Read TAITA BIBLE – Biblia Ilagho Jiboie Kwa Wandu Wose 2 MALAGHO GHA NGELO 21 Bible Online

2 MALAGHO GHA NGELO 21 - TAITA BIBLE – Biblia Ilagho Jiboie Kwa Wandu Wose bible

2 MALAGHO GHA NGELO 21

¹Jehoshafati ukafwa sa weke ndee, ukarikwa kwa weke ndee mzinyi kwa Daudi; na mwana wake Jehoramu ukabonya nguma wulalo ghwake.

²Jehoramu orekoghe na waruna, awo wana wa Jehoshafati nawo ni Azaria, Jehieli, Zekaria, Azariahu. Mikaeli na Shefatia; awo wose werekoghe wana wa Jehoshafati mzuri wa Juda.

³Ndee orewiniekieghe manosi mabaa gha feza, dhahabu na vilambo va zoghori; chiaimweri na mizi iko na ngome andenyi ya Juda; ela oremnekieghe Jehoramu wuzuri angu orekoghe mvalwa wa imbiri.

⁴Hata iji Jehoramu wawada kifumbi cha ndee, na kumanga, ukawibwagha waruna wose andwamweri na wabaa wamu wa Israeli.

⁵Jehoramu orekoghe mundu wa irika ja miaka mirongo idadu na iwi ingelo orewuyagha mzuri; ukabonya nguma Jerusalemu miaka wunyanya.

⁶Ukabonya sa wazuri wa Israeli, na angu mkake orekoghe mwai wa Ahabu, Jehoramu ukanugha tabia ra wandu wa nyumba ya Ahabu. Ukabonya kiwiwi imbiri ya BWANA.

⁷Elaima sena BWANA nderekundieghe kuitotesha nyumba ya Daudi, kwa wundu ghwa ilaghano orejibonyereghe nao; kwa kukaia orelaghirieghe kumneka Daudi uo na kivalwa chake wuzuri, sa taa ya matuku ghose.

⁸Matuku gha kubonya nguma kwa Jehoramu, wandu wa Edomu wereleghieghe kukaia aisi ya Juda wikawika mzuri wawo weni.

⁹Niko Jehoramu na vilongozi vake va wuda, na magare ghake ghose wikawighendia. Waedomu na vilongozi va magare ghawo wikawimaria chia rose; ela Jehoramu na vilongozi vake wikawuka nakio, wikawikaba Waedomu, wikaghenda.

¹⁰Kwa huwo wandu wa Edomu wikalegha kubonyerwa nguma ni Juda hata idime. Ngelo iyo cheni wandu wa Libna wikalegha kubonyerwa nguma wokoni, angu Jehoramu oremsighieghe BWANA uo Mlungu wa weke ndee.

¹¹Na aighu ya agho, ukaagha andu kotasira mighondinyi isanga ja Juda, ukawilongoza wandu wikaiagha Jerusalemu wisowe wuloli na kuwilaghasha wandu wa Juda.

¹²Niko mlodi Elija ukamdumia Jehoramu barua ighambagha, “BWANA, uo Mlungu wa ndeyo Daudi waghamba, ‘Oho kwaleghie kunugha mfwano ghwa ndeyo Jehoshafati, hata mfwano ghwa wawayo Asa mzuri wa Juda.

¹³Kwanughie mfwano gha wazuri wa Israeli na kuwilongoza wandu wa Juda na Jerusalemu wisowe wuloli seji nyumba ya Ahabu erewilongozereghe wandu wa Israeli wikasowa wuloli. Wokoni kukawibwagha wanyinyu tiki, awo werekoghe wecha kukuchumba.

¹⁴Ola BWANA uchawikaba wandu wako na ikabo ibaa; wana wako, na waka wako, na vilambo vako vose;

¹⁵na oho kuchapatwa ni wukongo ghuzamie nandighi ghwa kifu; ugho wukongo ghwa matuku ghose, ghuchabonya mawula ghako ghifume.’”

¹⁶BWANA ukawibonya Wafilisti na Waarabu werekoghe wikikaia kaavui na Wakushi wizamilo ni Jehoramu;

¹⁷wikajoka kulwa na Juda, wikawingiria; wikaduka vilambo vose wereviwonieghe nyumbenyi kwa mzuri, wikadwa waka wake na wana wake, ukaasighilwa mwana wake mtini uwangwagha Jehoahazi.

¹⁸Nyuma ya aho ghose, BWANA ukamkaba na wukongo ghwa kifu ghusedimagha kuboa.

¹⁹Ukakaia nagho kwa miaka iwi, hata ghukabonya mawula ghake ghifume; nao ukafwa kwa luwawo lubaa. Wandu wake ndewerekorieghe modo ghungi kwa kumneka ishima, seji werewibonyereghe weke ndee.

²⁰Jehoramu orekoghe mundu wa irika ja miaka mirongo idadu na iwi iji wazoya kubonya nguma, ukabonya nguma Jerusalemu miaka wunyanya. Wikamrika mzinyi kwa Daudi, ela si makaburinyi gha wazuri anduangi.