Read TAITA BIBLE – Biblia Ilagho Jiboie Kwa Wandu Wose 2 MALAGHO GHA NGELO 12 Bible Online

2 MALAGHO GHA NGELO 12 - TAITA BIBLE – Biblia Ilagho Jiboie Kwa Wandu Wose bible

2 MALAGHO GHA NGELO 12

¹Hata iji wuzuri ghwa Rehoboamu ghwamanga na kukaia na ndighi, uo, na Waisraeli wose, wikaisigha Sharia ya BWANA.

²Nao mwaka ghwa kasanu ghwa kubonya nguma kwake, Shishaki mzuri wa Misri ukajoka kulwa na Jerusalemu, angu weresighieghe kukaia waloli kwa BWANA.

³Ukacha na magare elfu ikumi na iwi, na wajoki farasi elfu mirongo irandadu. Wandu wisene mtalo; Walibia, Wasuki, na Wakushi wichanye nao kufuma Misri.

⁴Ukaiwada mizi ya ngome ya Juda, ukacha hata Jerusalemu.

⁵Niko mlodi Shemaia ukacha kwa Rehoboamu na wabaa wose wa Juda werekwanyikieghe Jerusalemu kwa wundu ghwa Shishaki, ukawizere, “BWANA waghora huwu, ‘Muendanisigha nani moni neemsigha mkabo ni Shishaki.’”

⁶Niko mzuri na wabaa wa Israeli wikakusera na kughamba, “BWANA ni mhachi.”

⁷BWANA uendawona angu wakusera ukaghora na Shemaia ukighamba, “Angu wakusera, sichaawitotesha; nichawineka wusimu ghumu, hata sichaamtumia Shishaki kuwonyera machu ghapo aighu ya Jerusalemu anduangi.

⁸Elaima sena wichawuya wadumiki wake, eri wipate kumanya wudumiki ghwawo, na ghuja ghwa mawuzuri gha masanga mazima.”

⁹Kwa huwo Shishaki mzuri wa Misri ukajoka kulwa na Jerusalemu; ukawusa mali ya Hekalu ya BWANA, na ya ngome ya mzuri, ukadwa vilambo vose. Wokoni ukadwa ngao ra dhahabu iro rerebonyeroghe ni Solomoni;

¹⁰Mzuri Rehoboamu ukabonya ngao ra shaba wulalo ghwaro, ukarineka m'baa wa walindiri uo orekoghe ukilindia mnyango ghwa ngome ya mzuri.

¹¹Ngelo rose mzuri orekoghe ukingia Hekalunyi kwa BWANA, walindiri weremnughieghe wikiridwa rija ngao, na konyuma kuriwunja sena chumbenyi cha walindiri.

¹²Mzuri uendakusera, BWANA ukahoresha machu ghake aighu yake hata ndemcheemtotesha putu, na aighu ya agho, Juda ikakaia nicha.

¹³Kwa huwo, Mzuri Rehoboamu ukakumangisha na kubonya nguma andenyi ya Jerusalemu. Rehoboamu orekoghe mundu wa irika ja miaka mirongo ina na ghumweri iji orezoyagha kubonya nguma; ukabonya nguma miaka ikumi na mfungade andenyi ya Jerusalemu, ugho muzi ghoresaghuloghe ni BWANA aghadi ya vichuku vose va Israeli, ghupate kukaia andu komtasira. Mae Rehoboamu orewangwagha Naama, Muamoni.

¹⁴Rehoboamu ukabonya mawiwi, angu useremlolieghe BWANA kwa ngolo.

¹⁵Mabonyo gha Rehoboamu kufuma kuzoya hata kutua, ghaandikilo andenyi ya Malagho gha Ngelo gha Mlodi Shemaia, na gha Mlodi Ido. Korekoghe na wuda ghwa ngelo rose aghadi ya Rehoboamu na Jeroboamu.

¹⁶Rehoboamu ukafwa sa weke ndee, ukarikwa mzinyi ghwa Daudi; na mwana wake Abija ukabonya nguma wulalo ghwake.