Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 16 Bible Online

1 MALAGHO GHA NGELO 16 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 16

¹Wikareda Sanduku ya Mlungu na kuingira andenyi ya hema iyo Daudi orekoghe waidunga; wikafunya vizongona vekora, na vizongona va mapatano imbiri ya Mlungu.

²Na iji Daudi wameria kufunya vizongona vekora na vizongona va mapatano, ukawirasimia wandu kwa irina ja BWANA,

³na kuwiwaghia Waisraeli wose waka na womi kula umu mkate ghumweri, kipande cha nyama, na mkate ghwa zabibu riomeshero.

⁴Chiaimweri na huwo, Daudi ukawada Walawi wamu wiendeshe wutasi imbiri ya Sanduku ya Mlungu wa Israeli.

⁵Asafu orewikiloghe ukaie m'baa, na mtesia wake ukaie Zekaria. Wandu wekaba vinubi na zeze ni Jeieli, Shemiramothi, Jehieli, Matithia, Eliabu, Benaia, Obed-edomu na Jeieli. Asafu orekoghe mkabi banjo.

⁶Benaia na Jahazieli awo wakohani werekoghe wikabeghe tarumbeta ngelo rose imbiri ya Sanduku ya Ilaghano ja BWANA.

⁷Niko ahoeni Daudi ukammbika Asafu na waruna wibore lumbo lomfunyira BWANA chawucha kwa indo ja imbiri.

⁸Mnekenyi BWANA chawucha mumtase; ghorienyi wandu wa mbari zima malagho gha mabonyo ghake.

⁹M'borienyi, mumkase; ghorenyi malagho ghose gha kazi rake rose ra mashiniko!

¹⁰Kukasenyi na BWANA; awo wose wimtasagha ndewiboilo.

¹¹Ghendenyi kwa BWANA umtesie; lolenyi kukanya nao tuli tuli.

¹²Kumbukenyi kazi ubonyere ra mashiniko; weke mwakilimbiti wake, na matanyo ghake.

¹³Ee kivalwa cha Abrahamu mdumiki wake, wana wa Jakobo, wasaghulwa wake!

¹⁴BWANA ni Mlungu odu, matanyo ghake ni kwa wundu ghwa wurumwengu ghose.

¹⁵Wawuyatala ilaghano jake kwa kala, ijo orejilaghirieghe kwa vivalwa elfu.

¹⁶Ilaghano orejibonyereghe na Abrahamu, ijo ilaghiro oremghemieghe Isaaka;

¹⁷orejimangishireghe kwa Jakobo jikaie sharia, kwa Israeli jikaie ilaghano ja kala na kala.

¹⁸Oreghambieghe “Nichakuneka isanga ja Kanaani jikaie ifwa jako.”

¹⁹Wandu wa Mlungu werekoghe watinieri; waghenyi andenyi ya isanga ja Kanaani.

²⁰Werekoghe wikimara-mara masangenyi, kufuma wuzuri ughu hata wuzuri ughu.

²¹Mlungu ndeorerumirieghe mndungi uwikoronge; ukawidokia wazuri kwa wundu ghwawo.

²²Ukighamba, “Msakeadada wadungwa mavuda wapo, msakewibonya walodi wapo ilagho jingi.”

²³M'borienyi BWANA wurumwengu ghose! Ghorenyi malagho gha kukia kwake ituku ituku.

²⁴Ereshenyi wubaa ghwake aghadi ya mbari zima, na kazi rake ra mashiniko aghadi ya wandu wose.

²⁵BWANA ni m'baa, ufwane ukaso nandighi; wafwana kuobolwa kuchumba milungu yose.

²⁶Angu milungu yose ya wandu, ni milimu, ela BWANA oreumbieghe mlungunyi.

²⁷Wubaa na ishima vammara chia rose, wudimi na kughoka vaichura Hekalu yake.

²⁸Mkasenyi BWANA inyo wandu wose ndoenyi, kasenyi wubaa na kudima kwake.

²⁹Kasenyi irina ja BWANA ja wubaa redenyi mafunyo, mngie Hekalunyi kwake.

³⁰Mtasenyi BWANA na marwao gha wueli sughusikenyi imbiri kwake ndoenyi kose. Ee, wurumwengu ghoomanga gi, najingi ndeghuinjikagha.

³¹Mlungunyi ndekuboilo, ndoenyi kuzume; nderighore, “BWANA wabonya nguma.”

³²Bahari ndeirurume, na vose vichue andenyi yaro; mbuwa nderiboilo na vose viko andenyi yaro.

³³Niko midi ya msidu ichabora kwa kuboilwa, iji BWANA uchagha kughutanya wurumwengu.

³⁴Mfunyirenyi BWANA chawucha angu ni mucha; lukundo lwake lukatie lwadua kwa kala.

³⁵Nenyo wori ghorenyi: “Kudikire ee Mlungu Mkiri odu; kuditumbanye na kudivuvua kufuma kwa iro mbari; dipate kukufunyira chawucha na kujikasa irina jako ja wueli.”

³⁶BWANA, uo Mlungu wa Israeli ndekaso! Ndekaso kwa kala na kala! Niko wandu wose wikaghamba, “Amen!” nawo wikamkasa BWANA.

³⁷Nao Daudi ukammbika Asafu na waruna Walawi wikaie wadumiki weendesha wutasi kari kose imbiri ya Sanduku ya Ilaghano ja BWANA seji erekundikieghe kula ituku.

³⁸Obed-edomu wori orekoghe ukiwitesia na wakwawo mirongo irandadu na wunyanya. Obed-edomu moni uo mwana wa Jeduthuni, na Hosa, werekoghe walindiri wa mbenge.

³⁹Daudi ukamsigha mkohani Zadoku na wakwawo wiko wakohani widumike andu kwa wutasi ghwa BWANA aho korewikiloghe aja Gibeoni;

⁴⁰umfunyire BWANA vizongona vekora aighu ya madhabahu nakesho na luma lwa kenyi tulituli, kunughana na sharia ya BWANA iandikilo seji Waisraeli werelaghiroghe.

⁴¹Hemani na Jeduthuni werekwanyeghe nawo, na wazima aweni weresaghuloghe kwa marina; wimfunyireghe BWANA chawucha, angu lukundo lwake lukatie lwadua matuku ghose.

⁴²Hemani na Jeduthuni werekoghe na tarumbeta na banjo kukaia vombo va muziki ghobora chumbo ra Mlungu; na wana wa Jeduthuni werewikiloghe wikaie walindiri wa mbenge.

⁴³Niko wandu wose wikaghala kula mundu nyumbenyi kwake; na Daudi ukawuya cha mzinyi kwake kuwirasimia wandu wake.