Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 11 Bible Online

1 MALAGHO GHA NGELO 11 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 11

¹Niko Waisraeli wose wikakwanyika kwa Daudi aja Hebroni wikaghamba, “Zighana oho ko nyama na bagha yedu.

²Imbiri, hata iji Sauli orekoghe mzuri, ni oho korekoghe kukiwighenja Waisraeli. BWANA Mlungu wako ukakuzera kukaia kuchakaia mlisha wa wandu wake Israeli, na kuwuya m'baa wawo.”

³Kwa huwo waghosi wose wa Israeli wikacha kwa mzuri aho Hebroni; na Daudi ukabonya ilaghano nawo imbiri ya BWANA aho, nawo wikamshinga mavuda ukaie mzuri aighu ya Israeli karakara na ilagho ja BWANA orejighorieghe ukimtumia Samueli.

⁴Mzuri Daudi na Waisraeli wose wikaghenda na kughukaba muzi ghwa Jerusalemu. Ghoremanyikieghe sa Jebusi, na Wajebusi werekoghe wikikaia aho sa waisanga waro.

⁵Wajebusi wikamzera Daudi kukaia ndengiagha ugho muzi. Ela Daudi ukaiwada ngome ya Sioni, nagho ghukamanyika kukaia “Muzi ghwa Daudi.”

⁶Daudi ukaghamba, “U mundu uchaakaia wa imbiri kum'bwagha Mjebusi, uchawuya m'baa wa majeshi.” Joabu mwana wa Zeruia ukakaia wa imbiri nao ukawuya m'baa.

⁷Daudi ukakaia ngomenyi; kwa huwo ghukawuya “Muzi ghwa Daudi.”

⁸Ukaghuagha ugho muzi ukizoia aho ghoreaghiloghe cha mashariki ya mghondi, na Joabu ukaboisa andu kuzima kwa muzi.

⁹Daudi ukachuria kuwuya m'baa, angu BWANA Uwadie-Ndighi-Rose orekoghe chiaimweri nao.

¹⁰Awa niwo wabaa wa masikari weremteserieghe Daudi kughumangisha wuzuri ghwake chiaimweri na Israeli yose. Weremteserieghe kuwuya mzuri sa iji koni BWANA orelaghirieghe; wikaghumangisha wuzuri.

¹¹Ughu nigho mtalo ghwa masikari gha Daudi: Jeshobeamu, wa Hakmoni orekoghe M'baa wa Wadadu; orejiwetereghe ifumu jake ukawibwagha wandu maghana adadu iyo ngelo cheni.

¹²Mundu wa kawi wa awo wabaa waja wadadu, orekoghe Eleazari mwana wa Dodo, wa kichuku cha Ahohi.

¹³Orekwanyeghe na Daudi aja Pas Damimu iji Wafilisti werekwanyikieghe aho kwa wuda. Korekoghe na mbuwa ichue shairi, na wandu wikawikimbia Wafilisti.

¹⁴Ela uo na wandu wake wikakufungisha ndighi ghadi na ghadi ya mbuwa wikaidederia, na kuwibwagha Wafilisti; BWANA ukawikira kwa wusimi m'baa loli loli.

¹⁵Ituku jimu wandu wadadu wa masikari mirongo idadu werekoghe vilongozi, wikasea cha mbangenyi andu Daudi orekoghe aho. Mbanga ya Adulamu, ingelo majeshi gha Wafilisti gherekwanyikieghe Vololo ya Refaimu.

¹⁶Ngelo iyo Daudi orekoghe ngomenyi, na majeshi gha Wafilisti gherekoghe Bethlehemu.

¹⁷Daudi ukaghora kwa bea mbaa, “Ima mndungi ndaninekagha machi nganywa kufuma kiriwa cha Bethlehemu chiko kaavui na mbenge!”

¹⁸Niko awo mang'oni adadu gha masikari wiwadie ndighi wikangia kambi ya Wafilisti na kudaya machi kiriwenyi cha Bethlehemu cherekoghe kaavui na mbenge, wikaghiduka na kumredia Daudi. Ela Daudi ndereghinyueghe; ukaghidia andonyi sa kizongona kwa BWANA,

¹⁹ukaghamba, “Ndeinifwane putu nibonye huwu imbiri ya Mlungu wapo. Sidimagha kunywa bagha ya irangi ja awa wandu wakungira ndengonyi mbaa eghireda agha machi.” Kwa huwo ukalegha kughinywa. Malagho agho gherebonyeroghe ni agho mang'oni adadu gha wandu.

²⁰Abishai, Joabu mruna, orekoghe m'baa wa waja mirongo idadu. Nao ukaweweta ifumu jake, ukawibwagha wandu maghana adadu, ukakupatira irina, waja wadadu wiko mbai.

²¹Uo ukakumika kuchumba awo mirongo idadu, ukawuya m'baa wawo; hata ngera nderewivikieghe waja wadadu.

²²Benaia mwana wa Jehoiada uo orekoghe ing'oni ja Kabseeli, orebonyereghe malagho mabaa. Orewibwaghieghe mang'oni mabaa awi gha Moabu. Ituku jimu oreserieghe kinenyi thaluji yasea, ukabwagha shimba.

²³Wokoni orem'bwaghieghe Mmisri umu, uko na mumbi m'baa; wulacha ghwa meta iwi. Uo Mmisri orekoghe na ifumu wajiwadia mkonunyi kwake sa mudi gholuka, Benaia oremserieghe na rungu, ukamsoka ijo ifumu ukam'bwagha na ifumu jake jeni.

²⁴Benaia mwana wa Jehoiada oreribonyereghe, maza iri ukakupatira irina; waja wadadu wiko mbai.

²⁵Orekumikieghe kwa awo mirongo idadu, ela ndewerevikieghe waja wadadu. Daudi ukammbika m'baa wa walindiri wake.

²⁶Masikari gha majeshi gherekoghe Asaheli, mruna Joabu, Elihandari mwana wa Dodo wa Bethlehemu,

²⁷Shamthi kufuma Harodi, Helezi kufuma Peloni,

²⁸Ira mwana wa Ikeshi, kufuma Tekoa, Abiezeri kufuma Anathothi,

²⁹Sibekai kufuma Hushathi, Ilai kufuma Ahohi,

³⁰Maharai kufuma Netofa, Heledi mwana wa Baania kufuma Netofa,

³¹Ithai mwana wa Ribai kufuma Gibea ya Benjamini, Benaia kufuma Pirathoni,

³²Hutai kufuma vololo ya Gaashi, Abieli kufuma Arbathi,

³³Azmawethi kufuma Baharumu, Eliaba kufuma Shaalboni,

³⁴Hashemu kufuma Gizoni, Jonathani mwana wa Shagae kufuma Harari,

³⁵Ahiamu mwana wa Shakari kufuma Harari, El-fali mwana wa Uri,

³⁶Heferi kufuma Mekerathi, Ahija kufuma Peloni,

³⁷Hezro kufuma Karmeli, Naarai mwana wa Ezbai,

³⁸Joeli mruna Nathani, Mibhari mwana wa Hagri,

³⁹Seleki kufuma Amoni, Naharai kufuma Beerothi uo orekoghe mdwa maswagha wa Joabu mwana wa Seruia,

⁴⁰Ira kufuma Ithri, Garebu kufuma Ithiri,

⁴¹Uria kufuma Hiti, Zabadi mwana wa Ahlai,

⁴²Adina mwana wa Shiza wa Wareubeni, kilongozi cha Wareubeni, na masikari mirongo idadu chiaimweri nao,

⁴³Hanani mwana wa Maaka, na Joshafati kufuma Mithni,

⁴⁴Uzia kufuma Ashterothi, Shama na Jeieli wana wa Hothamu kufuma Aroeri;

⁴⁵Jediaeli mwana wa Shimri, na Joha mruna, kufuma Tizi,

⁴⁶Elieli kufuma Mahawi, Jeribai na Joshavia wana wa Elinaamu, na Ithma kufuma Moabu,

⁴⁷Elieli, Obedi na Jaasieli kufuma Mezobai.