Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 28 Bible Online

1 MALAGHO GHA NGELO 28 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 28

¹Mzuri Daudi ukawikwanya wabaa wose wa Israeli Jerusalemu. Kwa huwo wabaa wose wa vichuku, wabaa wose weredumikagha kazi ra wazuri, vilongozi va vinyumba, na wazighaniri wa mali na mfugho ra mzuri, na wabaa wose wa ngome ya mzuri wikakwanyika Jerusalemu.

²Niko Mzuri Daudi ukawuka kimusi ukaghamba: “Nisikirenyi wandu wapo; nerewonieghe niagha nyumba ewika Sanduku ya Ilaghano ja BWANA, icho kifumbi cha Mlungu chewikiria maghu ghake; ngakutumbanya to niaghe.

³Ela Mlungu ukanizera, ‘Ndeikufwane kuniaghie nyumba, angu ko ing'oni ja wuda jidirie bagha nyingi.’

⁴Sena BWANA Mlungu wa Israeli wanisaghue ini na kivalwa chapo niwibonyere Israeli nguma matuku ghose. Oremsaghueghe aba kufuma kwa kichuku cha Juda. Kufuma kwa icho kichuku ukanisaghua nikaie mzuri aighu ya Israeli yose.

⁵Na kwa wana wapo wose (angu waninekie wana wengi) wamsaghue mwana wapo Solomoni ubonye nguma aighu ya Israeli, ugho wuzuri ghwake.

⁶“BWANA ukanizera, ‘Mwana wako Solomoni, nuo uchaagha Hekalu yapo na waza rapo, angu namsaghue ukaie mwana wapo, nani nichakaia ndee.

⁷Nichaghumangisha wuzuri ghwake matuku ghose iji wadua ukiiwadia memu yapo na mafundisho ghapo seji yawuyakaia idime.’

⁸“Kwa huwo idana inyo wandu wapo, namlaghira imbiri ya Mlungu na iji ikwanyiko ja wandu wose wa Israeli, muinughe na kuiwadia memu yose ya BWANA Mlungu onyu, mpate kujiwusa iji isanga jiboie, nenyo mpate kujisighia wana wenyu nyuma yenyu jikaie ifwa ja kala na kala.

⁹“Na oho mwana wapo Solomoni, kummanye Mlungu wa ndeyo, na kukufunya kumdumikia kwa ngolo yose; kwa kukaia BWANA waichi maghesho na bea redu rose. Kukamghendia, uchakurumiria; ela kukamsigha, uchakudagha noko toe.

¹⁰Idana kukulindie, angu BWANA wakusaghue kuiaghe Hekalu yake ya Wueli. Kaia na ndighi kuiaghe kwa ngolo.”

¹¹Niko Daudi ukamneka mwana wake Solomoni mchoro ghwa maaghi ghose gha Hekalu, na vumba varo; vumba vewika mali, vumba va ghorofa, vumba va ndenyi, na chumba cha kifumbi cha wughoma;

¹²na mchoro ghwa kula ilagho jerekoghe chongonyi kwake kwa wundu ghwa waza ra nyumba ya BWANA. Andu kwa mali ya nyumba ya Mlungu, na andu kwa manosi ghiwikilo wakfu;

¹³ukammbonyera seji wakohani wichaawaghwa mafungu, na Walawi, na kazi rose ribonywagha kwa wundu ghwa wudumiki ghwa Hekalu ya BWANA. Ukammbonyera vilambo vedumika andenyi ya Hekalu ya BWANA.

¹⁴Ukamghoria wulemeri ghwa dhahabu ebonya vilambo vose va dhahabu kwa wundu ghwa wudumiki, na wulemeri ghwa feza wori kwa wundu ghwa wudumiki.

¹⁵Dhahabu ebonya vinara va taa, na taa raro, na feza ebonya kinara cha taa na taa raro kunughana na seji kula kinara cha taa chidumikagha.

¹⁶Dhahabu ebonya kula meza ewikiria mikate ifunyiro kwa Mlungu, na feza ebonya meza ra feza.

¹⁷Wokoni ukamlaghira kipimo cha dhahabu ielie uchaatumia kubonya njaghi na uma, beseni, bakuli ra dhahabu.

¹⁸Na kwa wundu ghwa madhahabu ibonywagha ya dhahabu ielie, andu marumba ghikorelwagha, na mchoro ghwa igare ja dhahabu kwa wundu ghwa makerubi wighoruagha mawawa ghawo na kuifinikira Sanduku ya Ilaghano ja BWANA.

¹⁹Mzuri Daudi ukaghamba, “Kazi ihi erekoghe ikibonywa kunughana na mchoro seji BWANA moni orenilaghirieghe.”

²⁰Niko Daudi ukamzera mwana wake Solomoni, “Kaia na ndighi na ngolo mbaa, kuibonye iyo kazi. Kusakeobua, hata kusekaie na kiture chingi, angu BWANA Mlungu, Uo Mlungu wapo oko andwamweri na oho. Ndechaalemwa angu kukusigha hata kazi yose ya wudumiki ghwa Hekalu yasia.

²¹Wona seji wakohani wa Walawi wiwaghilo wudumiki ghwa Hekalu; Wandu wa kazi wichue wuya ghwa kazi wichakutesia, na wandu wose chiaimweri na vilongozi vawo weko aisi ya nguma rako.”