Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 15 Bible Online

1 MALAGHO GHA NGELO 15 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 15

¹Daudi ukakuaghia nyumba rake andenyi ya muzi ghwa Daudi; ukaboisa wulalo kwa wudu ghwa Sanduku ya Mlungu na kuidungia hema.

²Nao Daudi ukaghamba, “Mndungi ndedimagha kuiduka Sanduku ya Mlungu ela Walawi weni; angu niwo BWANA orewisaghueghe wiidukeghe Sanduku ya BWANA na kumdumikiagha toe.”

³Niko Daudi ukawikwanya Waisraeli wose aho Jerusalemu wipate kuireda Sanduku ya BWANA andu kwaro orekoghe waipoisira.

⁴Daudi ukawikwanya andwamweri kivalwa cha Haruni na Walawi sa huwu:

⁵Wa kivalwa cha Kohathi, werechieghe wandu ighana na mirongo iwi; Urieli ukikaia m'baa wawo.

⁶Wa kivalwa cha Merari, werechieghe wandu ighana na mirongo idadu, Joeli ukikaia m'baa wawo.

⁷Wa kivalwa cha Gershoni werechieghe wandu maghana awi Shemaia ukikaia m'baa wawo.

⁸Wa kivalwa cha Elizafani, werechieghe wandu maghana awi, Shemaia ukikaia m'baa wawo.

⁹Wa kivalwa cha Hebroni, werechieghe wandu mirongo wunyanya, Eleili ukikaia m'baa wawo.

¹⁰Wa kivalwa cha Uzieli, werechieghe wandu ighana na ikumi na wawi, Aminadabu ukikaia m'baa wawo.

¹¹Niko Daudi ukawiwanga wakohani, Zadoku na Abiathari, na Walawi, warandadu, Urieli, Asaria, Joeli, Shemaia, Elieli, na Aminadabu;

¹²ukawizera, “Inyo mo wabaa wa vichuku venyu awo Walawi, mukueleshe mmbeni, inyo na wanyinyu, mpate kuireda Sanduku ya BWANA, uo Mlungu wa Israeli andu kwaro naiboisira.

¹³Indo ja imbiri BWANA oredikabieghe angu inyo msereidukieghe; kwa kukaia ndedereitalieghe seji iwikilo wakfu.”

¹⁴Kwa huwo wakohani na Walawi wikakuelesha weni wipate kuireda Sanduku ya BWANA uo Mlungu wa Israeli.

¹⁵Niko Walawi wikaiduka iyo Sanduku ya Mlungu na midi maweghenyi kwawo sa iji koni Musa orelaghirieghe kunughana na ilagho ja BWANA.

¹⁶Wokoni Daudi ukawilaghira wabaa wa Walawi wiwike wakwawo webora na kukaba vombo va muziki kwa ndighi; vinubi, zeze, banjo na kufunya lwaka lwa kuboilwa.

¹⁷Walawi wikawika Hemani mwana wa Joeli; na waruna Asafu mwana wa Berekia; na wana wa Merari wa kwawo Ethani mwana wa Kushaia.

¹⁸Wakwawo wewitesia ni Zekaria, Jaazieli, Shemiramothi, Jehieli Uni, Eliabu, Benaia, Maaseia, Matithia, Elifelehu, na Mikneia; na walindiri wa mbenge Obed-edomu na Jeieli.

¹⁹Wabori Hemani, Asafu, na Ethani, werekoghe wikabeghe banjo ra shaba,

²⁰Zekaria, Azieli, Sehmiramothi, Jehieli, Uni, Eliabu, Maaseia, na Benaia, werekoghe wikabeghe vinubi va chwaka ra ndonyi;

²¹ela Matithia, Elifelehu, Mikneia, Obed-edomu, Jeieli, na Azazia werekoghe wikilongoza na zeze ra chwaka ra ighu.

²²Kenania orekoghe kilongozi wa muziki ghwa Walawi angu oreghumanyireghe.

²³Berekia na Elkana werekoghe wilindieghe mbenge ya andu kwa Sanduku ya Ilaghano.

²⁴Shebania, Joshafati, Nethaneli, Amasai, Zekaria, Benaia, na Eliezeri awo wakohani, werekoghe wikabeghe tarumbeta imbiri ya Sanduku ya Ilaghano. Obed-edomu na Jehia wori werekoghe wilindieghe mbenge ya andu kwa Sanduku ya Ilaghano.

²⁵Niko Daudi na waghosi wa Israeli na vilongozi va maelfu wikaghenda kuireda Sanduku ya Ilaghano ja BWANA kufuma nyumbenyi kwa Obed-edomu kwa kuboilwa kubaa.

²⁶Na kwa kukaia Mlungu orewiteserieghe Walawi awo weredukagha Sanduku ya Ilaghano ja BWANA, werefunyireghe kizongona cha njau mfungade na bauru mfungade.

²⁷Daudi ukarwa ijoho ja kitani ndicha, seji Walawi wose wererwaeghe awo weredukieghe Sanduku, na wabori, na Kenamia uo kilongozi wa muziki ghwa wabori. Sena Daudi ukarwa efodi ya kitani ndicha.

²⁸Na huwo Waisraeli wikaireda Sanduku ya BWANA na ngemi iendanyagha na lwaka lwa mbembe, tarumbeta na banjo, nawo wikakaba muziki m'baa ghwa vinubi na zeze.

²⁹Hata iji Sanduku ya Ilaghano ja BWANA yavika muzi ghwa Daudi, Mikali mwai wa Sauli ukazighana na idirisha, ukammbona mzuri Daudi ukivina na kuzuma; ukammenya ngolonyi kwake.