake usekufinikire wuduu ghwake.

²²Hamu, ndee Kanaani, ukammbona ndee uko duu, ukawighoria waja waruna wawi werekoghe shighadi.

²³Niko Shemu na Jafethi wikawada nguwo, wikaiwikiria maongenyi kwawo, na kughenda kinyuma-nyuma, wikaghufinikira wuduu ghwa ndee, na mawushu ghawo gherekoghe ghikizighana noko, hata ndewereghuwonieghe wuduu ghwa ndee anduangi.

²⁴Hata iji Nuhu waelwa ni meso, na kumanya seji mwana wake mtini wam'bonyera,

²⁵ukaghamba, “Kanaani ndewado ni njowe; uo uchakaia mzumba wa wazumba kwa waruna.”

²⁶Nao ukaghamba sena, “Mrasimie Shemu ee BWANA Mlungu wapo, na Kanaani ndekaie mzumba wake.

²⁷Mlungu ndem'bonye Jafethi uchurikie, nao ukaieghe hemenyi ra Shemu, na Kanaani ukaie mzumba wake.”

²⁸Nyuma ya gharika, Nuhu ukakaia miaka maghana adadu na mirongo misanu.

²⁹Matuku ghose gha Nuhu orekaieghe ndoenyi ni miaka maghana ikenda na mirongo misanu, nao ukafwa.