Read TAITA BIBLE – Biblia Ilagho Jiboie Kwa Wandu Wose 2 MALAGHO GHA NGELO 11 Bible Online

2 MALAGHO GHA NGELO 11 - TAITA BIBLE – Biblia Ilagho Jiboie Kwa Wandu Wose bible

2 MALAGHO GHA NGELO 11

¹Nao iji Rehoboamu wacha Jerusalemu, ukawikwanya wandu wa Juda na Benjamini, wandu elfu ighana na mirongo wunyanya wisaghulo mang'oni gha wuda, wiendelwa na wandu wa Israeli, wipate kughuwunja wuzuri kwa Rehoboamu.

²Ela BWANA ukaghora na Shemaia mundu wa Mlungu ukighamba,

³“Mzere Rehoboamu mwana wa Solomoni mzuri wa Juda, na wandu wose wa Israeli wiko isanga ja Juda na ja Benjamini,

⁴kukaia ini BWANA naghora huwu: ‘Msejoke kulwa na wanyinyu. Kula mundu ughale mzinyi kwake, angu iji ilagho jaafuma kwapo.’” Niko wikasikira seji BWANA ughambie, wikawuya hata ndewicheghenda kulwa na Jeroboamu.

⁵Rehoboamu orekoghe ukikaia Jerusalemu, ukaagha mizi ekulindia andenyi ya Juda.

⁶Ukaagha Bethlehemu, Etamu, Tekoa,

⁷Beth-suri, Soko, Adulamu,

⁸Gathi, Maresha, Zifu,

⁹Adoraimu, Lakishi, Azeka,

¹⁰Sora, Aijaloni, na Hebroni nayo ni mizi ya ngome iko andenyi ya Juda na Benjamini.

¹¹Oreriaghieghe ngome rimange nandighi, ukawika vilongozi andenyi, na vindo, mavuda na divei.

¹²Ukawika ngao na mafumu mizi yose na kuibonya ikaie na ndighi loli loli. Kwa huwo oochawadia Juda na Benjamini.

¹³Nao wakohani na Walawi wikafuma andu kose kwa Israeli, wikamghendia Rehoboamu.

¹⁴Walawi weresighieghe masanga ghawo na mali rawo wikacha Juda, kwa kukaia Jeroboamu na wana wake werewighirieghe wisedumike sa wakohani wa BWANA.

¹⁵Ukawika wakohani wake moni wedumika andu kotasira mighondinyi, na kudumikia majini, na fwana ya ngache oreibonyereghe.

¹⁶Na wandu wifumie vichuku vose va Israeli, awo werekoghe na ngolo emlola BWANA Mlungu wa Israeli, wikanughana na Walawi cha Jerusalemu, wipate kumfunyira BWANA kizongona, uo Mlungu wa weke ndee.

¹⁷Wikaghubonya wuzuri ghwa Juda ghukaie na ndighi, na kwa miaka idadu wikam'bonya Rehoboamu mwana wa Solomoni kukaia na wulindiri ghukate, angu kwa miaka idadu werenughieghe seji Daudi na Solomoni werekoghe wikibonya.

¹⁸Rehoboamu orelowueghe Mahalathi mwai wa Jerimothi wawae Daudi, na mae orekoghe Abihaili mwai wa Eliabu wawae Jese;

¹⁹nawo wikava wana wa womi; Jeushi, Shemaria, na Zahamu.

²⁰Konyuma ukalowua Maaka mwai wa Absalomu; wikava Abija, Atai, Ziza, na Shelomithi.

²¹Rehoboamu ukamkunda Maaka mwai wa Absalomu kuchumba waka wake wose na waka wake wekanya wose (orelowueghe waka ikumi na wunyanya, na waka wekanya mirongo irandadu; ukava wana mirongo iwi na wunyanya wa womi, na wa waka mirongo irandadu).

²²Rehoboamu ukammbika Abija mwana wa Maaka ukaie m'baa aghadi ya waruna, angu orekundieghe um'bonye mzuri.

²³Rehoboamu ukabonya malagho kwa hikima; ukawineka wana wake wamu kazi mizinyi yose ja Juda na Benjamini, andenyi ya iyo mizi yose erekoghe na ngome. Ukawineka vindo vingi, na kuwilolia waka.