Read TAITA BIBLE – Biblia Ilagho Jiboie Kwa Wandu Wose 1 WAZURI 7 Bible Online

1 WAZURI 7 - TAITA BIBLE – Biblia Ilagho Jiboie Kwa Wandu Wose bible

1 WAZURI 7

¹Solomoni ukaagha ngome yake; nayo eremdwaeghe miaka ikumi na idadu kuimeria.

²Chumba kibaa cha Msidu ghwa Lebanoni cherekoghe na wulacha ghwa meta mirongo ina na inya, na wushapa ghwa meta mirongo iwi na iwi, na wuighu ghwa meta ikumi na idadu na pointi isanu. Chereaghiloghe na nguro ra misida ra laini inya na mikabo ya misida.

³Cherevimbiloghe na mbau ra misida ikabirilo aighu ya mbau ra ighombo rikomerelo nguronyi.

⁴Mawurigha awi gherekoghe na madirisha adadu kula wurigha ghukilangayana.

⁵Minyango yose na madirisha ghedeeka na fremu ra mraba; na madirisha ghedelangayana.

⁶Ukabonya Chumba cha Nguro; wulacha ghwaro ghorekoghe meta mirongo iwi na iwi, na wushapa ghwaro meta ikumi na idadu na pointi isanu. Korekoghe na kanyumba katini naimbiri kerekwanyiroghe na icho chumba kibaa, nacho chereaghiloghe na nguro, chikafinikirwa na chandarua.

⁷Sena orebonyereghe Chumba kwa wundu ghwa Kifumbi cha Nguma, chiwangwaghwa Chumba Chetanya, andu Solomoni orebonyereghe mandu etanya malagho. Ereaghiloghe na mbau ra sida kufuma kondonyi sakafunyi, hata darinyi koighu.

⁸Solomoni oreaghieghe nyumba imu na nyuma ya Chumba Chetanya, iyo erekoghe yake moni. Sena ukaagha nyumba ifwanane na iyo kwa wundu ghwa mkake oremlowueghe, uo mwai wa mzuri wa Misri.

⁹Nyumba iri rose chiaimweri na Chumba Chetanya rereaghiloghe kwa magho gha zoghori mbaa, ghiwachilo kunughana na vipimo varo, na kudumbulwa kwa misumeno naimbiri na nanyuma; nagho ghereaghiloghe kufuma msinginyi hata ighombonyi.

¹⁰Misingi erekoghe ya magho mabaa gha zoghori mbaa; ghamu ghiko na wulacha ghwa meta idadu na nusu, na ghamu gha meta inya.

¹¹Naighu yaro koreaghiloghe na magho ghiwachilo gha zoghori mbaa kunughana na vipimo varo, na mbau ra sida wori.

¹²Waza ya ngome ereaghiloghe laini idadu wurigha ghose kwa magho ghiwachilo, na laini imweri ya mbau ra msida; sa iji koni chumba cha ndenyi cha Hekalu na chumba chengiria verebonyeroghe.

¹³Nao Mzuri Solomoni ukaduma Huramu kufuma Tiro uredo.

¹⁴Uo orekoghe mwana wa muka mkiwa wa mbari ya Naftali, ela ndee orekoghe mundu wa isanga ja Tiro, uo orekoghe na wuya ghobonya kazi ya shaba. Ukacha kwa Mzuri Solomoni, na kubonya kazi rake rose.

¹⁵Huramu ukachana nguro iwi ra shaba, riko na wuighu ghwa meta wunyanya, na wurifu ghwa meta isanu na pointi idadu; riko na mruma nandenyi; wurifu ghwaro vala vina.

¹⁶Ukabonya virumbu viwi va shaba kula chimu chiko na wulacha ghwa meta iwi na pointi iwi, vewikiria aighu ya vongo va rija nguro iwi.

¹⁷Ukaluka virumbu viko na maridadi gha zaria zaria, na kuviwika aighu ya kula nguro.

¹⁸Ukabonya makomamanga gha shaba kuvimara ivo virumbu.

¹⁹Kuwoneka kwaro ivo virumbu kodeeka sa mboi mbaa ya lili wulacha ghwaro meta imweri na pointi wunyanya.

²⁰Ivo virumbu vikawikirilwa aighu ya iro nguro iwi. Verekoghe na makomamanga maghana awi ghivimarie mbai mbai laini iwi.

²¹Huramu oreridungieghe iro nguro ra shaba kaavui na lukumbi lwa Hekalu. Nguro ilangaye cha kusinyi, ukaiwanga Jakini na nguro ya kawi ilangaye cha kaskazinyi, ukaiwanga Boazi.

²²Kuwoneka kwa ivo virumbu aighu ya nguro kodeeka sa mboi mbaa ra lili. Kazi ebonya iro nguro ikasia.

²³Huramu orebonyereghe itangi ja shaba ja mviringo. Wundenyi ghwaro meta iwi na pointi iwi; ghadi na ghadi kufuma kimonu hata kimonu meta inya na pointi inya, na wurigha ghwaro meta ikumi na idadu na pointi iwi.

²⁴Ukamarisha laini iwi ra wurigha ghwa shaba cha shighadi ya itangi.

²⁵Ijo itangi jerewikiriloge aighu ya njau richanilo ra shaba ikumi na iwi. Njau idadu rilangayagha cha kaskazinyi, na idadu rilangayagha cha magharibi, na idadu rilangayagha cha kusinyi, na idadu rilangayagha cha mashariki.

²⁶Wurifu ghwa ijo itangi ni milimeta mirongo mfungade na isanu; jisheghelukie sa kikombe, na kuwoneka sa mboi ya lili. Itangi jerengiragha lita elfu mirongo ina.

²⁷Sena Huramu ukabonya magare ikumi gha shaba, kula jimu jerekoghe na wulacha ghwa meta imweri na pointi wunyanya, na wushapa ghwa meta imweri na pointi wunyanya, na wuighu ghwa meta imweri na pointi idadu.

²⁸Agho magare ghereaghiloghe huwu: korekoghe na panali rerengiriloghe fremunyi,

²⁹na aighu ya iro panali rerengiriloghe fremunyi, korekoghe na fwana ra Shimba, Njau, na makerubi. Naighu na nandonyi ya shimba na njau, korekoghe na fwana ra maua aluwarunyi.

³⁰Sena kula igare jerekoghe na magurudumu ana gha shaba na mzilio ghwa shaba. Kula kona ya igare erekoghe na vilambo vewikiria beseni viko na fwana ra maua aluwarunyi.

³¹Korekoghe na fremu ya mviringo aighu kwa wundu ghwa beseni. Ereidieghe igare nokoighu kwa sentimeta mirongo ina na isanu na nokondonyi sentimeta ikumi na wunyanya. Ivo vilambo verekoghe na mapambo, na panali raro redeeka ra skoya.

³²Agho magurudumu gherekoghe ana kula igare, na mizilio erewadaneghe na igare kumaziria agho magurudumu. Magurudumu gherekoghe na wuighu ghwa sentimeta mirongo irandadu na irandadu, nagho ghedeeka nandonyi ya panali.

³³Agho magurudumu gherefwananeghe na magurudumu gha magare gha wuda, kufuma mizilio, ringi, na chuzi raro, na habu; nagho ghedeeka gha shaba.

³⁴Korekoghe na vilambo vewadia nandonyi konenyi kwa kula igare, navo verewadanishiroghe magarenyi.

³⁵Kutuonyi kwa kula igare cha naighu korekoghe na mkele ghwa sentimeta mirongo iwi na iwi ghumarishiro chia rose.

³⁶Vilambo vewadia na panali verepambiloghe na fwana ra makerubi, shimba na mitende andu kose korekoghe na wulalo kwa wundu ghwaro; chiaimweri na maua kuvimara chia rose.

³⁷Huwo niko agho magare ikumi gherebonyeroghe. Ghedeeka na kipimo chimweri, ghifwanane ghose.

³⁸Huramu ukabonya beseni ikumi ra shaba kwa wundu ghwa magare ikumi. Kula beseni erekoghe na kipimo cha ghadi na ghadi kufuma kimonu hata kimonu cha meta imweri na pointi wunyanya, ingiragha lita maghana wunyanya.

³⁹Ukawika magare masanu kusinyi ya Hekalu, na masanu kaskazinyi ya Hekalu; na itangi ukajiwika kusinyi kaskazinyi.

⁴⁰Wokoni Huramu ukabonya nyungu, miiko na beseni. Ukaimeria kazi yose orekoghe ukim'bonyera Mzuri Solomoni kwa wundu ghwa Hekalu.

⁴¹Ukabonya nguro iwi, na virumbu viwi viko sa bakuli vewikiria aighu ya rija nguro, na mapambo ghilukilo sa mikufu ghewikiria aighu ya vija virumbu verekoghe aighu ya nguro,

⁴²na makomamanga maghana ana gha shaba ghimarishiro mbai mbai ya vija virumbu, kula kirumbu laini iwi ra ighana, ghefinikira virumbu ivo verekoghe aighu ya nguro.

⁴³Agho magare ikumi, na beseni raro ikumi.

⁴⁴Ijo itangi na njau rejiwadia nandonyi;

⁴⁵nyungu, miiko na beseni. Vilambo ivi vose Hiramu orem'bonyereghe Mzuri Solomoni kwa wundu ghwa Hekalu, verekoghe va shaba izughulo nandighi.

⁴⁶Mzuri ukafunya momu vilambo ivi vose vibonyero kiwandenyi cherekoghe ghadi na ghadi ya Sukothi na Zarethani, Vololo ya Jordani.

⁴⁷Solomoni ukavisigha ivo vilambo visepimilo kwa kukaia verekoghe vingi na ndighi; kwa huwo wulemeri ghwa shaba ndeghoremanyikieghe.

⁴⁸Wokoni Solomoni ukabonya vilambo va dhahabu kwa wundu ghwa Hekalu, navo ni madhabahu, meza ya mikate ewikwa kwa Mlungu,

⁴⁹vinara va taa verewikiloghe visanu cha kusinyi, na visanu cha kaskazinyi verekaieghe naimbiri ya Andu kwa Wueli Kuchumbie; maua, na taa, na koleo;

⁵⁰vikombe, mawutambi gha taa, bakuli, dishi refukira marumba, chuwigha reduka maka gha modo, na bahaba ra minyango ya Andu kwa Wueli Kuchumbie, na minyango ya shighadi ya Hekalu. Vilambo ivo vose vedeeka va dhahabu.

⁵¹Niko huwo kazi yose Mzuri Solomoni oreibonyereghe kwa wundu ghwa Hekalu ya BWANA ikasia. Ukareda vilambo vose verewikiloghe wakfu kwa BWANA ni ndee Daudi, ukavingira andenyi ya chumba cha vilambo; shaba na dhahabu na vilambo vizima.