Read TAITA BIBLE – Biblia Ilagho Jiboie Kwa Wandu Wose 1 WAZURI 4 Bible Online

1 WAZURI 4 - TAITA BIBLE – Biblia Ilagho Jiboie Kwa Wandu Wose bible

1 WAZURI 4

¹Solomoni orekoghe mzuri aighu ya Israeli yose.

²Awa niwo werekoghe wabaa wa serikali yake: Azaria mwana wa Zadoku orekoghe mkohani;

³Elihorefu na Ahija wana wa Shisha werekoghe waandiki wa kotinyi; Jehoshafati mwana wa Ahiludi orekoghe muandiki wa malagho gha ngelo;

⁴Benaia mwana wa Jehoiada orekoghe m'baa wa majeshi; Zadoku na Abiathari werekoghe wakohani;

⁵Azaria mwana wa Nathani orekoghe m'baa aighu ya wabaa wambao; Zabudi mwana wa Nathani orekoghe mkohani na mghenyi wa mzuri;

⁶Ahishari orekoghe mzighaniri wa ngome ya mzuri; na Adoniramu mwana wa Abda orekoghe mzighaniri wa wapakazi.

⁷Solomoni orewikieghe wabaa wa masanga ikumi na wawi aighu ya Israeli; nawo werekoghe wikireda vindo kwa mzuri na nyumba yake. Kula umu waro orekoghe ukireda vindo vekata mori mlazi kula mwaka.

⁸Marina ghawo nigho agha: Benhuri, wa isanga ja mighondinyi ja Efraimu;

⁹Bendekeri wa isanga ja Makazi, Shaalbimu, Beth-shemeshi, na Eloni-beth-hanani;

¹⁰Benhesedi wa isanga ja Arubothi (uo orenekeloghe masanga gha soko na isanga jose ja Heferi);

¹¹Ben-abinadabu, wa masanga gha Nafath-dori (oremlowueghe Tafathi mwai wa Solomoni);

¹²Baana mwana Ahiludi wa isanga ja Taanaki, Megido na Beth-sheani yose iko mbai na mbai ya Zarethani nandonyi ya Jezreeli, na kufuma Beth-sheani hata Abel-mehola, hata kimonu cha Jokmeamu;

¹³Bengeberi wa isanga ja Ramoth-gileadi (orekoghe na mizi ya Jairi mwana wa Manase, iko aho Gileadi; nao orekoghe na isanga ja Argobu, jiko Bashani, mizi mirongo irandadu iaghilo na wurigha na vuma va shaba);

¹⁴Abinadabu mwana wa Ido, wa isanga ja Mahanaimu;

¹⁵Ahimaazi wa isanga ja Naftali (oremlowueghe Basemathi mwai wa Solomoni);

¹⁶Baana mwana wa Hushai wa isanga ja Asheri na Bealothi;

¹⁷Jehoshafati mwana wa Parua wa isanga ja Isakari;

¹⁸Shimei mwana wa Ela wa isanga ja Benjamini;

¹⁹Geberi mwana wa Uri wa isanga ja Gileadi, isanga ja Sihoni mzuri wa Waamori na Ogu mzuri wa Bashani. Na m'baa umweri wa isanga ja Juda.

²⁰Wandu wa Juda na wa Israeli werekoghe wengi sa msangagha ghwa baharinyi; wikaja na kunywa wikiboilwa.

²¹Solomoni ukabonya nguma aighu ya mawuzuri ghose; kufuma Moda ghwa Eufrate hata isanga ja Wafilisti na mpakenyi ghwa Misri. Wandu wikamredia kodi na kumdumikia irangi jake jose.

²²Vindo va Mzuri Solomoni va ituku jimweri verekoghe pishi ighana na mirongo misamu ra mufu ghudendere, pishi maghana adadu ra ngano,

²³ng'ombe ikumi rejia viwandenyi, ng'ombe zima relishwa mirongo iwi, na ng'ondi ighana jimweri, kula na sarigha, mwakuli, shaa, na nguku ribandie.

²⁴Solomoni orekoghe ukibonya nguma aighu ya isanga jose ja magharibi ya Moda ghwa Eufrate kufuma Tifsa hata Gaza. Wazuri wose wa magharibi ya Moda ghwa Eufrate werekoghe aisi yake; ukakaia na sere na masanga ghose gha mbai-mbai.

²⁵Matuku ghose Solomoni orekoghe moyo, wandu wa Israeli na Juda kufuma Dani hata Beer-sheba werekoghe banana; kula mundu ukakaia na mbuwa yake na mizabibu na tini.

²⁶Wokoni Solomoni orekoghe na viwanda va farasi elfu mirongo ina, kwa wundu ghwa magare ghake na wajoki farasi elfu ikumi na iwi.

²⁷Wabaa wa masanga ikumi na awi kula umu kwa mori ghwake, werekoghe wikireda vindo kwa wundu ghwa Mzuri Solomoni na kwa wundu ghwa wandu wose werekoghe wikija mezenyi kwa mzuri. Wikafunga ndighi kureda, kilambo chingi chisesoweke.

²⁸Wokoni wikareda shairi na matasa andu rerekundikieghe ra magare na farasi zima wori.

²⁹Mlungu ukamneka Solomoni hikima na kumanya kubaa, na akili nyingi risepimikagha.

³⁰Solomoni orekoghe na hikima kuchumba wandu wose wa mashariki, na kuchumba wandu wose wa hikima wa Misri.

³¹Orekoghe na hikima kuchumba wandu wose, hata kumchumba Ethani Muezrahi, na Hemani, Kalkoli, na Darda, awo wana wa Maholi; sare ya hikima yake ikaera isanga jose ja mbai-mbai.

³²Ukadunga makatanisho elfu idadu, na chumbo elfu imweri na isanu.

³³Ukaja malagho gha midi na miwalwa; kufuma misida ya Lebanoni hata hisopu ibukagha a wurighenyi; ukaja malagho gha nyamandu, na nyonyi na shimandu riavuagha andoenyi, na samaki.

³⁴Wazuri wose wa ndoenyi weresikireghe wuvoro ghwa hikima ya Solomoni wikaduma wandu wawo wiche kumsikiria.