Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 18 Bible Online

1 MALAGHO GHA NGELO 18 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 18

¹Konyuma Mzuri Daudi ukawikaba Wafilisti na kuwisima. Ukawisoka muzi ghwa Gathi chiaimweri na mizi yaro mitini mitini.

²Wokoni Daudi ukawisima Wamoabu, nawo wikawuya wadumiki wake, wikamlipa kodi.

³Daudi ukalwa na Mzuri Hadadezeri, wa isanga ja Siria ja Soba, ukamsima kaavui na Hamathi ngelo oreghendagha kuwonyera nguma rake kaavui na Moda ghwa Eufrate.

⁴Daudi ukamsoka magare elfu imweri, wajoki farasi elfu mfungade, na masikari wa maghu elfu mirongo iwi; ukadumbua mighenu ya farasi rose ra magare, ukaasigha rikatagha magare ighana jimweri.

⁵Hata iji Wasiria wa Dameshki wacha kumtesia Hadadezeri mzuri wa Soba, Daudi ukawibwagha Wasiria elfu mirongo iwi na wawi.

⁶Niko Daudi ukawika bonjo ya masikari aho Siria ya Dameshki, na Wasiria wikawuya wadumiki wa Daudi, wikamlipa kodi. BWANA ukamneka Daudi wusimi andu kose oreghendieghe.

⁷Daudi ukadwa ngao ra dhahabu rerekoghe rikidukwa ni wadumiki wa Hadadezeri ukarireda Jerusalemu.

⁸Daudi ukadwa shaba nyingi nandighi kufuma mizi ya Tibhathi na Kuni iyo erekoghe ya Hadadezeri, na iyo shaba niyo Solomoni orebonyereghe nayo itangi ja shaba, nguro na vilambo va Hekalunyi.

⁹Nao iji Tou mzuri wa Hamathi wasikira angu Daudi wasimie ijeshi jose ja Hadadezeri mzuri wa Soba,

¹⁰ukamduma mwana wake Hadoramu kwa mzuri Daudi uchemroghua na kumkuma kwa kulwa na Hadadezeri na kumsima; angu Hadadezeri orekoghe ukibonya wuda na Tou kalazi koni. Ukamghenjera vilambo va kula mbari; va dhahabu, va feza, na va shaba.

¹¹Vilambo ivo wori mzuri Daudi ukavifunya kwa BWANA chiaimweri na feza na dhahabu iyo oreidwaeghe kufuma Edomu, Moabu, na kwa Waamoni, Wafilisti, na Waamaleki.

¹²Abishai mwana wa Seruia, ukawibwagha Waedomu wandu elfu ikumi na wunyanya Vololo ya Chumbi.

¹³Ukawika bonjo ya masikari Edomu, na Waedomu wose wikawuya wadumiki wa Daudi. BWANA ukamneka Daudi wusimi andu kose oreghendieghe.

¹⁴Kwa huwo Daudi ukabonya nguma aighu ya Israeli yose; nao ukawibonyera loli na hachi wandu wake wose.

¹⁵Joabu mwana wa Seruia orekoghe m'baa wa majeshi; Jehoshafati mwana wa Ahiludi orekoghe ukiandika vilambo,

¹⁶Zadoku mwana wa Ahitubu, na Ahimeleki mwana wa Abiathari, wereoghe wakohani, na Shavsha orekoghe mwandiki.

¹⁷Benaia mwana wa Jehoiada orekoghe m'baa wa walindiri wa mzuri, na wana wa Daudi werekoghe wabaa wa wudumiki ghwa mzuri.