Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 22 Bible Online

1 MALAGHO GHA NGELO 22 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 22

¹Niko Daudi ukaghamba, “Aeni aha niko koni Hekalu ya BWANA Mlungu na madhabahu ekoria vizongona va wandu wa Israeli ichaakaia.”

²Daudi ukawikwanya waghenyi wose werekoghe wikikaia andenyi ya isanga ja Israeli, ukawika wandu wedumbua magho, na kughiwadia ghitumilo kuagha Hekalu ya Mungu.

³Wokoni Daudi ukawika vuma kwa wundu ghwa misumari ebonya minyango ya mbenge na virughio varo chiaimweri na shaba isepimikagha,

⁴mbau ra misida risetalikagha; angu Wasidoni na Watiro weremredieghe Daudi misida mingi nandighi.

⁵Kwa kukaia Daudi oreghambieghe “Mwana wapo Solomoni ni mkoo, ndeichi malagho, na iyo Hekalu iaghilwagha Mlungu suti ikaie mbaa loli-loli, ikumikie iko na sare mbaa isangenyi kose; ini nichaitumbanyira vilambo.” Kwa huwo Daudi orefunyireghe vilambo vingi veiagha imbiri usefue.

⁶Nao ukamdumiria mwana wake Solomoni, ukamlaghira umuaghie BWANA, uo Mlungu wa Israeli Hekalu.

⁷Daudi ukamzera Solomoni, “Mwana wapo, nerekoghe na maghesho gheagha Hekalu emtasira BWANA Mlungu wapo.

⁸Ela BWANA ukanizera kukaia neelwa wuda nandighi, ngadia bagha nyingi ndoenyi; kwa huwo sichaamuaghia Hekalu emtasira.

⁹Ola kuvailwa mwana, nao uchakaia mundu wa sere. Nichamneka kukaia na sere na wamaiza wako mbai mbai kose na uo moni uchawangwa Solomoni; na ngelo ya matuku ghake, nichawineka Waisraeli kukaia na sere na kuhora.

¹⁰Uchaagha Hekalu kwa wundu ghwapo. Uchakaia mwana wapo, nani nichakaia ndee; nani nichachimangisha kifumbi cha wuzuri ghwake aighu ya Israeli matuku ghose.”

¹¹Daudi ukachuria, “Idana mwanwapo, kaia na BWANA; eri kudime kuagha Hekalu ya BWANA Mlungu wako seji koni ughorie malagho ghako.

¹²BWANA ndekuneke suku na kutambukilwa, eri ingelo wakuwika aighu ya Wasraeli, kupate kuwibonyera nguma kwa Sharia ya BWANA Mlungu wako.

¹³Kawona kwariwadia nicha sharia na mafundisho agho BWANA oremlaghirieghe Musa kwa wundu ghwa Israeli, kuchapata mecha. Kaia na ndighi na ngolo mbaa. Kusakeobua hata kusengilo ni kiture chingi.

¹⁴Ini nakufungishire ndighi ngapata vilambo veagha nyumba ya BWANA; tani ra kimetriki elfu idadu na maghana ana ra dhahabu, tani ra kimetriki richumbagha elfu mirongo idadu na inya ra feza, shaba na chuma iro nderine mtalo; angu ni nyingi nandighi; nafunyire mbau na magho wori. Suti kuchurie.

¹⁵Koko na wandu wa kazi wengi nandighi; wawachi magho, waaghi magho, wawadi nyumba, na mafundi gha kula mbari ghisene mtalo; wimanyire kubonya kazi

¹⁶ya dhahabu, feza, shaba, na chuma. Idana zoya kazi; na BWANA ndekaie na kumoni.”

¹⁷Wokoni Daudi ukawilaghira vilongozi vose va Israeli wimtesie mwana wake Solomoni ukighamba,

¹⁸“Wele nechi BWANA Mlungu onyu oko andwamweri nenyo, nao wamnekie sere chia rose; kwa kukaia wawinekie waisanga mikonunyi kwapo, na isanga jeko aisi yapo imbiri ya BWANA na wandu wake.

¹⁹Idana mumlole BWANA Mlungu onyu kwa ngolo renyu na akili renyu rose. Zoyenyi kumuaghia BWANA Mlungu Andu kwa Wueli, eri Sanduku ya Ilaghano ja BWANA na vilambo va wueli va Mlungu vipate kungirwa Hekalunyi iaghilo kwa wundu ghomtasiragha.”