Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 13 Bible Online

1 MALAGHO GHA NGELO 13 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 13

¹Niko Daudi ukalola njama kwa wabaa wa majeshi gha maelfu na gha maghana, na kula kilongozi.

²Ukajizera ikwanyiko jose ja wandu wa Israeli “Mkawona nicha, na ikakaia ni lukundo lwa BWANA Mlungu odu, diwidumirie malagho wanidu awo wisigharikie isanga jose ja Israeli; wiche chiaimweri na wakohani na Walawi wiko mizinyi iyo iko na milamba elishira.

³Nao diiwunje kodu iyo Sanduku ya Mlungu; angu dereisighieghe kisha ingelo Sauli orekoghe mzuri.”

⁴Ikwanyiko jose jikadikia, angu agho malagho gherewiboieghe wandu wose.

⁵Kwa huwo Daudi ukawikwanya wandu wose wa Israeli kufuma Shihori ya Misri, hata andu kongiria Hamathi, wipate kuireda Sanduku ya Ilaghano kufuma Kiriath-jearimu.

⁶Niko Daudi na wandu wose wikaghenda muzi ghwa Baala nigo Kiriath-jearimu ghuko Juda, kuireda Sanduku ya Mlungu iwikilo kwa wundu ghwa irina ja BWANA ukaiagha aighu ya makerubi.

⁷Nawo wikaiduka Sanduku ya Mlungu na igare iwishi kufuma nyumbenyi kwa Abinadabu; Uza na Ahio wikakaia wikiendesha ijo igare.

⁸Daudi na Waisraeli wose werekoghe wikizuma imbiri ya Mlungu kwa ndighi rawo rose; wikibora na kukaba zeze na vinubi na mayanga, na banjo na tarumbeta.

⁹Hata iji wavika lwalenyi lochania lwa Kidroni, ng'ombe ikakuwa na Uza ukaghorua mkonu uwadie Sanduku.

¹⁰BWANA ukajokwa ni machu aighu ya Uza ukamkaba angu waghorua mkonu uiwade Sanduku, nao ukafwa ahoeni imbiri ya Mlungu.

¹¹Daudi ukawawa kwa kukaia BWANA oremkabieghe Uza; andu aja kukawangwa Perez-uza hata linu.

¹²Ituku ijo Daudi ukamuobua BWANA, nao ukaghamba, “Nidima wada kuighenja Sanduku ya Mlungu mzinyi kwapo?”

¹³Kwa huwo Daudi ndecheighenja Sanduku mzinyi kwake, ela ukaimarisha mbai na mbai na kuingira nyumbenyi kwa Obed-edomu mundu wa muzi ghwa Gathi.

¹⁴Sanduku ya Mlungu ikakaia nyumbenyi kwa Obed-edomu kwa meri idadu; BWANA ukairasimia nyumba ya Obed-edomu na vose orekoghe navo.