Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 26 Bible Online

1 MALAGHO GHA NGELO 26 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 26

¹Agha nigho mawaghio gha kazi kwa Walawi awo walindiri wa Hekalu. Kufuma kwa kichuku cha Kora korekoghe na Meshelemia mwana wa Kore wa kivalwa cha Asafu.

²Meshelemia orekoghe na wana mfungade: wa imbiri ni Zekaria, wa kawi ni Jedigeli, wa kadadu ni Zebadia, wa kana ni Jethnieli,

³na wa kasanu ni Elamu, wa karandadu ni Jehhani, wa mfungade ni Eliehoenai.

⁴Obed-edomu wokoni orekoghe na wana wunyanya: Wa imbiri kuvalwa ni Shemaia, wa kawi ni Jehozabadi, wa kadadu ni Joa, wa kana ni Sakari, wa kasanu ni Nethaneli,

⁵wa karandadu ni Amieli, wa mfungade ni Isakari wa wunyanya ni Peulethai; angu Mlungu oremrasimieghe.

⁶Mwana wake Shemaia wori orevailoghe wana warandadu werekoghe vilongozi va kinyumba cha mzawo, angu werekoghe wandu wiko na kudima.

⁷Wana awo werekoghe Othni, Refaeli, Obedi, Elizabadi, Elihu na Semakia; awo wawi wa kutua, werechumbieghe wambao.

⁸Kinyumba cha Obed-edomu cherekoghe na wandu mirongo irandadu na wawi; wandu wiko na kudima, wiichi ugho wudumiki.

⁹Meshelemia orekoghe na wana na waruna wiko na kudima, wandu ikumi na wunyanya.

¹⁰Hosa wa kichuku cha Merari orekoghe na wana; m'baa wawo ni Shimri (nao hata ngera suo ungi orevaloghe imbiri, ndee orem'bonyereghe ukaie m'baa),

¹¹Hilkia ni wa kawi, Tebalia ni wa kadadu, Zekaria ni wa kana. Wana wose wa Hosa chiaimweri na waruna, werekoghe wandu ikumi na wadadu.

¹²Walindiri wa Hekalu werewaghiloghe kunughana na wabaa wawo, werekoghe na mazughe ghedumika andenyi ya Hekalu ya BWANA kara kara na waruna Walawi.

¹³Kula kinyumba cherekabieghe kura, chikaiagha kingi angu kitini kumanya ni mbenge iao wiidumikiagha.

¹⁴Kura ya mbenge ya mashariki eremghueghe Shelemia. Wokoni wikamkabia kura mwana wake Zekaria, mnjama uwadie akili, na kura yake ikamghuya ukaie cha kaskazinyi.

¹⁵Obed-edomu oreghuloghe ni kura chia ya kusinyi na wana wake wikanekwa kazi ya nyumba ewika vilambo.

¹⁶Shupimu na Hosa wereghuloghe ni kura ekaia cha magharibi; andu mbenge ya Shalekethi iko, kwa iyo chia ijokagha. Mazughe gherekoghe ghikatane.

¹⁷Cha mashariki korekoghe wandu warandadu kula ituku, cha kaskazinyi wandu bana kula ituku, cha kusinyi wandu bana kula ituku, na kwa nyumba ewika vilambo wandu wawi-wawi.

¹⁸Kwa wundu ghwa waza ichia cha magharibi, korekoghe wandu bana welindia chia, na wawi andenyi wazenyi.

¹⁹Huwu niko werewaghiloghe awo walindiri wa mbenge werefumieghe kwa Wakohathi na kichuku cha Merari.

²⁰Kufumanya na Walawi, Ahija orekoghe ukizighana mali ya nyumba ya Mlungu, na nyumba ra vilambo vifunyiro manosi vikawikwa wakfu.

²¹Ladani, umu wa wana wa Gershoni orekoghe ndee wa vinyumba vingi, chiaimweri na kinyumba cha mwana wake Jehieli.

²²Wana wa Jehieli wiwangwaghwa Zethamu na mruna Joeli werekoghe wazighaniri wa mali ra Hekalu ya BWANA.

²³Kazi rikawaghwa kwa kivalwa cha Amramu, Izhari, Hebroni, na Uzieli.

²⁴Shebueli mwana wa Gershomu wawae Musa, orekoghe m'baa wa wazighaniri wa mali ra Hekalu.

²⁵Waruna werefumanyeghe na Eleazari, ni mwana wa Eliezeri, Rehabia; ndee Jeshaia, ndee Joramu, ndee Zikri; ndee Shelomothi.

²⁶Uhu Shelomothi na waruna niwo werekoghe wazighaniri wa mali yose erefunyiroghe manosi agho gherewikiloghe wakfu ni Mzuri Daudi na wabaa wa vinyumba va wandu na wabaa wa maelfu na wa maghana na wabaa wa majeshi.

²⁷Werefunyireghe vilambo wereviwadieghe wudenyi na kuviwika wakfu vidumike kwa Hekalu ya BWANA.

²⁸Shelomothi na kivalwa chake werekoghe wazighaniri wa vilambo verewikiloghe wakfu vidumikeghe Hekalunyi, chiaimweri na manosi gherefunyiroghe ni mlodi Samueli, Mzuri Sauli, Abneri mwana wa Neri na Joabu mwana wa Seruaia.

²⁹Awandu werefumanyeghe na kivalwa cha Ishari, Kenamia na wana wake werenekeloghe kazi rewizighana Waisraeli sa wabaa na watanyi.

³⁰Awa werefumanyeghe na kivalwa cha Hebroni, Hashabia na wamzawo, wandu elfu na maghana mfungade, werekoghe wikiwizighana Waisraeli wiko magharibi ya Moda ghwa Jordani kwa kazi yose ya BWANA na kwa wudumiki ghwa mzuri.

³¹Jerija orekoghe Mhebroni nao orekoghe m'baa wa Wahebroni kuseko kutala kinyumba angu kichuku. Mwaka ghwa mirongo ina ghwa kubonya nguma kwa Daudi, malagho gha Wahebroni ghereloleloghe, na wandu wamu waro wiko mang'oni wikaandawoneka Jazeri ya Gileadi.

³²Mzuri Daudi ukammbika Jerija na waruna, wandu elfu iwi na maghana mfungade wiko na kudima wikaie wabaa wa vinyumba va Wareubeni, na Wagadi, na nusu ya kichuku cha Manase kwa kula ilagho ja maza ra Mlungu, na maza ra mzuri.