Read TAITA BIBLE – Biblia Ilagho Jiboie Kwa Wandu Wose 1 MALAGHO GHA NGELO 9 Bible Online

1 MALAGHO GHA NGELO 9 - TAITA BIBLE – Biblia Ilagho Jiboie Kwa Wandu Wose bible

1 MALAGHO GHA NGELO 9

¹Wandu wa Israeli wose wereandikiloghe kunughana na nyumba rawo. Malagho agha ghaandikilo andenyi ya Chuo cha Wazuri wa Israeli. Wandu wa Juda werebarishiroghe cha Babuloni sa ikabo kwa wundu ghwa kaung'a rawo.

²Wandu werezoeghe kuwuya na kukaia mizinyi ni Waisraeli, wakohani, Walawi, na wadumiki wa Hekalunyi.

³Wandu wa Juda, Benjamini, Efraimu, na Manase, werekaieghe Jerusalemu; nawo ni:

⁴Uthai mwana wa Amihudi, wawae Omri, wa kichuku cha Bani, Perezi, na Juda.

⁵Washiloni werekoghe Asaia uo orevaloghe wa imbiri, na wana wake.

⁶Wana wa Zera werekoghe Jeueli, na wamzawo, wandu wa Juda wose ni maghana arandadu na mirongo ikenda.

⁷Wabenjamini werekoghe na kivalwa chinughane huwu: Salu, Meshulamu, Hodavia, Hasenua,

⁸na Ibneia mwana wa Jerohamu, Ela mwana wa Uzi, wawae Mikri, na Meshulamu mwana wa Shefatia wawae Reueli, wa Wen-Ibrija.

⁹Wamzawo kunughana na kivalwa chawo werekoghe, wandu maghana ikenda na mirongo misanu na warandadu. Awa wose werekoghe wabaa wa nyumba ra weke ndee.

¹⁰Wakohani werekoghe Jerusalemu ni: Jedaia, Jehoiaribu, Jakini,

¹¹na Azaria mwana wa Hilkia, wawae Meshulamu; Zadoku mwana wa Meraiothi, wawae Ahitubu; nao orekoghe m'baa wa nyumba ya Mlungu;

¹²na Adaia mwana wa Jerohamu, wawae Pashuri mwana wa Wen-Malkija na Maaseia mwana wa Adieli, wawae Jahizera, na Meshulamu mwana wa Meshilemithi wawae Imeri.

¹³Wakohani awo werekoghe vilongozi va mzawo werekoghe wandu elfu imweri maghana mfungade na mirongo irandadu. Wandu werekoghe na ndighi nyingi rebonya kazi ya wudumiki ghwa Hekalu ya Mlungu.

¹⁴Walawi werekoghe Jerusalemu ni: Shemaia mwana wa Hashubu, wawae Azrikamu, mwana wa Hashabia wa kichuku cha Merari.

¹⁵Bakibakari, Hereshi, Galali na Matania mwana wa Mika, wawae Zikri, mwana wa Asafu.

¹⁶Obadia mwana wa Shemaia, wawae Galali, mwana wa Jeduthuni. Berekia mwana wa Asa wawae Elkana uo orekoghe ukikaia mizi ya Wanetofathi.

¹⁷Walindiri werekoghe Jerusalemu ni: Shalumu, Akubu, Talmoni, na Ahimani. Shalumu orekoghe m'baa wawo.

¹⁸Kutuonyi kwa ngelo iyo werewikiloghe wikaie walindiri wa Mbenge ya mzuri iichia cha mashariki. Koimbiri werekoghe walindiri wa mbenge ya kambi ya Walawi.

¹⁹Shalumu mwana wa Kore, wawae Ebiasafu, na wamzawo wa kivalwa cha Kora, werekoghe walindiri wa andu kongiria kwa Hema ekwania, sa iji koni weke ndee werebonyagha iji werekoghe walindiri wa kambi ya BWANA.

²⁰Finehasi mwana wa Eleazari ukakaia ukiwibonyera nguma iyo ngelo iidie, na BWANA orekwanyeghe nao.

²¹Zekaria mwana wa Meshelemia orekoghe mlindiri wa mnyango ghwa Hema ekwania.

²²Wandu awa wose weresaghuloghe wikaie walindiri wa andu kongiria na mbengenyi. Werekoghe maghana awi ikumi na wawi. Wereandikishiroghe kunughana na vivalwa vawo mizinyi kwawo. Daudi na mlodi Samueli niwo werewinekieghe iro kazi ra ishima.

²³Kwa huwo, awo chiaimweri na kivalwa chawo, werekoghe wabaa wa mbenge ra Hekalu ya BWANA, iyo erewangwagha Hema, wikakaia wikiilindia.

²⁴Walindiri wa mbenge werekoghe wa chuwaru inya: mashariki, magharibi kaskazinyi na kusinyi.

²⁵Wamzawo werekoghe cha mizinyi werekoghe wikicha nyuma ya matuku mfungade kutesiana nawo.

²⁶Wabaa bana wa walindiri, werekoghe Walawi, nawo niwo werekoghe wazighaniri wabaa na walindiri wa vumba va mali ra Hekalu na vilambo verefunywagha aho.

²⁷Wikakaia wikilala Hekalunyi angu werekoghe na kazi elindia na kurughua minyango kula nakesho.

²⁸Walawi wamu werekoghe na kazi ya wuzighaniri ghwa vilambo vedumika, angu erekundikieghe vitaloghe iji vakafunywa angu kuwunjwa.

²⁹Wamu werewikiloghe wizighane vilambo vetumia na vilambo vedeka va wueli, na mufu ghudendere, na divei, na mavuda, marumba, na vilungo.

³⁰Ela wakohani niwo werekoghe wikiboisa mranganyo ghwa vilungo.

³¹Mlawi umu uwangwagha Matithia, mwana wa imbiri wa Shalumu, wa kivalwa cha Kora orekoghe mzighaniri obonya mikate ya vishawalata.

³²Wokoni wandu wamu wa kivalwa cha Kohathi, werekoghe wazighaniri weboisa mikate ifunywaghwa kwa Mlungu kula ituku ja Sabato.

³³Walawi wamu wiko wabaa wa wamzawo werekoghe wabori, ndewerekoghe na kazi ingi zima nawo werekoghe wikikaia Hekalunyi angu werekoghe na kazi ya kio na dime.

³⁴Wandu awo wose werekoghe wabaa wa nyumba ra Walawi kunughana na kivalwa chawo, nawo werekoghe wikikaia Jerusalemu.

³⁵Jeieli nuo uzoe kuwona muzi ghwa Gibeoni, ukakaia aho. Mkake orewangwaghwa Maaka.

³⁶Mwana wake wa imbiri orewangwaghwa Abdoni. Wana wake wamu ni Suri, Kishi, Baali, Neri, Nadabu,

³⁷Gedori, Ahio, Zekaria, na Miklothi,

³⁸ndee Shimea. Awa wori werekoghe wikikaia Jerusalemu kulangaya wamzawo.

³⁹Neri ni ndee Kishi, na Kishi ni ndee Mzuri Sauli orekoghe na wana bana: Jonathani, Malshua, Abinadabu, na Esh-baali.

⁴⁰Mwana wa Jonathani Merib-baali, uo oremvaeghe Mika.

⁴¹Mika orekoghe na wana bana: Pithoni, Meleki, Tahrea, na Ahazi.

⁴²Ahazi oremvaeghe Jara, uo orekoghe na wana wadadu: Alemethi, Azmawethi, na Zimri; Zimri ukamva Mosa.

⁴³Mosa oremvaeghe Binea, kivalwa chake chikanughana huwu: Refaia, Eleasa na Aseli.

⁴⁴Aseli orekoghe na wana warandadu: Azrikamu, Bokeru, Ishmaeli, Shearia, Obadia, na Hanani.