Read TAITA BIBLE – Biblia Ilagho Jiboie Kwa Wandu Wose 2 SAMUELI 8 Bible Online

2 SAMUELI 8 - TAITA BIBLE – Biblia Ilagho Jiboie Kwa Wandu Wose bible

2 SAMUELI 8

¹Konyuma, Daudi ukawisima Wafilisti na kuwinyamirisha putu. Ukawada muzi ghwa Gathi[2] kufuma kwa Wafilisti.

²Niko ukawisima wandu wa Moabu, ukawirarisha wafungwa andoenyi zaria-zaria na kubwagha zaria iwi ra wandu kwa kula zaria idadu. Wamoabu wikawuya wadumiki wa Daudi, wikakaia wikilipa kodi kwake.

³Wokoni Daudi ukamsima Hadadezeri mwana wa Rehobu, mzuri wa Soba iji uo Ha-dadezeri oreghendagha kumunganya wuzuri ghwake aho modenyi ghwa Eufrate.

⁴Daudi ukamsoka wajoki farasi elfu na maghana mfungade, na masikari gheghenda na maghu elfu mirongo iwi. Daudi ukasaghua farasi rekurudua magare ighana jimweri, ela farasi rimu zima, ukaridumbua mighenu na kurikelemesha.

⁵Hata iji Wasiria wa Dameshki wereghenjereghe majeshi ghawo kumtesia Hadadezeri mzuri wa Soba, Daudi ukabwagha wandu elfu mirongo iwi na iwi wa Siria.

⁶Niko Daudi ukaagha ngome aho Aramu ya Dameshki, na Wasiria wikawuya wadumiki wa Daudi, wikakaia wikilipa kodi kwake. BWANA ukamneka Daudi wusimi andu uko kose oreghendieghe.

⁷Daudi ukawusa ngao ra dhahabu reredwaloghe ni wabaa wa Hadadezeri, ukarireda Jerusalemu.

⁸Daudi ukawusa shaba nyingi nandighi kufuma kwa mizi imu ya Hadadezeri, nayo ni Beta, na Berothai.

⁹Nao Toi mzuri wa Hamathi ukasikira kukaia Daudi wamerie kusima ijeshi jose ja Hadadezeri.

¹⁰Toi ukamduma mwana wake Joramu kwa Mzuri Daudi, upate kumroghua na kumghata kwa wundu ghwa kulwa na Hadadezeri hata ukamsima, angu Hadadezeri orekoghe ukilwa na Toi shwa kwa shwa. Joramu ukamredia Daudi vilambo va feza, dhahabu na va shaba.

¹¹Mzuri Daudi ukaviranganya vilambo ivo chiaimweri na vimu va feza na va dhahabu orevipatireghe kwa rija mbari orerisimieghe na kurinyarimisha; ukaviwika vose wakfu kwa BWANA.

¹²Mbari iro ni Edomu, Moabu, Amoni, Wafilisti, Waamaleki, na wokoni ivo verewadiloghe kufuma kwa Hadadezeri mwana wa Rehobu, mzuri wa Soba.

¹³Sare ya Daudi ikachuria kuera iji orewurieghe nyuma ya kubwagha Waedomu elfu ikumi na wunyanya aja Vololo ya Chumbi.

¹⁴Ukaagha ngome andenyi ya isanga jose ja Edomu. Waedomu wose wikawuya wadumiki wa Daudi; na BWANA ukamneka Daudi wusimi andu uko kose oreghendieghe.

¹⁵Daudi ukawibonyera nguma Waisraeli wose, ukawitanya wandu wose kwa hachi na loli.

¹⁶Joabu mwana wa Seruia ukakaia m'baa wa majeshi, na Jehoshafati mwana wa Ahiludi ukakaia karani;

¹⁷na Zadoku mwana wa Ahitubu na Ahimeleki mwana wa Abiathari wikakaia wakohani; na Seraia ukakaia muandiki;

¹⁸na Beraia mwana wa Jehoiada ukakaia aighu ya Wakerethi na Wapelethi;[3] na wana wa Daudi wikakaia wakohani.